| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੫. ਜਿਣ੍ਣਸੁਤ੍ਤવਣ੍ਣਨਾ
5. Jiṇṇasuttavaṇṇanā
੧੪੮. ਛਿਨ੍ਨਭਿਨ੍ਨਟ੍ਠਾਨੇ ਛਿਦ੍ਦਸ੍ਸ ਅਪੁਥੁਲਤ੍ਤਾ ਅਗ੍ਗਲ਼ਂ ਅਦਤ੍વਾવ ਸੁਤ੍ਤੇਨ ਸਂਸਿਬ੍ਬਨਮਤ੍ਤੇਨ ਅਗ੍ਗਲ਼ਦਾਨੇਨ ਚ ਛਿਦ੍ਦੇ ਪੁਥੁਲੇ। ਨਿਬ੍ਬਸਨਾਨੀਤਿ ਚਿਰਨਿਸੇવਿਤવਸਨਕਿਚ੍ਚਾਨਿ, ਪਰਿਭੋਗਜਿਣ੍ਣਾਨੀਤਿ ਅਤ੍ਥੋ। ਤੇਨਾਹ ‘‘ਪੁਬ੍ਬੇ…ਪੇ॰… ਲਦ੍ਧਨਾਮਾਨੀ’’ਤਿ, ਸਞ੍ਞਾਪੁਬ੍ਬਕੋ વਿਧਿ ਅਨਿਚ੍ਚੋਤਿ ‘‘ਗਹਪਤਾਨੀ’’ਤਿ વੁਤ੍ਤਂ ਯਥਾ ‘‘વੀਰਿਯ’’ਨ੍ਤਿ।
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
ਸੇਨਾਪਤਿਨ੍ਤਿ ਸੇਨਾਪਤਿਭਾવਿਨਂ, ਸੇਨਾਪਚ੍ਚਾਰਹਨ੍ਤਿ ਅਤ੍ਥੋ। ਅਤ੍ਤਨੋ ਕਮ੍ਮੇਨਾਤਿ ਅਤ੍ਤਨਾ ਕਾਤਬ੍ਬਕਮ੍ਮੇਨ। ਸੋਤਿ ਸਤ੍ਥਾ। ਤਸ੍ਮਿਨ੍ਤਿ ਮਹਾਕਸ੍ਸਪਤ੍ਥੇਰੇ ਕਰੋਤੀਤਿ ਸਮ੍ਬਨ੍ਧੋ। ਨ ਕਰੋਤੀਤਿ વੁਤ੍ਤਮਤ੍ਥਂ વਿવਰਨ੍ਤੋ ‘‘ਕਸ੍ਮਾ’’ਤਿਆਦਿਮਾਹ। ਯਦਿ ਸਤ੍ਥਾ ਧੁਤਙ੍ਗਾਨਿ ਨ વਿਸ੍ਸਜ੍ਜਾਪੇਤੁਕਾਮੋ, ਅਥ ਕਸ੍ਮਾ ‘‘ਜਿਣ੍ਣੋਸਿ ਦਾਨਿ ਤ੍વ’’ਨ੍ਤਿਆਦਿਮવੋਚਾਤਿ ਆਹ ‘‘ਯਥਾ ਪਨਾ’’ਤਿਆਦਿ।
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
ਦਿਟ੍ਠਧਮ੍ਮਸੁਖવਿਹਾਰਨ੍ਤਿ ਇਮਸ੍ਮਿਂਯੇવ ਅਤ੍ਤਭਾવੇ ਫਾਸੁવਿਹਾਰਂ। ਅਮਾਨੁਸਿਕਾ ਸવਨਰਤੀਤਿ ਅਤਿਕ੍ਕਨ੍ਤਮਾਨੁਸਿਕਾਯ ਅਰਞ੍ਞਸਦ੍ਦੁਪ੍ਪਤ੍ਤਿਯਾ ਅਰਞ੍ਞੇਹਂ વਸਾਮੀਤਿ વਿવੇਕવਾਸੂਪਨਿਸ੍ਸਯਾਧੀਨਸਦ੍ਦਸવਨਪਚ੍ਚਯਾ ਧਮ੍ਮਰਤਿ ਉਪ੍ਪਜ੍ਜਤਿ। ਅਪਰੋਤਿ ਅਞ੍ਞੋ, ਦੁਤਿਯੋਤਿ ਅਤ੍ਥੋ। ਤਤ੍ਥੇવਾਤਿ ਤਸ੍ਮਿਂਯੇવ ਏਕਸ੍ਸ વਿਹਰਣਟ੍ਠਾਨੇ વਿਹਰਣਸਮਯੇ ਚ ਫਾਸੁ ਭવਤਿ ਚਿਤ੍ਤવਿવੇਕਸਮ੍ਭવਤੋ। ਤੇਨਾਹ ‘‘ਏਕਸ੍ਸ ਰਮਤੋ વਨੇ’’ਤਿ।
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
