| Library / Tipiṭaka / ติปิฎก • Tipiṭaka / ปญฺจปกรณ-อฎฺฐกถา • Pañcapakaraṇa-aṭṭhakathā |
๘. ชีวิตาโวโรปนกถาวณฺณนา
8. Jīvitāvoropanakathāvaṇṇanā
๖๔๘-๖๔๙. อิทานิ ชีวิตาโวโรปนกถา นาม โหติฯ ตตฺถ ยสฺมา โทสสมฺปยุเตฺตน จิเตฺตน ปาณาติปาโต โหติ, โทโส จ ทิฎฺฐิสมฺปนฺนสฺส อปฺปหีโน, ตสฺมา ‘‘ทิฎฺฐิสมฺปโนฺน สญฺจิจฺจ ปาณํ ชีวิตา โวโรเปยฺยา’’ติ เยสํ ลทฺธิ, เสยฺยถาปิ ปุพฺพเสลิยาปรเสลิยานํ; เต สนฺธาย ทิฎฺฐิสมฺปโนฺนติ ปุจฺฉา สกวาทิสฺส, ปฎิญฺญา อิตรสฺสฯ สญฺจิจฺจ มาตรนฺติอาทิปเญฺหสุ ปน ‘‘อฎฺฐานเมตํ อนวกาโส’’ติ สุตฺตภเยน ปฎิกฺขิปติฯ สตฺถริ อคารโวติอาทิ สตฺถาราทีสุ สคารวสฺส สิกฺขาปทสฺส วีติกฺกมาภาวทสฺสนตฺถํ วุตฺตํฯ อิตโร ปน อกุสลวเสน ตสฺส อคารโว นาม นตฺถีติ ปฎิกฺขิปิตฺวา สคารวภาวญฺจ สมฺปฎิจฺฉิตฺวา ปุน อคารโวติ ปุโฎฺฐ เตสุ เตสุ กิเจฺจสุ ปสุตตาย วิกฺขิตฺตานํ อสติยา อมนสิกาเรน เจติเย อภิวาทนปทกฺขิณกรณาภาวํ สนฺธาย ปฎิชานาติฯ ปุน โอหเทยฺยาติอาทินา นเยน ปุโฎฺฐ ตาทิสาย กิริยาย สญฺจิจฺจ อกรณโต ปฎิกฺขิปติฯ เสสเมตฺถ อุตฺตานตฺถเมวาติฯ
648-649. Idāni jīvitāvoropanakathā nāma hoti. Tattha yasmā dosasampayuttena cittena pāṇātipāto hoti, doso ca diṭṭhisampannassa appahīno, tasmā ‘‘diṭṭhisampanno sañcicca pāṇaṃ jīvitā voropeyyā’’ti yesaṃ laddhi, seyyathāpi pubbaseliyāparaseliyānaṃ; te sandhāya diṭṭhisampannoti pucchā sakavādissa, paṭiññā itarassa. Sañcicca mātarantiādipañhesu pana ‘‘aṭṭhānametaṃ anavakāso’’ti suttabhayena paṭikkhipati. Satthari agāravotiādi satthārādīsu sagāravassa sikkhāpadassa vītikkamābhāvadassanatthaṃ vuttaṃ. Itaro pana akusalavasena tassa agāravo nāma natthīti paṭikkhipitvā sagāravabhāvañca sampaṭicchitvā puna agāravoti puṭṭho tesu tesu kiccesu pasutatāya vikkhittānaṃ asatiyā amanasikārena cetiye abhivādanapadakkhiṇakaraṇābhāvaṃ sandhāya paṭijānāti. Puna ohadeyyātiādinā nayena puṭṭho tādisāya kiriyāya sañcicca akaraṇato paṭikkhipati. Sesamettha uttānatthamevāti.
ชีวิตาโวโรปนกถาวณฺณนาฯ
Jīvitāvoropanakathāvaṇṇanā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / กถาวตฺถุปาฬิ • Kathāvatthupāḷi / (๑๒๓) ๘. ชีวิตา โวโรปนกถา • (123) 8. Jīvitā voropanakathā
