| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. ជិណ្ណសុត្តវណ្ណនា
5. Jiṇṇasuttavaṇṇanā
១៤៨. ឆិន្នភិន្នដ្ឋានេ ឆិទ្ទស្ស អបុថុលត្តា អគ្គឡំ អទត្វាវ សុត្តេន សំសិព្ពនមត្តេន អគ្គឡទានេន ច ឆិទ្ទេ បុថុលេ។ និព្ពសនានីតិ ចិរនិសេវិតវសនកិច្ចានិ, បរិភោគជិណ្ណានីតិ អត្ថោ។ តេនាហ ‘‘បុព្ពេ…បេ.… លទ្ធនាមានី’’តិ, សញ្ញាបុព្ពកោ វិធិ អនិច្ចោតិ ‘‘គហបតានី’’តិ វុត្តំ យថា ‘‘វីរិយ’’ន្តិ។
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
សេនាបតិន្តិ សេនាបតិភាវិនំ, សេនាបច្ចារហន្តិ អត្ថោ។ អត្តនោ កម្មេនាតិ អត្តនា កាតព្ពកម្មេន។ សោតិ សត្ថា។ តស្មិន្តិ មហាកស្សបត្ថេរេ ករោតីតិ សម្ពន្ធោ។ ន ករោតីតិ វុត្តមត្ថំ វិវរន្តោ ‘‘កស្មា’’តិអាទិមាហ។ យទិ សត្ថា ធុតង្គានិ ន វិស្សជ្ជាបេតុកាមោ, អថ កស្មា ‘‘ជិណ្ណោសិ ទានិ ត្វ’’ន្តិអាទិមវោចាតិ អាហ ‘‘យថា បនា’’តិអាទិ។
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
ទិដ្ឋធម្មសុខវិហារន្តិ ឥមស្មិំយេវ អត្តភាវេ ផាសុវិហារំ។ អមានុសិកា សវនរតីតិ អតិក្កន្តមានុសិកាយ អរញ្ញសទ្ទុប្បត្តិយា អរញ្ញេហំ វសាមីតិ វិវេកវាសូបនិស្សយាធីនសទ្ទសវនបច្ចយា ធម្មរតិ ឧប្បជ្ជតិ។ អបរោតិ អញ្ញោ, ទុតិយោតិ អត្ថោ។ តត្ថេវាតិ តស្មិំយេវ ឯកស្ស វិហរណដ្ឋានេ វិហរណសមយេ ច ផាសុ ភវតិ ចិត្តវិវេកសម្ភវតោ។ តេនាហ ‘‘ឯកស្ស រមតោ វនេ’’តិ។
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
តថាតិ យថា អារញ្ញិកស្ស រតិ, តថា បិណ្ឌបាតិកស្ស លព្ភតិ ទិដ្ឋធម្មសុខវិហារោ។ ឯស នយោ សេសេសុ។ អបិណ្ឌបាតិកាធីនោ ឥតរស្ស វិសេសជោតកោតិ តមេវស្ស វិសេសំ ទស្សេតុំ ‘‘អកាលចារី’’តិអាទិ វុត្តំ។
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
អម្ហាកំ សលាកំ គហេត្វា ភត្តត្ថាយ គេហំ អនាគច្ឆន្តស្ស សត្តាហំ ន បាតេតព្ពន្តិ សាមិកេហិ ទិន្នត្តា សត្តាហំ សលាកំ ន លភតិ, ន កតិកវសេន។ បិណ្ឌចារិកវត្តេ អវត្តនតោ ‘‘យស្ស ចេសា’’តិអាទិ វុត្តំ។
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
បឋមតរំ កាតព្ពំ យំ, តំ វត្តំ, ឥតរំ បដិវត្តំ។ មហន្តំ វា វត្តំ, ខុទ្ទកំ បដិវត្តំ។ កេចិ ‘‘វត្តបដិបត្តិ’’ន្តិ បឋន្តិ, វត្តស្ស ករណន្តិ អត្ថោ។ ឧទ្ធរណ-អតិហរណ-វីតិហរណវោស្សជ្ជន-សន្និក្ខេបន-សន្និរុម្ភនានំ វសេន ឆ កោដ្ឋាសេ។ គរុភាវេនាតិ ថិរភាវេន។
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘អមុកស្មិំ សេនាសនេ វសន្តា ពហុំ វស្សវាសិកំ លភន្តី’’តិ តថា ន វស្សវាសិកំ បរិយេសន្តោ ចរតិ វស្សវាសិកស្សេវ អគ្គហណតោ។ តស្មា សេនាសនផាសុកំយេវ ចិន្តេតិ។ តេន ពហុបរិក្ខារភាវេន ផាសុវិហារោ នត្ថិ បរិក្ខារានំ រក្ខណបដិជគ្គនាទិទុក្ខពហុលតាយ។ អប្បិច្ឆាទីនន្តិ អប្បិច្ឆសន្តុដ្ឋាទីនំយេវ លព្ភតិ ទិដ្ឋធម្មសុខវិហារោ។
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
ជិណ្ណសុត្តវណ្ណនា និដ្ឋិតា។
Jiṇṇasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. ជិណ្ណសុត្តំ • 5. Jiṇṇasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. ជិណ្ណសុត្តវណ្ណនា • 5. Jiṇṇasuttavaṇṇanā
