| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
8. சீவரக்க²ந்த⁴கங்
8. Cīvarakkhandhakaṃ
202. ஜீவகவத்து²கதா²
202. Jīvakavatthukathā
326. சீவரக்க²ந்த⁴கே பத³க்கி²ணஸத்³த³ஸ்ஸ அபஸப்³யத்த²ங் படிக்கி²பந்தோ ஆஹ ‘‘சே²கா குஸலா’’தி. அபி⁴ஸடாதி எத்த² ஸரதா⁴துயா க³திசிந்தாஸு இத⁴ க³த்யத்தே²தி த³ஸ்ஸெந்தோ ஆஹ ‘‘அபி⁴க³தா’’தி. அபி⁴க³தாதி அபி⁴முக²ங் க³ந்தப்³பா³. நனு பாளியங் ‘‘அத்தி²கானங் அத்தி²கானங் மனுஸ்ஸான’’ந்தி வுத்தங், கஸ்மா பன ‘‘அத்தி²கேஹி அத்தி²கேஹி மனுஸ்ஸேஹீ’’தி வுத்தந்தி ஆஹ ‘‘கரணத்தே² பனா’’திஆதி³. இமினா ச²ட்டீ²கத்தா நாம ததியாகத்துனா ஸமானோயேவாதி த³ஸ்ஸேதி. நிக³மே வஸதீதி நேக³மோதி வுத்தே குடும்பி³யக³ணோ நேக³மோ நாமாதி ஆஹ ‘‘குடும்பி³யக³ணோ’’தி.
326. Cīvarakkhandhake padakkhiṇasaddassa apasabyatthaṃ paṭikkhipanto āha ‘‘chekā kusalā’’ti. Abhisaṭāti ettha saradhātuyā gaticintāsu idha gatyattheti dassento āha ‘‘abhigatā’’ti. Abhigatāti abhimukhaṃ gantabbā. Nanu pāḷiyaṃ ‘‘atthikānaṃ atthikānaṃ manussāna’’nti vuttaṃ, kasmā pana ‘‘atthikehi atthikehi manussehī’’ti vuttanti āha ‘‘karaṇatthe panā’’tiādi. Iminā chaṭṭhīkattā nāma tatiyākattunā samānoyevāti dasseti. Nigame vasatīti negamoti vutte kuṭumbiyagaṇo negamo nāmāti āha ‘‘kuṭumbiyagaṇo’’ti.
327. நக³ரே நிவஸந்தீதி நாக³ரா. த³த்வா, வுட்டா²பேஸுந்தி ஸம்ப³ந்தோ⁴. ஆராமுய்யானவாஹனாதீ³தி எத்த² ஆதி³ஸத்³தே³ன அஞ்ஞானி உபபோ⁴க³பரிபோ⁴கா³னி ஸங்க³ண்ஹாதி. க³ணிகட்டா²னேதி க³ணிகாய டா²னே. க³ணிகாதி ச நக³ரஸோபி⁴னீ. ஸா ஹி அத்தி²கேன ஜனக³ணேன அபி⁴க³ந்தப்³பா³தி க³ணிகாதி வுச்சதி. படிஸதேன சாதி எத்த² சஸத்³தோ³ அவதா⁴ரணத்தோ². ரத்திங் க³மனஸ்ஸ படினிதி⁴ஸங்கா²தேன ஸதேன ஏவாதி ஹி அத்தோ². கி³லானந்தி எத்த² பா⁴வபச்சயேன வினாபி பா⁴வத்தோ² ஞாதப்³போ³தி ஆஹ ‘‘கி³லானபா⁴வ’’ந்தி. ‘‘ஜானாபெய்ய’’ந்தி இமினா படிவேதெ³ய்யந்தி எத்த² வித³தா⁴துயா ஞாணத்த²ங் த³ஸ்ஸேதி. கத்தரஸுப்பேதி எத்த² கத்தரஸத்³தோ³ ஜிண்ணபரியாயோதி ஆஹ ‘‘ஜிண்ணஸுப்பே’’தி. ஸுபந்தி ஸுனகா²த³யோ எத்தா²தி ஸுப்பங், கத்தரங் ஸுப்பங் கத்தரஸுப்பங்.
