| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၂. ဒ္ဝာဒသမဝဂ္ဂော
12. Dvādasamavaggo
(၁၂၃) ၈. ဇီဝိတာ ဝောရောပနကထာ
(123) 8. Jīvitā voropanakathā
၆၄၈. ဒိဋ္ဌိသမ္ပန္နော ပုဂ္ဂလော သဉ္စိစ္စ ပာဏံ ဇီဝိတာ ဝောရောပေယ္ယာတိ? အာမန္တာ။ ဒိဋ္ဌိသမ္ပန္နော ပုဂ္ဂလော သဉ္စိစ္စ မာတရံ ဇီဝိတာ ဝောရောပေယ္ယ။ပေ.။ ပိတရံ ဇီဝိတာ ဝောရောပေယ္ယ ။ပေ.။ အရဟန္တံ ဇီဝိတာ ဝောရောပေယ္ယ။ပေ.။ ဒုဋ္ဌေန စိတ္တေန တထာဂတသ္သ လောဟိတံ ဥပ္ပာဒေယ္ယ။ပေ.။ သင္ဃံ ဘိန္ဒေယ္ယာတိ? န ဟေဝံ ဝတ္တဗ္ဗေ။ပေ.။။
648. Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo sañcicca mātaraṃ jīvitā voropeyya…pe… pitaraṃ jīvitā voropeyya …pe… arahantaṃ jīvitā voropeyya…pe… duṭṭhena cittena tathāgatassa lohitaṃ uppādeyya…pe… saṅghaṃ bhindeyyāti? Na hevaṃ vattabbe…pe….
ဒိဋ္ဌိသမ္ပန္နော ပုဂ္ဂလော သဉ္စိစ္စ ပာဏံ ဇီဝိတာ ဝောရောပေယ္ယာတိ? အာမန္တာ။ ဒိဋ္ဌိသမ္ပန္နော ပုဂ္ဂလော သတ္ထရိ အဂာရဝောတိ? န ဟေဝံ ဝတ္တဗ္ဗေ။ပေ.။ ဓမ္မေ။ပေ.။ သင္ဃေ။ပေ.။ သိက္ခာယ အဂာရဝောတိ? န ဟေဝံ ဝတ္တဗ္ဗေ။ပေ.။။
Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo satthari agāravoti? Na hevaṃ vattabbe…pe… dhamme…pe… saṅghe…pe… sikkhāya agāravoti? Na hevaṃ vattabbe…pe….
နနု ဒိဋ္ဌိသမ္ပန္နော ပုဂ္ဂလော သတ္ထရိ သဂာရဝောတိ? အာမန္တာ။ ဟဉ္စိ ဒိဋ္ဌိသမ္ပန္နော ပုဂ္ဂလော သတ္ထရိ သဂာရဝော, နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နော ပုဂ္ဂလော သဉ္စိစ္စ ပာဏံ ဇီဝိတာ ဝောရောပေယ္ယာ’’တိ။ နနု ဒိဋ္ဌိသမ္ပန္နော ပုဂ္ဂလော ဓမ္မေ။ပေ.။ သင္ဃေ။ပေ.။ သိက္ခာယ သဂာရဝောတိ? အာမန္တာ။ ဟဉ္စိ ဒိဋ္ဌိသမ္ပန္နော ပုဂ္ဂလော သိက္ခာယ သဂာရဝော, နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နော ပုဂ္ဂလော သဉ္စိစ္စ ပာဏံ ဇီဝိတာ ဝောရောပေယ္ယာ’’တိ။
Nanu diṭṭhisampanno puggalo satthari sagāravoti? Āmantā. Hañci diṭṭhisampanno puggalo satthari sagāravo, no ca vata re vattabbe – ‘‘diṭṭhisampanno puggalo sañcicca pāṇaṃ jīvitā voropeyyā’’ti. Nanu diṭṭhisampanno puggalo dhamme…pe… saṅghe…pe… sikkhāya sagāravoti? Āmantā. Hañci diṭṭhisampanno puggalo sikkhāya sagāravo, no ca vata re vattabbe – ‘‘diṭṭhisampanno puggalo sañcicca pāṇaṃ jīvitā voropeyyā’’ti.
၆၄၉. ဒိဋ္ဌိသမ္ပန္နော ပုဂ္ဂလော သတ္ထရိ အဂာရဝောတိ? အာမန္တာ။ ဒိဋ္ဌိသမ္ပန္နော ပုဂ္ဂလော ဗုဒ္ဓထူပေ ဩဟဒေယ္ယ ဩမုတ္တေယ္ယ နိဋ္ဌုဘေယ္ယ ဗုဒ္ဓထူပေ အပဗ္ယာမတော 1 ကရေယ္ယာတိ? န ဟေဝံ ဝတ္တဗ္ဗေ။ပေ.။။
649. Diṭṭhisampanno puggalo satthari agāravoti? Āmantā. Diṭṭhisampanno puggalo buddhathūpe ohadeyya omutteyya niṭṭhubheyya buddhathūpe apabyāmato 2 kareyyāti? Na hevaṃ vattabbe…pe….
ဒိဋ္ဌိသမ္ပန္နော ပုဂ္ဂလော သဉ္စိစ္စ ပာဏံ ဇီဝိတာ ဝောရောပေယ္ယာတိ? အာမန္တာ။ နနု ဝုတ္တံ ဘဂဝတာ – ‘‘သေယ္ယထာပိ, ဘိက္ခဝေ, မဟာသမုဒ္ဒော ဌိတဓမ္မော ဝေလံ နာတိဝတ္တတိ; ဧဝမေဝ ခော, ဘိက္ခဝေ, ယံ မယာ သာဝကာနံ သိက္ခာပဒံ ပညတ္တံ တံ မမ သာဝကာ ဇီဝိတဟေတုပိ နာတိက္ကမန္တီ’’တိ 3! အတ္ထေဝ သုတ္တန္တောတိ? အာမန္တာ ။ တေန ဟိ န ဝတ္တဗ္ဗံ – ‘‘ဒိဋ္ဌိသမ္ပန္နော ပုဂ္ဂလော သဉ္စိစ္စ ပာဏံ ဇီဝိတာ ဝောရောပေယ္ယာ’’တိ။
Diṭṭhisampanno puggalo sañcicca pāṇaṃ jīvitā voropeyyāti? Āmantā. Nanu vuttaṃ bhagavatā – ‘‘seyyathāpi, bhikkhave, mahāsamuddo ṭhitadhammo velaṃ nātivattati; evameva kho, bhikkhave, yaṃ mayā sāvakānaṃ sikkhāpadaṃ paññattaṃ taṃ mama sāvakā jīvitahetupi nātikkamantī’’ti 4! Attheva suttantoti? Āmantā . Tena hi na vattabbaṃ – ‘‘diṭṭhisampanno puggalo sañcicca pāṇaṃ jīvitā voropeyyā’’ti.
ဇီဝိတာ ဝောရောပနကထာ နိဋ္ဌိတာ။
Jīvitā voropanakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. ဇီဝိတာဝောရောပနကထာဝဏ္ဏနာ • 8. Jīvitāvoropanakathāvaṇṇanā
