| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. ဇိဏ္ဏသုတ္တဝဏ္ဏနာ
5. Jiṇṇasuttavaṇṇanā
၁၄၈. ဆိန္နဘိန္နဋ္ဌာနေ ဆိဒ္ဒသ္သ အပုထုလတ္တာ အဂ္ဂဠံ အဒတ္ဝာဝ သုတ္တေန သံသိဗ္ဗနမတ္တေန အဂ္ဂဠဒာနေန စ ဆိဒ္ဒေ ပုထုလေ။ နိဗ္ဗသနာနီတိ စိရနိသေဝိတဝသနကိစ္စာနိ, ပရိဘောဂဇိဏ္ဏာနီတိ အတ္ထော။ တေနာဟ ‘‘ပုဗ္ဗေ။ပေ.။ လဒ္ဓနာမာနီ’’တိ, သညာပုဗ္ဗကော ဝိဓိ အနိစ္စောတိ ‘‘ဂဟပတာနီ’’တိ ဝုတ္တံ ယထာ ‘‘ဝီရိယ’’န္တိ။
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
သေနာပတိန္တိ သေနာပတိဘာဝိနံ, သေနာပစ္စာရဟန္တိ အတ္ထော။ အတ္တနော ကမ္မေနာတိ အတ္တနာ ကာတဗ္ဗကမ္မေန။ သောတိ သတ္ထာ။ တသ္မိန္တိ မဟာကသ္သပတ္ထေရေ ကရောတီတိ သမ္ဗန္ဓော။ န ကရောတီတိ ဝုတ္တမတ္ထံ ဝိဝရန္တော ‘‘ကသ္မာ’’တိအာဒိမာဟ။ ယဒိ သတ္ထာ ဓုတင္ဂာနိ န ဝိသ္သဇ္ဇာပေတုကာမော, အထ ကသ္မာ ‘‘ဇိဏ္ဏောသိ ဒာနိ တ္ဝ’’န္တိအာဒိမဝောစာတိ အာဟ ‘‘ယထာ ပနာ’’တိအာဒိ။
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
ဒိဋ္ဌဓမ္မသုခဝိဟာရန္တိ ဣမသ္မိံယေဝ အတ္တဘာဝေ ဖာသုဝိဟာရံ။ အမာနုသိကာ သဝနရတီတိ အတိက္ကန္တမာနုသိကာယ အရညသဒ္ဒုပ္ပတ္တိယာ အရညေဟံ ဝသာမီတိ ဝိဝေကဝာသူပနိသ္သယာဓီနသဒ္ဒသဝနပစ္စယာ ဓမ္မရတိ ဥပ္ပဇ္ဇတိ။ အပရောတိ အညော, ဒုတိယောတိ အတ္ထော။ တတ္ထေဝာတိ တသ္မိံယေဝ ဧကသ္သ ဝိဟရဏဋ္ဌာနေ ဝိဟရဏသမယေ စ ဖာသု ဘဝတိ စိတ္တဝိဝေကသမ္ဘဝတော။ တေနာဟ ‘‘ဧကသ္သ ရမတော ဝနေ’’တိ။
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
တထာတိ ယထာ အာရညိကသ္သ ရတိ, တထာ ပိဏ္ဍပာတိကသ္သ လဗ္ဘတိ ဒိဋ္ဌဓမ္မသုခဝိဟာရော။ ဧသ နယော သေသေသု။ အပိဏ္ဍပာတိကာဓီနော ဣတရသ္သ ဝိသေသဇောတကောတိ တမေဝသ္သ ဝိသေသံ ဒသ္သေတုံ ‘‘အကာလစာရီ’’တိအာဒိ ဝုတ္တံ။
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
အမ္ဟာကံ သလာကံ ဂဟေတ္ဝာ ဘတ္တတ္ထာယ ဂေဟံ အနာဂစ္ဆန္တသ္သ သတ္တာဟံ န ပာတေတဗ္ဗန္တိ သာမိကေဟိ ဒိန္နတ္တာ သတ္တာဟံ သလာကံ န လဘတိ, န ကတိကဝသေန။ ပိဏ္ဍစာရိကဝတ္တေ အဝတ္တနတော ‘‘ယသ္သ စေသာ’’တိအာဒိ ဝုတ္တံ။
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
ပဌမတရံ ကာတဗ္ဗံ ယံ, တံ ဝတ္တံ, ဣတရံ ပဋိဝတ္တံ။ မဟန္တံ ဝာ ဝတ္တံ, ခုဒ္ဒကံ ပဋိဝတ္တံ။ ကေစိ ‘‘ဝတ္တပဋိပတ္တိ’’န္တိ ပဌန္တိ, ဝတ္တသ္သ ကရဏန္တိ အတ္ထော။ ဥဒ္ဓရဏ-အတိဟရဏ-ဝီတိဟရဏဝောသ္သဇ္ဇန-သန္နိက္ခေပန-သန္နိရုမ္ဘနာနံ ဝသေန ဆ ကောဋ္ဌာသေ။ ဂရုဘာဝေနာတိ ထိရဘာဝေန။
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘အမုကသ္မိံ သေနာသနေ ဝသန္တာ ဗဟုံ ဝသ္သဝာသိကံ လဘန္တီ’’တိ တထာ န ဝသ္သဝာသိကံ ပရိယေသန္တော စရတိ ဝသ္သဝာသိကသ္သေဝ အဂ္ဂဟဏတော။ တသ္မာ သေနာသနဖာသုကံယေဝ စိန္တေတိ။ တေန ဗဟုပရိက္ခာရဘာဝေန ဖာသုဝိဟာရော နတ္ထိ ပရိက္ခာရာနံ ရက္ခဏပဋိဇဂ္ဂနာဒိဒုက္ခဗဟုလတာယ။ အပ္ပိစ္ဆာဒီနန္တိ အပ္ပိစ္ဆသန္တုဋ္ဌာဒီနံယေဝ လဗ္ဘတိ ဒိဋ္ဌဓမ္မသုခဝိဟာရော။
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
ဇိဏ္ဏသုတ္တဝဏ္ဏနာ နိဋ္ဌိတာ။
Jiṇṇasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ဇိဏ္ဏသုတ္တံ • 5. Jiṇṇasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဇိဏ္ဏသုတ္တဝဏ္ဏနာ • 5. Jiṇṇasuttavaṇṇanā
