| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
5. ජිණ්‌ණසුත්‌තවණ්‌ණනා
5. Jiṇṇasuttavaṇṇanā
148. ඡින්‌නභින්‌නට්‌ඨානෙ ඡිද්‌දස්‌ස අපුථුලත්‌තා අග්‌ගළං අදත්‌වාව සුත්‌තෙන සංසිබ්‌බනමත්‌තෙන අග්‌ගළදානෙන ච ඡිද්‌දෙ පුථුලෙ. නිබ්‌බසනානීති චිරනිසෙවිතවසනකිච්‌චානි, පරිභොගජිණ්‌ණානීති අත්‌ථො. තෙනාහ ‘‘පුබ්‌බෙ…පෙ.… ලද්‌ධනාමානී’’ති, සඤ්‌ඤාපුබ්‌බකො විධි අනිච්‌චොති ‘‘ගහපතානී’’ති වුත්‌තං යථා ‘‘වීරිය’’න්‌ති.
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
සෙනාපතින්‌ති සෙනාපතිභාවිනං, සෙනාපච්‌චාරහන්‌ති අත්‌ථො. අත්‌තනො කම්‌මෙනාති අත්‌තනා කාතබ්‌බකම්‌මෙන. සොති සත්‌ථා. තස්‌මින්‌ති මහාකස්‌සපත්‌ථෙරෙ කරොතීති සම්‌බන්‌ධො. න කරොතීති වුත්‌තමත්‌ථං විවරන්‌තො ‘‘කස්‌මා’’තිආදිමාහ. යදි සත්‌ථා ධුතඞ්‌ගානි න විස්‌සජ්‌ජාපෙතුකාමො, අථ කස්‌මා ‘‘ජිණ්‌ණොසි දානි ත්‌ව’’න්‌තිආදිමවොචාති ආහ ‘‘යථා පනා’’තිආදි.
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
දිට්‌ඨධම්‌මසුඛවිහාරන්‌ති ඉමස්‌මිංයෙව අත්‌තභාවෙ ඵාසුවිහාරං. අමානුසිකා සවනරතීති අතික්‌කන්‌තමානුසිකාය අරඤ්‌ඤසද්‌දුප්‌පත්‌තියා අරඤ්‌ඤෙහං වසාමීති විවෙකවාසූපනිස්‌සයාධීනසද්‌දසවනපච්‌චයා ධම්‌මරති උප්‌පජ්‌ජති. අපරොති අඤ්‌ඤො, දුතියොති අත්‌ථො. තත්‌ථෙවාති තස්‌මිංයෙව එකස්‌ස විහරණට්‌ඨානෙ විහරණසමයෙ ච ඵාසු භවති චිත්‌තවිවෙකසම්‌භවතො. තෙනාහ ‘‘එකස්‌ස රමතො වනෙ’’ති.
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
තථාති යථා ආරඤ්‌ඤිකස්‌ස රති, තථා පිණ්‌ඩපාතිකස්‌ස ලබ්‌භති දිට්‌ඨධම්‌මසුඛවිහාරො. එස නයො සෙසෙසු. අපිණ්‌ඩපාතිකාධීනො ඉතරස්‌ස විසෙසජොතකොති තමෙවස්‌ස විසෙසං දස්‌සෙතුං ‘‘අකාලචාරී’’තිආදි වුත්‌තං.
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
අම්‌හාකං සලාකං ගහෙත්‌වා භත්‌තත්‌ථාය ගෙහං අනාගච්‌ඡන්‌තස්‌ස සත්‌තාහං න පාතෙතබ්‌බන්‌ති සාමිකෙහි දින්‌නත්‌තා සත්‌තාහං සලාකං න ලභති, න කතිකවසෙන. පිණ්‌ඩචාරිකවත්‌තෙ අවත්‌තනතො ‘‘යස්‌ස චෙසා’’තිආදි වුත්‌තං.
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
පඨමතරං කාතබ්‌බං යං, තං වත්‌තං, ඉතරං පටිවත්‌තං. මහන්‌තං වා වත්‌තං, ඛුද්‌දකං පටිවත්‌තං. කෙචි ‘‘වත්‌තපටිපත්‌ති’’න්‌ති පඨන්‌ති, වත්‌තස්‌ස කරණන්‌ති අත්‌ථො. උද්‌ධරණ-අතිහරණ-වීතිහරණවොස්‌සජ්‌ජන-සන්‌නික්‌ඛෙපන-සන්‌නිරුම්‌භනානං වසෙන ඡ කොට්‌ඨාසෙ. ගරුභාවෙනාති ථිරභාවෙන.
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘අමුකස්‌මිං සෙනාසනෙ වසන්‌තා බහුං වස්‌සවාසිකං ලභන්‌තී’’ති තථා න වස්‌සවාසිකං පරියෙසන්‌තො චරති වස්‌සවාසිකස්‌සෙව අග්‌ගහණතො. තස්‌මා සෙනාසනඵාසුකංයෙව චින්‌තෙති. තෙන බහුපරික්‌ඛාරභාවෙන ඵාසුවිහාරො නත්‌ථි පරික්‌ඛාරානං රක්‌ඛණපටිජග්‌ගනාදිදුක්‌ඛබහුලතාය. අප්‌පිච්‌ඡාදීනන්‌ති අප්‌පිච්‌ඡසන්‌තුට්‌ඨාදීනංයෙව ලබ්‌භති දිට්‌ඨධම්‌මසුඛවිහාරො.
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
ජිණ්‌ණසුත්‌තවණ්‌ණනා නිට්‌ඨිතා.
Jiṇṇasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. ජිණ්‌ණසුත්‌තං • 5. Jiṇṇasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. ජිණ්‌ණසුත්‌තවණ්‌ණනා • 5. Jiṇṇasuttavaṇṇanā
