| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১০. জীৰিতিন্দ্রিযকথাৰণ্ণনা
10. Jīvitindriyakathāvaṇṇanā
৫৪০. ইদানি জীৰিতিন্দ্রিযকথা নাম হোতি। তত্থ যেসং জীৰিতিন্দ্রিযং নাম চিত্তৰিপ্পযুত্তো অরূপধম্মো, তস্মা রূপজীৰিতিন্দ্রিযং নত্থীতি লদ্ধি, সেয্যথাপি পুব্বসেলিযানঞ্চেৰ সম্মিতিযানঞ্চ; তে সন্ধায পুচ্ছা সকৰাদিস্স, পটিঞ্ঞা ইতরস্স। নত্থি রূপীনং ধম্মানং আযূতি পঞ্হে উপাদিন্নরূপানম্পি তিণকট্ঠাদীনম্পি সন্তানৰসেন পৰত্তিমেৰ আযু ঠিতি যপনা যাপনা ইরিযনা ৰত্তনা পালনাতি ইচ্ছতি, তস্মা পটিক্খিপতি। অত্থীতি পঞ্হেপি ইমিনা কারণেন পটিজানাতি। অত্থি অরূপজীৰিতিন্দ্রিযন্তি পঞ্হে অরূপধম্মানং চিত্তৰিপ্পযুত্তং জীৰিতিন্দ্রিযসন্তানং নাম অত্থীতি ইচ্ছতি, তস্মা পটিজানাতি।
540. Idāni jīvitindriyakathā nāma hoti. Tattha yesaṃ jīvitindriyaṃ nāma cittavippayutto arūpadhammo, tasmā rūpajīvitindriyaṃ natthīti laddhi, seyyathāpi pubbaseliyānañceva sammitiyānañca; te sandhāya pucchā sakavādissa, paṭiññā itarassa. Natthi rūpīnaṃ dhammānaṃ āyūti pañhe upādinnarūpānampi tiṇakaṭṭhādīnampi santānavasena pavattimeva āyu ṭhiti yapanā yāpanā iriyanā vattanā pālanāti icchati, tasmā paṭikkhipati. Atthīti pañhepi iminā kāraṇena paṭijānāti. Atthi arūpajīvitindriyanti pañhe arūpadhammānaṃ cittavippayuttaṃ jīvitindriyasantānaṃ nāma atthīti icchati, tasmā paṭijānāti.
৫৪১. রূপীনং ধম্মানং আযু অরূপজীৰিতিন্দ্রিযন্তি পঞ্হে সত্তসন্তানে রূপিনো ৰা হোন্তু অরূপিনো ৰা, সব্বেসং চিত্তৰিপ্পযুত্তং অরূপজীৰিতিন্দ্রিযমেৰ ইচ্ছতি, তস্মা পটিজানাতি।
541. Rūpīnaṃ dhammānaṃ āyu arūpajīvitindriyanti pañhe sattasantāne rūpino vā hontu arūpino vā, sabbesaṃ cittavippayuttaṃ arūpajīvitindriyameva icchati, tasmā paṭijānāti.
৫৪২. নিরোধসমাপন্নপঞ্হেসুপি চিত্তৰিপ্পযুত্তং অরূপজীৰিতমেৰ সন্ধায পটিক্খিপতি চ পটিজানাতি চ। সকৰাদী পন তং অসম্পটিচ্ছন্তো যং অরূপপৰত্তে অসতি অত্থি, রূপেন তেন ভৰিতব্বন্তি চোদেতুং হঞ্চীতিআদিমাহ। সঙ্খারক্খন্ধপঞ্হে ফস্সাদিসঙ্খারক্খন্ধং সন্ধায পটিক্খিপতি, কাযকম্মাদিসঙ্খারক্খন্ধং সন্ধায পটিজানাতি। কাযৰিঞ্ঞত্তি ৰচীৰিঞ্ঞত্তি সম্মাৰাচা সম্মাকম্মন্তো জীৰিতিন্দ্রিযন্তি এৰমাদযোপি ধম্মা সঙ্খারক্খন্ধপরিযাপন্নাতিস্স লদ্ধি। সকৰাদী পন তং অসম্পটিচ্ছন্তো যদি নিরুদ্ধেপি অরূপপৰত্তে সঙ্খারক্খন্ধো অত্থি, চতুন্নম্পি খন্ধানং অত্থিতা হোতূতি চোদেতুং অত্থি ৰেদনাক্খন্ধোতি আদিমাহ। ইতরো অন্তোসমাপত্তিং সন্ধায পটিক্খিপতি, সমাপজ্জন্তস্স চ ৰুট্ঠহন্তস্স চ পুব্বাপরভাগং সন্ধায পটিজানাতি।
542. Nirodhasamāpannapañhesupi cittavippayuttaṃ arūpajīvitameva sandhāya paṭikkhipati ca paṭijānāti ca. Sakavādī pana taṃ asampaṭicchanto yaṃ arūpapavatte asati atthi, rūpena tena bhavitabbanti codetuṃ hañcītiādimāha. Saṅkhārakkhandhapañhe phassādisaṅkhārakkhandhaṃ sandhāya paṭikkhipati, kāyakammādisaṅkhārakkhandhaṃ sandhāya paṭijānāti. Kāyaviññatti vacīviññatti sammāvācā sammākammanto jīvitindriyanti evamādayopi dhammā saṅkhārakkhandhapariyāpannātissa laddhi. Sakavādī pana taṃ asampaṭicchanto yadi niruddhepi arūpapavatte saṅkhārakkhandho atthi, catunnampi khandhānaṃ atthitā hotūti codetuṃ atthi vedanākkhandhoti ādimāha. Itaro antosamāpattiṃ sandhāya paṭikkhipati, samāpajjantassa ca vuṭṭhahantassa ca pubbāparabhāgaṃ sandhāya paṭijānāti.
