6. ஜோதிஸிக்கா²பத³ங்

350. ச²ட்டே² ஜனபத³ஸ்ஸ நாமத்தா ப³ஹுவசனவஸேன ‘‘ப⁴க்³கே³ஸூ’’தி பாளியங் வுத்தங். ஸுஸுமாரஸண்டா²னோ பப்³ப³தஸங்கா²தோ கி³ரி எத்தா²தி ஸுஸுமாரகி³ரி, ஏதஸ்ஸ வா மாபிதகாலே ஸுஸுமாரோ கி³ரதி ஸத்³த³ங் நிக்³கி³ரதி எத்தா²தி ஸுஸுமாரகி³ரீதி அத்த²மனபெக்கி²த்வா வுத்தங் ‘‘நக³ரஸ்ஸ நாம’’ந்தி. தங் பனாதி வனங் பன. ‘‘மிகா³ன’’ந்திஆதி³னா மிகா³னங் அப⁴யோ தீ³யதி எத்தா²தி மிக³தா³யோதி அத்த²ங் த³ஸ்ஸேதி.

352. ‘‘ஜோதிகே’’திபத³ஸ்ஸ ஜோதிஸ்ஸ அக்³கி³ஸ்ஸ கரணங் ஜோதிகந்தி த³ஸ்ஸேதுங் வுத்தங் ‘‘ஜோதிகரணே’’தி.

354. ‘‘ஸமாத³ஹிதுகாமதாயா’’திபத³ங் ‘‘அரணிஸண்டா²பனதோ’’திபதே³ ஹேது. ஜாலாதி ஸிகா². ஸா ஹி ஜலதி தி³ப்³ப³தீதி ஜாலாதி வுச்சதி.

பதிலாதங் உக்கி²பதீதி எத்த² ‘‘பதிதாலாத’’ந்தி வத்தப்³பே³ தகாரலோபங் கத்வா ஸந்தி⁴வஸேன பதிலாதந்தி வுத்தந்தி ஆஹ ‘‘அலாதங் பதிதங் உக்கி²பதீ’’தி. அலாதந்தி உம்முக்கங். தஞ்ஹி ஆதி³த்தங் ஹுத்வா அதிஉண்ஹத்தா ந லாதப்³ப³ங் ந க³ண்ஹிதப்³ப³ந்தி அலாதந்தி வுச்சதி. அவிஜ்ஜா²தந்தி ஜா²யனதோ ட³ய்ஹனதோ அவிக³தங் அலாதந்தி ஸம்ப³ந்தோ⁴. ஜா²யனங் ட³ய்ஹனங் ஜா²தங், விக³தங் ஜா²தங் இமஸ்ஸாலாதஸ்ஸாதி விஜ்ஜா²தங்.

356. பதீ³பாதீ³னீதி பதீ³பஜோதிகாதீ³னி. தத்தா²தி தாஸு து³ட்ட²வாளமிக³அமனுஸ்ஸஸங்கா²தாஸு ஆபதா³ஸு நிமித்தபூ⁴தாஸு. நிமித்தத்தே² சேதங் பு⁴ம்மவசனந்தி. ச²ட்ட²ங்.