327. Nagare nivasantīti nāgarā. Datvā, vuṭṭhāpesunti sambandho. Ārāmuyyānavāhanādīti ettha ādisaddena aññāni upabhogaparibhogāni saṅgaṇhāti. Gaṇikaṭṭhāneti gaṇikāya ṭhāne. Gaṇikāti ca nagarasobhinī. Sā hi atthikena janagaṇena abhigantabbāti gaṇikāti vuccati. Paṭisatena cāti ettha casaddo avadhāraṇattho. Rattiṃ gamanassa paṭinidhisaṅkhātena satena evāti hi attho. Gilānanti ettha bhāvapaccayena vināpi bhāvattho ñātabboti āha ‘‘gilānabhāva’’nti. ‘‘Jānāpeyya’’nti iminā paṭivedeyyanti ettha vidadhātuyā ñāṇatthaṃ dasseti. Kattarasuppeti ettha kattarasaddo jiṇṇapariyāyoti āha ‘‘jiṇṇasuppe’’ti. Supanti sunakhādayo etthāti suppaṃ, kattaraṃ suppaṃ kattarasuppaṃ.
328. தந்தி ஜீவகங். அஞ்ஞே ராஜதா³ரகா வத³ந்தி கிராதி ஸம்ப³ந்தோ⁴. நத்தி² மாதா ஏதஸ்ஸாதி நிம்மாதிகோ. யதா² சாதிஆதீ³ஸு யதா² பேஸந்தி, ததா²தி யோஜனா. சஸத்³தோ³ ஸம்பிண்ட³னத்தோ². ந கேவலங் வத³ந்தியேவ, அத² கோ² ந கோசி கிஞ்சி பேஸேதீதி ஹி அத்தோ². அஞ்ஞேஸந்தி ஜீவகதோ அஞ்ஞேஸங். தஸ்ஸாதி ஜீவகஸ்ஸ. இதீதி ஏவங். ஸோதி ஜீவகோ. தங் ஸப்³ப³ந்தி ‘‘நிம்மாதிகோ நிப்பிதிகோ’’தி வத³னஞ்ச பண்ணாகாரஸ்ஸ அபேஸனஞ்சாதி தங் ஸப்³ப³ங்.
328.Tanti jīvakaṃ. Aññe rājadārakā vadanti kirāti sambandho. Natthi mātā etassāti nimmātiko. Yathā cātiādīsu yathā pesanti, tathāti yojanā. Casaddo sampiṇḍanattho. Na kevalaṃ vadantiyeva, atha kho na koci kiñci pesetīti hi attho. Aññesanti jīvakato aññesaṃ. Tassāti jīvakassa. Itīti evaṃ. Soti jīvako. Taṃ sabbanti ‘‘nimmātiko nippitiko’’ti vadanañca paṇṇākārassa apesanañcāti taṃ sabbaṃ.
யங்னூனாதி ஸாது⁴ வத. அஹங் வஜ்ஜஸிப்பங் ஸிக்கெ²ய்யங் ஸாது⁴ வதாதி யோஜனா. தஸ்ஸாதி ஜீவகஸ்ஸ. ஏதத³ஹோஸீதி ஏதங் அஹோஸி, பரிவிதக்கோ அஹூதி அத்தோ². பரூபகா⁴தபடிஸங்யுத்தானீதி பரங் உபக³ந்த்வா, உப பு⁴ஸேன வா ஹனநேன படிஸங்யுத்தானி. மெத்தாபுப்³ப³பா⁴க³ந்தி ஸிப்பஸ்ஸ புப்³ப³பா⁴கே³ பவத்தா மெத்தா ஏதஸ்ஸாதி மெத்தாபுப்³ப³பா⁴க³ங். இதி அஹோஸீதி யோஜனா. புரிமசிந்தாய அனேகந்தபா⁴வதோ ஏகந்தபா⁴வங் த³ஸ்ஸெந்தோ ஆஹ ‘‘அபி சா’’திஆதி³. அபி சாதி ஏகந்தேன. அயந்தி ஜீவகோ. இதோதி ப⁴த்³த³கப்பதோ. அயந்தி உபாஸகோ . சதுபரிஸந்தரேதி சதுபரிஸமஜ்ஜே². பத்த²தகு³ணந்தி பத்த²ரிதகு³ணங். டா²னந்தரந்தி டா²னபே⁴த³ங், அஹம்பீதி ந அயங் உபாஸகோயேவ, அஹம்பீதி அத்தோ². ப⁴க³வாதி ஆலபனபத³மேதங். பத்த²னந்தி இச்சி²தவரங். சோதி³யமானோபீதி உய்யோஜியமானோபி. பிஸத்³தே³ன புரிமசிந்தனமபெக்க²தி. ஏஸாதி ஏஸோ ஜீவகோ.