৫৪৩. অসঞ্ঞসত্তৰারেপি এসেৰ নযো। তস্স হি লদ্ধিযা অসঞ্ঞসত্তানং পটিসন্ধিকালে চিত্তং উপ্পজ্জিত্ৰা নিরুজ্ঝতি, তেন সহ চিত্তৰিপ্পযুত্তঅরূপজীৰিতিন্দ্রিযং উপ্পজ্জিত্ৰা যাৰতাযুকং পৰত্ততি। তস্মা তেসং জীৰিতিন্দ্রিযং নত্থীতি পুট্ঠো পটিক্খিপতি, অত্থীতি পুট্ঠো পটিজানাতি। ৰেদনাক্খন্ধাদযোপি তেসং পৰত্তিৰসেন পটিক্খিপতি, চুতিপটিসন্ধিৰসেন পটিজানাতি। সকৰাদী পন তং অনিচ্ছন্তো ‘‘সচে তত্থ একক্খণেপি ৰেদনাদযো অত্থি, পঞ্চৰোকারভৰত্তং পাপুণাতী’’তি চোদেতুং পঞ্চৰোকারভৰোতি আহ। ইতরো সুত্তৰিরোধভযা পটিক্খিপতি।
543. Asaññasattavārepi eseva nayo. Tassa hi laddhiyā asaññasattānaṃ paṭisandhikāle cittaṃ uppajjitvā nirujjhati, tena saha cittavippayuttaarūpajīvitindriyaṃ uppajjitvā yāvatāyukaṃ pavattati. Tasmā tesaṃ jīvitindriyaṃ natthīti puṭṭho paṭikkhipati, atthīti puṭṭho paṭijānāti. Vedanākkhandhādayopi tesaṃ pavattivasena paṭikkhipati, cutipaṭisandhivasena paṭijānāti. Sakavādī pana taṃ anicchanto ‘‘sace tattha ekakkhaṇepi vedanādayo atthi, pañcavokārabhavattaṃ pāpuṇātī’’ti codetuṃ pañcavokārabhavoti āha. Itaro suttavirodhabhayā paṭikkhipati.
৫৪৪-৫৪৫. একদেসং ভিজ্জতীতি পঞ্হে সম্পযুত্তং ভিজ্জতি, ৰিপ্পযুত্তং তিট্ঠতীতি তস্স লদ্ধি, তস্মা পটিজানাতি। দ্ৰে জীৰিতিন্দ্রিযানীতি পুচ্ছা পরৰাদিস্স, পটিঞ্ঞা সকৰাদিস্স। রূপারূপৰসেন হি দ্ৰে জীৰিতিন্দ্রিযানি, তেহিযেৰ সত্তো জীৰতি, তেসং ভঙ্গেন মরতীতি ৰুচ্চতি। চুতিক্খণস্মিঞ্হি দ্ৰেপি জীৰিতানি সহেৰ ভিজ্জন্তি।
544-545. Ekadesaṃ bhijjatīti pañhe sampayuttaṃ bhijjati, vippayuttaṃ tiṭṭhatīti tassa laddhi, tasmā paṭijānāti. Dve jīvitindriyānīti pucchā paravādissa, paṭiññā sakavādissa. Rūpārūpavasena hi dve jīvitindriyāni, tehiyeva satto jīvati, tesaṃ bhaṅgena maratīti vuccati. Cutikkhaṇasmiñhi dvepi jīvitāni saheva bhijjanti.
জীৰিতিন্দ্রিযকথাৰণ্ণনা।
Jīvitindriyakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৮২) ১০. জীৰিতিন্দ্রিযকথা • (82) 10. Jīvitindriyakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১০. জীৰিতিন্দ্রিযকথাৰণ্ণনা • 10. Jīvitindriyakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১০. জীৰিতিন্দ্রিযকথাৰণ্ণনা • 10. Jīvitindriyakathāvaṇṇanā
