| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. ජීවකම්‌බවනපටිසල්‌ලානසුත්‌තං
6. Jīvakambavanapaṭisallānasuttaṃ
161. එකං සමයං භගවා රාජගහෙ විහරති ජීවකම්‌බවනෙ. තත්‍ර ඛො භගවා භික්‌ඛූ ආමන්‌තෙසි…පෙ.… ‘‘පටිසල්‌ලානෙ, භික්‌ඛවෙ, යොගමාපජ්‌ජථ. පටිසල්‌ලීනස්‌ස, භික්‌ඛවෙ, භික්‌ඛුනො යථාභූතං ඔක්‌ඛායති. කිඤ්‌ච යථාභූතං ඔක්‌ඛායති? චක්‌ඛුං අනිච්‌චන්‌ති යථාභූතං ඔක්‌ඛායති, රූපා අනිච්‌චාති යථාභූතං ඔක්‌ඛායති, චක්‌ඛුවිඤ්‌ඤාණං අනිච්‌චන්‌ති යථාභූතං ඔක්‌ඛායති, චක්‌ඛුසම්‌ඵස්‌සො අනිච්‌චොති යථාභූතං ඔක්‌ඛායති, යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චන්‌ති යථාභූතං ඔක්‌ඛායති…පෙ.… මනො අනිච්‌චොති යථාභූතං ඔක්‌ඛායති, ධම්‌මා… මනොවිඤ්‌ඤාණං… මනොසම්‌ඵස්‌සො… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චන්‌ති යථාභූතං ඔක්‌ඛායති. පටිසල්‌ලානෙ භික්‌ඛවෙ, යොගමාපජ්‌ජථ. පටිසල්‌ලීනස්‌ස, භික්‌ඛවෙ, භික්‌ඛුනො යථාභූතං ඔක්‌ඛායතී’’ති. ඡට්‌ඨං.
161. Ekaṃ samayaṃ bhagavā rājagahe viharati jīvakambavane. Tatra kho bhagavā bhikkhū āmantesi…pe… ‘‘paṭisallāne, bhikkhave, yogamāpajjatha. Paṭisallīnassa, bhikkhave, bhikkhuno yathābhūtaṃ okkhāyati. Kiñca yathābhūtaṃ okkhāyati? Cakkhuṃ aniccanti yathābhūtaṃ okkhāyati, rūpā aniccāti yathābhūtaṃ okkhāyati, cakkhuviññāṇaṃ aniccanti yathābhūtaṃ okkhāyati, cakkhusamphasso aniccoti yathābhūtaṃ okkhāyati, yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti yathābhūtaṃ okkhāyati…pe… mano aniccoti yathābhūtaṃ okkhāyati, dhammā… manoviññāṇaṃ… manosamphasso… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti yathābhūtaṃ okkhāyati. Paṭisallāne bhikkhave, yogamāpajjatha. Paṭisallīnassa, bhikkhave, bhikkhuno yathābhūtaṃ okkhāyatī’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5-6. ජීවකම්‌බවනසමාධිසුත්‌තාදිවණ්‌ණනා • 5-6. Jīvakambavanasamādhisuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5-6. ජීවකම්‌බවනසමාධිසුත්‌තාදිවණ්‌ණනා • 5-6. Jīvakambavanasamādhisuttādivaṇṇanā