Yaṃnūnāti sādhu vata. Ahaṃ vajjasippaṃ sikkheyyaṃ sādhu vatāti yojanā. Tassāti jīvakassa. Etadahosīti etaṃ ahosi, parivitakko ahūti attho. Parūpaghātapaṭisaṃyuttānīti paraṃ upagantvā, upa bhusena vā hananena paṭisaṃyuttāni. Mettāpubbabhāganti sippassa pubbabhāge pavattā mettā etassāti mettāpubbabhāgaṃ. Iti ahosīti yojanā. Purimacintāya anekantabhāvato ekantabhāvaṃ dassento āha ‘‘api cā’’tiādi. Api cāti ekantena. Ayanti jīvako. Itoti bhaddakappato. Ayanti upāsako . Catuparisantareti catuparisamajjhe. Patthataguṇanti pattharitaguṇaṃ. Ṭhānantaranti ṭhānabhedaṃ, ahampīti na ayaṃ upāsakoyeva, ahampīti attho. Bhagavāti ālapanapadametaṃ. Patthananti icchitavaraṃ. Codiyamānopīti uyyojiyamānopi. Pisaddena purimacintanamapekkhati. Esāti eso jīvako.
329. தி³ஸாபாமொக்கோ²தி பத³ஸ்ஸ தி³ஸாஸு பாமொக்கோ² தி³ஸாபாமொக்கோ²தி வசனத்த²ங் த³ஸ்ஸெந்தோ ஆஹ ‘‘ஸப்³ப³தி³ஸாஸூ’’திஆதி³. தஸ்மிஞ்ச ஸமயேதி ஜீவகஸ்ஸ தஸ்மிங் சிந்தனஸமயே ச, ஆக³மங்ஸூதி ஸம்ப³ந்தோ⁴. தேதி வாணிஜே, புச்சீ²தி ஸம்ப³ந்தோ⁴. குதோதி நக³ரதோ. தக்கஸீலதோதி தக்கஸீலனக³ரதோ. தத்தா²தி தக்கஸீலே. ஆமாதி ஸம்படிச்ச²னத்தே² நிபாதோ, ஆம அத்தீ²தி ஹி அத்தோ². தேதி வாணிஜா. ததா²தி யதா² ஜீவகோ ஆஹ, ததா² அகங்ஸூதி அத்தோ². ஸோதி ஜீவகோ. பிதரந்தி அப⁴யராஜகுமாரங். தேஹீதி வாணிஜேஹி.
329.Disāpāmokkhoti padassa disāsu pāmokkho disāpāmokkhoti vacanatthaṃ dassento āha ‘‘sabbadisāsū’’tiādi. Tasmiñca samayeti jīvakassa tasmiṃ cintanasamaye ca, āgamaṃsūti sambandho. Teti vāṇije, pucchīti sambandho. Kutoti nagarato. Takkasīlatoti takkasīlanagarato. Tatthāti takkasīle. Āmāti sampaṭicchanatthe nipāto, āma atthīti hi attho. Teti vāṇijā. Tathāti yathā jīvako āha, tathā akaṃsūti attho. Soti jīvako. Pitaranti abhayarājakumāraṃ. Tehīti vāṇijehi.
தந்தி ஜீவகங், புச்சீ²தி ஸம்ப³ந்தோ⁴. ஸோதி ஜீவகோ. கஸ்மா தாத த்வங் இதா⁴க³தோ அஸி பனாதி புச்சீ²தி யோஜனா. ததோதி புச்ச²தோ. ஸோதி ஜீவகோ. ஸிக்கி²துங் ஆக³தோ அம்ஹீதி யோஜனா. ப³ஹுஞ்ச க³ண்ஹாதீதிஆதீ³ஸு ஸோ கிஞ்சி கம்மங் அகத்வா ஸிப்பஸ்ஸேவ ஸிக்கி²தத்தா ப³ஹுஞ்ச க³ண்ஹாதீதி ஆஹ ‘‘யதா²’’திஆதி³. தத்த² யதா² ஸிக்க²ந்தியேவ, ஏவங் ததா² ஸோ ந ஸிக்க²தீதி யோஜனா. ஸோ பனாதி ஜீவகோ பன, கரோதி ஸிக்க²தீதி ஸம்ப³ந்தோ⁴. ஏகங் காலந்தி ஏகஸ்மிங் காலே. ஏவங் ஸந்தே கஸ்மா ஸோ ப³ஹுஞ்ச க³ண்ஹாதீதி ஆஹ ‘‘ஏவங் ஸந்தேபீ’’திஆதி³. மேதா⁴விதாயாதி கி²ப்பங் க³ஹணதா⁴ரணபஞ்ஞதாய, ப³ஹுஞ்ச ஸிப்பந்தி ஸம்ப³ந்தோ⁴. அஸ்ஸ ஜீவகஸ்ஸ க³ஹிதஞ்ச ஸிப்பங் ந ஸம்முஸ்ஸதீதி யோஜனா.
