| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៦. ជីវកសុត្តំ
6. Jīvakasuttaṃ
២៦. ឯកំ សមយំ ភគវា រាជគហេ វិហរតិ ជីវកម្ពវនេ។ អថ ខោ ជីវកោ កោមារភច្ចោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ ជីវកោ កោមារភច្ចោ ភគវន្តំ ឯតទវោច – ‘‘កិត្តាវតា នុ ខោ, ភន្តេ, ឧបាសកោ ហោតី’’តិ? ‘‘យតោ ខោ, ជីវក, ពុទ្ធំ សរណំ គតោ ហោតិ, ធម្មំ សរណំ គតោ ហោតិ, សង្ឃំ សរណំ គតោ ហោតិ; ឯត្តាវតា ខោ ជីវក, ឧបាសកោ ហោតី’’តិ។
26. Ekaṃ samayaṃ bhagavā rājagahe viharati jīvakambavane. Atha kho jīvako komārabhacco yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘kittāvatā nu kho, bhante, upāsako hotī’’ti? ‘‘Yato kho, jīvaka, buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti; ettāvatā kho jīvaka, upāsako hotī’’ti.
‘‘កិត្តាវតា បន, ភន្តេ, ឧបាសកោ សីលវា ហោតី’’តិ? ‘‘យតោ ខោ, ជីវក, ឧបាសកោ បាណាតិបាតា បដិវិរតោ ហោតិ…បេ.… សុរាមេរយមជ្ជបមាទដ្ឋានា បដិវិរតោ ហោតិ; ឯត្តាវតា ខោ, ជីវក, ឧបាសកោ សីលវា ហោតី’’តិ។
‘‘Kittāvatā pana, bhante, upāsako sīlavā hotī’’ti? ‘‘Yato kho, jīvaka, upāsako pāṇātipātā paṭivirato hoti…pe… surāmerayamajjapamādaṭṭhānā paṭivirato hoti; ettāvatā kho, jīvaka, upāsako sīlavā hotī’’ti.
‘‘កិត្តាវតា បន, ភន្តេ, ឧបាសកោ អត្តហិតាយ បដិបន្នោ ហោតិ, នោ បរហិតាយា’’តិ? ‘‘យតោ ខោ, ជីវក, ឧបាសកោ អត្តនាវ សទ្ធាសម្បន្នោ ហោតិ, នោ បរំ សទ្ធាសម្បទាយ សមាទបេតិ…បេ.… អត្តនាវ អត្ថមញ្ញាយ ធម្មមញ្ញាយ ធម្មានុធម្មប្បដិបន្នោ ហោតិ, នោ បរំ ធម្មានុធម្មប្បដិបត្តិយា សមាទបេតិ។ ឯត្តាវតា ខោ, ជីវក, ឧបាសកោ អត្តហិតាយ បដិបន្នោ ហោតិ, នោ បរហិតាយា’’តិ។
‘‘Kittāvatā pana, bhante, upāsako attahitāya paṭipanno hoti, no parahitāyā’’ti? ‘‘Yato kho, jīvaka, upāsako attanāva saddhāsampanno hoti, no paraṃ saddhāsampadāya samādapeti…pe… attanāva atthamaññāya dhammamaññāya dhammānudhammappaṭipanno hoti, no paraṃ dhammānudhammappaṭipattiyā samādapeti. Ettāvatā kho, jīvaka, upāsako attahitāya paṭipanno hoti, no parahitāyā’’ti.
‘‘កិត្តាវតា បន, ភន្តេ, ឧបាសកោ អត្តហិតាយ ច បដិបន្នោ ហោតិ បរហិតាយ ចា’’តិ? ‘‘យតោ ខោ, ជីវក, ឧបាសកោ អត្តនា ច សទ្ធាសម្បន្នោ ហោតិ, បរញ្ច សទ្ធាសម្បទាយ សមាទបេតិ; អត្តនា ច សីលសម្បន្នោ ហោតិ, បរញ្ច សីលសម្បទាយ សមាទបេតិ; អត្តនា ច ចាគសម្បន្នោ ហោតិ, បរញ្ច ចាគសម្បទាយ សមាទបេតិ; អត្តនា ច ភិក្ខូនំ ទស្សនកាមោ ហោតិ, បរញ្ច ភិក្ខូនំ ទស្សនេ សមាទបេតិ; អត្តនា ច សទ្ធម្មំ សោតុកាមោ ហោតិ, បរញ្ច សទ្ធម្មស្សវនេ សមាទបេតិ; អត្តនា ច សុតានំ ធម្មានំ ធារណជាតិកោ ហោតិ, បរញ្ច ធម្មធារណាយ សមាទបេតិ; អត្តនា ច សុតានំ ធម្មានំ អត្ថូបបរិក្ខិតា ហោតិ, បរញ្ច អត្ថូបបរិក្ខាយ សមាទបេតិ; អត្តនា ច អត្ថមញ្ញាយ ធម្មមញ្ញាយ ធម្មានុធម្មប្បដិបន្នោ ហោតិ, បរញ្ច ធម្មានុធម្មប្បដិបត្តិយា សមាទបេតិ។ ឯត្តាវតា ខោ, ជីវក, ឧបាសកោ អត្តហិតាយ ច បដិបន្នោ ហោតិ បរហិតាយ ចា’’តិ។ ឆដ្ឋំ។
‘‘Kittāvatā pana, bhante, upāsako attahitāya ca paṭipanno hoti parahitāya cā’’ti? ‘‘Yato kho, jīvaka, upāsako attanā ca saddhāsampanno hoti, parañca saddhāsampadāya samādapeti; attanā ca sīlasampanno hoti, parañca sīlasampadāya samādapeti; attanā ca cāgasampanno hoti, parañca cāgasampadāya samādapeti; attanā ca bhikkhūnaṃ dassanakāmo hoti, parañca bhikkhūnaṃ dassane samādapeti; attanā ca saddhammaṃ sotukāmo hoti, parañca saddhammassavane samādapeti; attanā ca sutānaṃ dhammānaṃ dhāraṇajātiko hoti, parañca dhammadhāraṇāya samādapeti; attanā ca sutānaṃ dhammānaṃ atthūpaparikkhitā hoti, parañca atthūpaparikkhāya samādapeti; attanā ca atthamaññāya dhammamaññāya dhammānudhammappaṭipanno hoti, parañca dhammānudhammappaṭipattiyā samādapeti. Ettāvatā kho, jīvaka, upāsako attahitāya ca paṭipanno hoti parahitāya cā’’ti. Chaṭṭhaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥-៦. មហានាមសុត្តាទិវណ្ណនា • 5-6. Mahānāmasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-៧. បឋមឧគ្គសុត្តាទិវណ្ណនា • 1-7. Paṭhamauggasuttādivaṇṇanā
