| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৬. জোতিসিক্খাপদং
6. Jotisikkhāpadaṃ
৩৫০. ছট্ঠে জনপদস্স নামত্তা বহুৰচনৰসেন ‘‘ভগ্গেসূ’’তি পাল়িযং ৰুত্তং। সুসুমারসণ্ঠানো পব্বতসঙ্খাতো গিরি এত্থাতি সুসুমারগিরি, এতস্স ৰা মাপিতকালে সুসুমারো গিরতি সদ্দং নিগ্গিরতি এত্থাতি সুসুমারগিরীতি অত্থমনপেক্খিত্ৰা ৰুত্তং ‘‘নগরস্স নাম’’ন্তি। তং পনাতি ৰনং পন। ‘‘মিগান’’ন্তিআদিনা মিগানং অভযো দীযতি এত্থাতি মিগদাযোতি অত্থং দস্সেতি।
350. Chaṭṭhe janapadassa nāmattā bahuvacanavasena ‘‘bhaggesū’’ti pāḷiyaṃ vuttaṃ. Susumārasaṇṭhāno pabbatasaṅkhāto giri etthāti susumāragiri, etassa vā māpitakāle susumāro girati saddaṃ niggirati etthāti susumāragirīti atthamanapekkhitvā vuttaṃ ‘‘nagarassa nāma’’nti. Taṃ panāti vanaṃ pana. ‘‘Migāna’’ntiādinā migānaṃ abhayo dīyati etthāti migadāyoti atthaṃ dasseti.
৩৫২. ‘‘জোতিকে’’তিপদস্স জোতিস্স অগ্গিস্স করণং জোতিকন্তি দস্সেতুং ৰুত্তং ‘‘জোতিকরণে’’তি।
352. ‘‘Jotike’’tipadassa jotissa aggissa karaṇaṃ jotikanti dassetuṃ vuttaṃ ‘‘jotikaraṇe’’ti.
৩৫৪. ‘‘সমাদহিতুকামতাযা’’তিপদং ‘‘অরণিসণ্ঠাপনতো’’তিপদে হেতু। জালাতি সিখা। সা হি জলতি দিব্বতীতি জালাতি ৰুচ্চতি।
354. ‘‘Samādahitukāmatāyā’’tipadaṃ ‘‘araṇisaṇṭhāpanato’’tipade hetu. Jālāti sikhā. Sā hi jalati dibbatīti jālāti vuccati.
পতিলাতং উক্খিপতীতি এত্থ ‘‘পতিতালাত’’ন্তি ৰত্তব্বে তকারলোপং কত্ৰা সন্ধিৰসেন পতিলাতন্তি ৰুত্তন্তি আহ ‘‘অলাতং পতিতং উক্খিপতী’’তি। অলাতন্তি উম্মুক্কং। তঞ্হি আদিত্তং হুত্ৰা অতিউণ্হত্তা ন লাতব্বং ন গণ্হিতব্বন্তি অলাতন্তি ৰুচ্চতি। অৰিজ্ঝাতন্তি ঝাযনতো ডয্হনতো অৰিগতং অলাতন্তি সম্বন্ধো। ঝাযনং ডয্হনং ঝাতং, ৰিগতং ঝাতং ইমস্সালাতস্সাতি ৰিজ্ঝাতং।
Patilātaṃ ukkhipatīti ettha ‘‘patitālāta’’nti vattabbe takāralopaṃ katvā sandhivasena patilātanti vuttanti āha ‘‘alātaṃ patitaṃ ukkhipatī’’ti. Alātanti ummukkaṃ. Tañhi ādittaṃ hutvā atiuṇhattā na lātabbaṃ na gaṇhitabbanti alātanti vuccati. Avijjhātanti jhāyanato ḍayhanato avigataṃ alātanti sambandho. Jhāyanaṃ ḍayhanaṃ jhātaṃ, vigataṃ jhātaṃ imassālātassāti vijjhātaṃ.
৩৫৬. পদীপাদীনীতি পদীপজোতিকাদীনি। তত্থাতি তাসু দুট্ঠৰাল়মিগঅমনুস্সসঙ্খাতাসু আপদাসু নিমিত্তভূতাসু। নিমিত্তত্থে চেতং ভুম্মৰচনন্তি। ছট্ঠং।
356.Padīpādīnīti padīpajotikādīni. Tatthāti tāsu duṭṭhavāḷamigaamanussasaṅkhātāsu āpadāsu nimittabhūtāsu. Nimittatthe cetaṃ bhummavacananti. Chaṭṭhaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৬. সুরাপানৰগ্গো • 6. Surāpānavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৬. জোতিসিক্খাপদৰণ্ণনা • 6. Jotisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. জোতিসিক্খাপদৰণ্ণনা • 6. Jotisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. জোতিসিক্খাপদৰণ্ণনা • 6. Jotisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. জোতিসিক্খাপদৰণ্ণনা • 6. Jotisikkhāpadavaṇṇanā