ਤਥਾਤਿ ਯਥਾ ਆਰਞ੍ਞਿਕਸ੍ਸ ਰਤਿ, ਤਥਾ ਪਿਣ੍ਡਪਾਤਿਕਸ੍ਸ ਲਬ੍ਭਤਿ ਦਿਟ੍ਠਧਮ੍ਮਸੁਖવਿਹਾਰੋ। ਏਸ ਨਯੋ ਸੇਸੇਸੁ। ਅਪਿਣ੍ਡਪਾਤਿਕਾਧੀਨੋ ਇਤਰਸ੍ਸ વਿਸੇਸਜੋਤਕੋਤਿ ਤਮੇવਸ੍ਸ વਿਸੇਸਂ ਦਸ੍ਸੇਤੁਂ ‘‘ਅਕਾਲਚਾਰੀ’’ਤਿਆਦਿ વੁਤ੍ਤਂ।
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
ਅਮ੍ਹਾਕਂ ਸਲਾਕਂ ਗਹੇਤ੍વਾ ਭਤ੍ਤਤ੍ਥਾਯ ਗੇਹਂ ਅਨਾਗਚ੍ਛਨ੍ਤਸ੍ਸ ਸਤ੍ਤਾਹਂ ਨ ਪਾਤੇਤਬ੍ਬਨ੍ਤਿ ਸਾਮਿਕੇਹਿ ਦਿਨ੍ਨਤ੍ਤਾ ਸਤ੍ਤਾਹਂ ਸਲਾਕਂ ਨ ਲਭਤਿ, ਨ ਕਤਿਕવਸੇਨ। ਪਿਣ੍ਡਚਾਰਿਕવਤ੍ਤੇ ਅવਤ੍ਤਨਤੋ ‘‘ਯਸ੍ਸ ਚੇਸਾ’’ਤਿਆਦਿ વੁਤ੍ਤਂ।
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
ਪਠਮਤਰਂ ਕਾਤਬ੍ਬਂ ਯਂ, ਤਂ વਤ੍ਤਂ, ਇਤਰਂ ਪਟਿવਤ੍ਤਂ। ਮਹਨ੍ਤਂ વਾ વਤ੍ਤਂ, ਖੁਦ੍ਦਕਂ ਪਟਿવਤ੍ਤਂ। ਕੇਚਿ ‘‘વਤ੍ਤਪਟਿਪਤ੍ਤਿ’’ਨ੍ਤਿ ਪਠਨ੍ਤਿ, વਤ੍ਤਸ੍ਸ ਕਰਣਨ੍ਤਿ ਅਤ੍ਥੋ। ਉਦ੍ਧਰਣ-ਅਤਿਹਰਣ-વੀਤਿਹਰਣવੋਸ੍ਸਜ੍ਜਨ-ਸਨ੍ਨਿਕ੍ਖੇਪਨ-ਸਨ੍ਨਿਰੁਮ੍ਭਨਾਨਂ વਸੇਨ ਛ ਕੋਟ੍ਠਾਸੇ। ਗਰੁਭਾવੇਨਾਤਿ ਥਿਰਭਾવੇਨ।
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘ਅਮੁਕਸ੍ਮਿਂ ਸੇਨਾਸਨੇ વਸਨ੍ਤਾ ਬਹੁਂ વਸ੍ਸવਾਸਿਕਂ ਲਭਨ੍ਤੀ’’ਤਿ ਤਥਾ ਨ વਸ੍ਸવਾਸਿਕਂ ਪਰਿਯੇਸਨ੍ਤੋ ਚਰਤਿ વਸ੍ਸવਾਸਿਕਸ੍ਸੇવ ਅਗ੍ਗਹਣਤੋ। ਤਸ੍ਮਾ ਸੇਨਾਸਨਫਾਸੁਕਂਯੇવ ਚਿਨ੍ਤੇਤਿ। ਤੇਨ ਬਹੁਪਰਿਕ੍ਖਾਰਭਾવੇਨ ਫਾਸੁવਿਹਾਰੋ ਨਤ੍ਥਿ ਪਰਿਕ੍ਖਾਰਾਨਂ ਰਕ੍ਖਣਪਟਿਜਗ੍ਗਨਾਦਿਦੁਕ੍ਖਬਹੁਲਤਾਯ। ਅਪ੍ਪਿਚ੍ਛਾਦੀਨਨ੍ਤਿ ਅਪ੍ਪਿਚ੍ਛਸਨ੍ਤੁਟ੍ਠਾਦੀਨਂਯੇવ ਲਬ੍ਭਤਿ ਦਿਟ੍ਠਧਮ੍ਮਸੁਖવਿਹਾਰੋ।
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
ਜਿਣ੍ਣਸੁਤ੍ਤવਣ੍ਣਨਾ ਨਿਟ੍ਠਿਤਾ।
Jiṇṇasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੫. ਜਿਣ੍ਣਸੁਤ੍ਤਂ • 5. Jiṇṇasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੫. ਜਿਣ੍ਣਸੁਤ੍ਤવਣ੍ਣਨਾ • 5. Jiṇṇasuttavaṇṇanā
