| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. জীৰকম্বৰনসমাধিসুত্তং
5. Jīvakambavanasamādhisuttaṃ
১৬০. একং সমযং ভগৰা রাজগহে ৰিহরতি জীৰকম্বৰনে। তত্র খো ভগৰা ভিক্খূ আমন্তেসি – ‘‘ভিক্খৰো’’তি…পে॰… ‘‘সমাধিং, ভিক্খৰে, ভাৰেথ। সমাহিতস্স, ভিক্খৰে , ভিক্খুনো যথাভূতং ওক্খাযতি। কিঞ্চ যথাভূতং ওক্খাযতি? চক্খুং অনিচ্চন্তি যথাভূতং ওক্খাযতি, রূপা অনিচ্চাতি যথাভূতং ওক্খাযতি, চক্খুৰিঞ্ঞাণং অনিচ্চন্তি যথাভূতং ওক্খাযতি, চক্খুসম্ফস্সো অনিচ্চোতি যথাভূতং ওক্খাযতি, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি যথাভূতং ওক্খাযতি…পে॰… জিৰ্হা অনিচ্চাতি যথাভূতং ওক্খাযতি…পে॰… মনো অনিচ্চোতি যথাভূতং ওক্খাযতি, ধম্মা অনিচ্চাতি যথাভূতং ওক্খাযতি…পে॰… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি যথাভূতং ওক্খাযতি। সমাধিং, ভিক্খৰে, ভাৰেথ। সমাহিতস্স, ভিক্খৰে, ভিক্খুনো যথাভূতং ওক্খাযতী’’তি। পঞ্চমং।
160. Ekaṃ samayaṃ bhagavā rājagahe viharati jīvakambavane. Tatra kho bhagavā bhikkhū āmantesi – ‘‘bhikkhavo’’ti…pe… ‘‘samādhiṃ, bhikkhave, bhāvetha. Samāhitassa, bhikkhave , bhikkhuno yathābhūtaṃ okkhāyati. Kiñca yathābhūtaṃ okkhāyati? Cakkhuṃ aniccanti yathābhūtaṃ okkhāyati, rūpā aniccāti yathābhūtaṃ okkhāyati, cakkhuviññāṇaṃ aniccanti yathābhūtaṃ okkhāyati, cakkhusamphasso aniccoti yathābhūtaṃ okkhāyati, yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti yathābhūtaṃ okkhāyati…pe… jivhā aniccāti yathābhūtaṃ okkhāyati…pe… mano aniccoti yathābhūtaṃ okkhāyati, dhammā aniccāti yathābhūtaṃ okkhāyati…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccanti yathābhūtaṃ okkhāyati. Samādhiṃ, bhikkhave, bhāvetha. Samāhitassa, bhikkhave, bhikkhuno yathābhūtaṃ okkhāyatī’’ti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫-৬. জীৰকম্বৰনসমাধিসুত্তাদিৰণ্ণনা • 5-6. Jīvakambavanasamādhisuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫-৬. জীৰকম্বৰনসমাধিসুত্তাদিৰণ্ণনা • 5-6. Jīvakambavanasamādhisuttādivaṇṇanā
