| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
12. ද්‌වාදසමවග්‌ගො
12. Dvādasamavaggo
(123) 8. ජීවිතා වොරොපනකථා
(123) 8. Jīvitā voropanakathā
648. දිට්‌ඨිසම්‌පන්‌නො පුග්‌ගලො සඤ්‌චිච්‌ච පාණං ජීවිතා වොරොපෙය්‍යාති? ආමන්‌තා. දිට්‌ඨිසම්‌පන්‌නො පුග්‌ගලො සඤ්‌චිච්‌ච මාතරං ජීවිතා වොරොපෙය්‍ය…පෙ.… පිතරං ජීවිතා වොරොපෙය්‍ය …පෙ.… අරහන්‌තං ජීවිතා වොරොපෙය්‍ය…පෙ.… දුට්‌ඨෙන චිත්‌තෙන තථාගතස්‌ස ලොහිතං උප්‌පාදෙය්‍ය…පෙ.… සඞ්‌ඝං භින්‌දෙය්‍යාති? න හෙවං වත්‌තබ්‌බෙ…පෙ.….
648. Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo sañcicca mātaraṃ jīvitā voropeyya…pe… pitaraṃ jīvitā voropeyya …pe… arahantaṃ jīvitā voropeyya…pe… duṭṭhena cittena tathāgatassa lohitaṃ uppādeyya…pe… saṅghaṃ bhindeyyāti? Na hevaṃ vattabbe…pe….
දිට්‌ඨිසම්‌පන්‌නො පුග්‌ගලො සඤ්‌චිච්‌ච පාණං ජීවිතා වොරොපෙය්‍යාති? ආමන්‌තා. දිට්‌ඨිසම්‌පන්‌නො පුග්‌ගලො සත්‌ථරි අගාරවොති? න හෙවං වත්‌තබ්‌බෙ…පෙ.… ධම්‌මෙ…පෙ.… සඞ්‌ඝෙ…පෙ.… සික්‌ඛාය අගාරවොති? න හෙවං වත්‌තබ්‌බෙ…පෙ.….
Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo satthari agāravoti? Na hevaṃ vattabbe…pe… dhamme…pe… saṅghe…pe… sikkhāya agāravoti? Na hevaṃ vattabbe…pe….
නනු දිට්‌ඨිසම්‌පන්‌නො පුග්‌ගලො සත්‌ථරි සගාරවොති? ආමන්‌තා. හඤ්‌චි දිට්‌ඨිසම්‌පන්‌නො පුග්‌ගලො සත්‌ථරි සගාරවො, නො ච වත රෙ වත්‌තබ්‌බෙ – ‘‘දිට්‌ඨිසම්‌පන්‌නො පුග්‌ගලො සඤ්‌චිච්‌ච පාණං ජීවිතා වොරොපෙය්‍යා’’ති. නනු දිට්‌ඨිසම්‌පන්‌නො පුග්‌ගලො ධම්‌මෙ…පෙ.… සඞ්‌ඝෙ…පෙ.… සික්‌ඛාය සගාරවොති? ආමන්‌තා. හඤ්‌චි දිට්‌ඨිසම්‌පන්‌නො පුග්‌ගලො සික්‌ඛාය සගාරවො, නො ච වත රෙ වත්‌තබ්‌බෙ – ‘‘දිට්‌ඨිසම්‌පන්‌නො පුග්‌ගලො සඤ්‌චිච්‌ච පාණං ජීවිතා වොරොපෙය්‍යා’’ති.
Nanu diṭṭhisampanno puggalo satthari sagāravoti? Āmantā. Hañci diṭṭhisampanno puggalo satthari sagāravo, no ca vata re vattabbe – ‘‘diṭṭhisampanno puggalo sañcicca pāṇaṃ jīvitā voropeyyā’’ti. Nanu diṭṭhisampanno puggalo dhamme…pe… saṅghe…pe… sikkhāya sagāravoti? Āmantā. Hañci diṭṭhisampanno puggalo sikkhāya sagāravo, no ca vata re vattabbe – ‘‘diṭṭhisampanno puggalo sañcicca pāṇaṃ jīvitā voropeyyā’’ti.
649. දිට්‌ඨිසම්‌පන්‌නො පුග්‌ගලො සත්‌ථරි අගාරවොති? ආමන්‌තා. දිට්‌ඨිසම්‌පන්‌නො පුග්‌ගලො බුද්‌ධථූපෙ ඔහදෙය්‍ය ඔමුත්‌තෙය්‍ය නිට්‌ඨුභෙය්‍ය බුද්‌ධථූපෙ අපබ්‍යාමතො 1 කරෙය්‍යාති? න හෙවං වත්‌තබ්‌බෙ…පෙ.….
649. Diṭṭhisampanno puggalo satthari agāravoti? Āmantā. Diṭṭhisampanno puggalo buddhathūpe ohadeyya omutteyya niṭṭhubheyya buddhathūpe apabyāmato 2 kareyyāti? Na hevaṃ vattabbe…pe….
දිට්‌ඨිසම්‌පන්‌නො පුග්‌ගලො සඤ්‌චිච්‌ච පාණං ජීවිතා වොරොපෙය්‍යාති? ආමන්‌තා. නනු වුත්‌තං භගවතා – ‘‘සෙය්‍යථාපි, භික්‌ඛවෙ, මහාසමුද්‌දො ඨිතධම්‌මො වෙලං නාතිවත්‌තති; එවමෙව ඛො, භික්‌ඛවෙ, යං මයා සාවකානං සික්‌ඛාපදං පඤ්‌ඤත්‌තං තං මම සාවකා ජීවිතහෙතුපි නාතික්‌කමන්‌තී’’ති 3! අත්‌ථෙව සුත්‌තන්‌තොති? ආමන්‌තා . තෙන හි න වත්‌තබ්‌බං – ‘‘දිට්‌ඨිසම්‌පන්‌නො පුග්‌ගලො සඤ්‌චිච්‌ච පාණං ජීවිතා වොරොපෙය්‍යා’’ති.
Diṭṭhisampanno puggalo sañcicca pāṇaṃ jīvitā voropeyyāti? Āmantā. Nanu vuttaṃ bhagavatā – ‘‘seyyathāpi, bhikkhave, mahāsamuddo ṭhitadhammo velaṃ nātivattati; evameva kho, bhikkhave, yaṃ mayā sāvakānaṃ sikkhāpadaṃ paññattaṃ taṃ mama sāvakā jīvitahetupi nātikkamantī’’ti 4! Attheva suttantoti? Āmantā . Tena hi na vattabbaṃ – ‘‘diṭṭhisampanno puggalo sañcicca pāṇaṃ jīvitā voropeyyā’’ti.
ජීවිතා වොරොපනකථා නිට්‌ඨිතා.
Jīvitā voropanakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 8. ජීවිතාවොරොපනකථාවණ්‌ණනා • 8. Jīvitāvoropanakathāvaṇṇanā
