| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৮. জীৰিতাৰোরোপনকথাৰণ্ণনা
8. Jīvitāvoropanakathāvaṇṇanā
৬৪৮-৬৪৯. ইদানি জীৰিতাৰোরোপনকথা নাম হোতি। তত্থ যস্মা দোসসম্পযুত্তেন চিত্তেন পাণাতিপাতো হোতি, দোসো চ দিট্ঠিসম্পন্নস্স অপ্পহীনো, তস্মা ‘‘দিট্ঠিসম্পন্নো সঞ্চিচ্চ পাণং জীৰিতা ৰোরোপেয্যা’’তি যেসং লদ্ধি, সেয্যথাপি পুব্বসেলিযাপরসেলিযানং; তে সন্ধায দিট্ঠিসম্পন্নোতি পুচ্ছা সকৰাদিস্স, পটিঞ্ঞা ইতরস্স। সঞ্চিচ্চ মাতরন্তিআদিপঞ্হেসু পন ‘‘অট্ঠানমেতং অনৰকাসো’’তি সুত্তভযেন পটিক্খিপতি। সত্থরি অগারৰোতিআদি সত্থারাদীসু সগারৰস্স সিক্খাপদস্স ৰীতিক্কমাভাৰদস্সনত্থং ৰুত্তং। ইতরো পন অকুসলৰসেন তস্স অগারৰো নাম নত্থীতি পটিক্খিপিত্ৰা সগারৰভাৰঞ্চ সম্পটিচ্ছিত্ৰা পুন অগারৰোতি পুট্ঠো তেসু তেসু কিচ্চেসু পসুততায ৰিক্খিত্তানং অসতিযা অমনসিকারেন চেতিযে অভিৰাদনপদক্খিণকরণাভাৰং সন্ধায পটিজানাতি। পুন ওহদেয্যাতিআদিনা নযেন পুট্ঠো তাদিসায কিরিযায সঞ্চিচ্চ অকরণতো পটিক্খিপতি। সেসমেত্থ উত্তানত্থমেৰাতি।
648-649. Idāni jīvitāvoropanakathā nāma hoti. Tattha yasmā dosasampayuttena cittena pāṇātipāto hoti, doso ca diṭṭhisampannassa appahīno, tasmā ‘‘diṭṭhisampanno sañcicca pāṇaṃ jīvitā voropeyyā’’ti yesaṃ laddhi, seyyathāpi pubbaseliyāparaseliyānaṃ; te sandhāya diṭṭhisampannoti pucchā sakavādissa, paṭiññā itarassa. Sañcicca mātarantiādipañhesu pana ‘‘aṭṭhānametaṃ anavakāso’’ti suttabhayena paṭikkhipati. Satthari agāravotiādi satthārādīsu sagāravassa sikkhāpadassa vītikkamābhāvadassanatthaṃ vuttaṃ. Itaro pana akusalavasena tassa agāravo nāma natthīti paṭikkhipitvā sagāravabhāvañca sampaṭicchitvā puna agāravoti puṭṭho tesu tesu kiccesu pasutatāya vikkhittānaṃ asatiyā amanasikārena cetiye abhivādanapadakkhiṇakaraṇābhāvaṃ sandhāya paṭijānāti. Puna ohadeyyātiādinā nayena puṭṭho tādisāya kiriyāya sañcicca akaraṇato paṭikkhipati. Sesamettha uttānatthamevāti.
জীৰিতাৰোরোপনকথাৰণ্ণনা।
Jīvitāvoropanakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১২৩) ৮. জীৰিতা ৰোরোপনকথা • (123) 8. Jīvitā voropanakathā