Tanti jīvakaṃ, pucchīti sambandho. Soti jīvako. Kasmā tāta tvaṃ idhāgato asi panāti pucchīti yojanā. Tatoti pucchato. Soti jīvako. Sikkhituṃ āgato amhīti yojanā. Bahuñca gaṇhātītiādīsu so kiñci kammaṃ akatvā sippasseva sikkhitattā bahuñca gaṇhātīti āha ‘‘yathā’’tiādi. Tattha yathā sikkhantiyeva, evaṃ tathā so na sikkhatīti yojanā. So panāti jīvako pana, karoti sikkhatīti sambandho. Ekaṃ kālanti ekasmiṃ kāle. Evaṃ sante kasmā so bahuñca gaṇhātīti āha ‘‘evaṃ santepī’’tiādi. Medhāvitāyāti khippaṃ gahaṇadhāraṇapaññatāya, bahuñca sippanti sambandho. Assa jīvakassa gahitañca sippaṃ na sammussatīti yojanā.
யத்தகங் ஸிப்பங் ஆசரியோ ஜானாதி, தத்தகங் அயங் ஜீவகோ ஜானாதீதி யோஜனா. யந்தி ஸிப்பங். அயந்தி ஜீவகோ, ப⁴விஸ்ஸதீதி ஸம்ப³ந்தோ⁴. நந்தி ஜீவகங். யதா²தி யேனாகாரேன. கம்மவிபாகந்தி கம்மவிபாகஜங் ரோக³ங். ‘‘ந’’ந்தி பத³ங் ‘‘ஸிக்கா²பேஸீ’’தி பதே³ காரிதகம்மங், ‘‘பே⁴ஸஜ்ஜயோஜன’’ந்தி பத³ங் தா⁴துகம்மங். பே⁴ஸஜ்ஜயோஜனந்தி பே⁴ஸஜ்ஜேன ரோக³ஸ்ஸ யோஜனங். ஸோ பனாதி ஜீவகோ பன. இமினாதி ஜீவகேன ந உக்³க³ஹிதங், உக்³க³ஹிதந்தி ஸம்ப³ந்தோ⁴. ஏகேன த்³வாரேனாதி சதூஸு த்³வாரேஸு ஏகேன த்³வாரேன. ஆஹிண்ட³ந்தோதி விசரந்தோ. பரித்தங் பாதெ²ய்யந்தி எத்த² பரித்தஸத்³த³ஸ்ஸ ஆரக்க²னத்தே²பி பவத்தனதோ இத⁴ அப்பத்தே² பவத்ததீதி த³ஸ்ஸெந்தோ ஆஹ ‘‘அப்பமத்தக’’ந்தி. கஸ்மா அப்பமத்தகங் பாதெ²ய்யங் அதா³ஸீதி யோஜனா. தஸ்ஸாதி தி³ஸாபாமொக்க²ஸ்ஸ. அயந்தி ஜீவகோ, லபி⁴ஸ்ஸதீதி ஸம்ப³ந்தோ⁴. ததோதி லப⁴னதோ. கீ²ணே பாதெ²ய்யேதி பாதெ²ய்யே கீ²ணே ஸதீதி யோஜனா.
Yattakaṃ sippaṃ ācariyo jānāti, tattakaṃ ayaṃ jīvako jānātīti yojanā. Yanti sippaṃ. Ayanti jīvako, bhavissatīti sambandho. Nanti jīvakaṃ. Yathāti yenākārena. Kammavipākanti kammavipākajaṃ rogaṃ. ‘‘Na’’nti padaṃ ‘‘sikkhāpesī’’ti pade kāritakammaṃ, ‘‘bhesajjayojana’’nti padaṃ dhātukammaṃ. Bhesajjayojananti bhesajjena rogassa yojanaṃ. So panāti jīvako pana. Imināti jīvakena na uggahitaṃ, uggahitanti sambandho. Ekena dvārenāti catūsu dvāresu ekena dvārena. Āhiṇḍantoti vicaranto. Parittaṃ pātheyyanti ettha parittasaddassa ārakkhanatthepi pavattanato idha appatthe pavattatīti dassento āha ‘‘appamattaka’’nti. Kasmā appamattakaṃ pātheyyaṃ adāsīti yojanā. Tassāti disāpāmokkhassa. Ayanti jīvako, labhissatīti sambandho. Tatoti labhanato. Khīṇe pātheyyeti pātheyye khīṇe satīti yojanā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 202. ஜீவகவத்து² • 202. Jīvakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஜீவகவத்து²கதா² • Jīvakavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஜீவகவத்து²கதா²வண்ணனா • Jīvakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஜீவகவத்து²கதா²வண்ணனா • Jīvakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஜீவகவத்து²கதா²தி³வண்ணனா • Jīvakavatthukathādivaṇṇanā
