| Library / Tipiṭaka / तिपिटक • Tipiṭaka / पञ्चपकरण-मूलटीका • Pañcapakaraṇa-mūlaṭīkā |
१०. जीवितिन्द्रियकथावण्णना
10. Jīvitindriyakathāvaṇṇanā
५४०. अरूपजीवितिन्द्रियन्तिपञ्हे ‘‘अत्थि अरूपीनं धम्मानं आयू’’तिआदिकं पञ्हं अन्तं गहेत्वा वदति। अरूपधम्मानं चित्तविप्पयुत्तं जीवितिन्द्रियसन्तानं नाम अत्थीति इच्छतीति एत्थ रूपारूपधम्मानं तं इच्छन्तो अरूपधम्मानं इच्छतीति वत्तुं युत्तोति ‘‘अरूपधम्मान’’न्ति वुत्तन्ति दट्ठब्बं।
540. Arūpajīvitindriyantipañhe ‘‘atthi arūpīnaṃ dhammānaṃ āyū’’tiādikaṃ pañhaṃ antaṃ gahetvā vadati. Arūpadhammānaṃ cittavippayuttaṃ jīvitindriyasantānaṃ nāma atthīti icchatīti ettha rūpārūpadhammānaṃ taṃ icchanto arūpadhammānaṃ icchatīti vattuṃ yuttoti ‘‘arūpadhammāna’’nti vuttanti daṭṭhabbaṃ.
५४१. सत्तसन्ताने रूपिनो वा धम्मा होन्तूतिआदिनापि तमेव जीवितिन्द्रियसन्तानं वदतीति वेदितब्बं।
541. Sattasantāne rūpino vā dhammā hontūtiādināpi tameva jīvitindriyasantānaṃ vadatīti veditabbaṃ.
५४२. पुब्बापरभागं सन्धायाति समापत्तिया आसन्नभावतो तदापि समापन्नोयेवाति अधिप्पायो।
542. Pubbāparabhāgaṃ sandhāyāti samāpattiyā āsannabhāvato tadāpi samāpannoyevāti adhippāyo.
५४४-५४५. द्वे जीवितिन्द्रियानीति ‘‘पुच्छा सकवादिस्स, पटिञ्ञा इतरस्सा’’ति पुरिमपाठो। ‘‘पुच्छा परवादिस्स, पटिञ्ञा सकवादिस्सा’’ति पच्छिमपाठो, सो युत्तो।
544-545. Dve jīvitindriyānīti ‘‘pucchā sakavādissa, paṭiññā itarassā’’ti purimapāṭho. ‘‘Pucchā paravādissa, paṭiññā sakavādissā’’ti pacchimapāṭho, so yutto.
जीवितिन्द्रियकथावण्णना निट्ठिता।
Jīvitindriyakathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (८२) १०. जीवितिन्द्रियकथा • (82) 10. Jīvitindriyakathā
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / १०. जीवितिन्द्रियकथावण्णना • 10. Jīvitindriyakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / १०. जीवितिन्द्रियकथावण्णना • 10. Jīvitindriyakathāvaṇṇanā
