| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
६. जोतिसिक्खापदं
6. Jotisikkhāpadaṃ
३५०. छट्ठे जनपदस्स नामत्ता बहुवचनवसेन ‘‘भग्गेसू’’ति पाळियं वुत्तं। सुसुमारसण्ठानो पब्बतसङ्खातो गिरि एत्थाति सुसुमारगिरि, एतस्स वा मापितकाले सुसुमारो गिरति सद्दं निग्गिरति एत्थाति सुसुमारगिरीति अत्थमनपेक्खित्वा वुत्तं ‘‘नगरस्स नाम’’न्ति। तं पनाति वनं पन। ‘‘मिगान’’न्तिआदिना मिगानं अभयो दीयति एत्थाति मिगदायोति अत्थं दस्सेति।
350. Chaṭṭhe janapadassa nāmattā bahuvacanavasena ‘‘bhaggesū’’ti pāḷiyaṃ vuttaṃ. Susumārasaṇṭhāno pabbatasaṅkhāto giri etthāti susumāragiri, etassa vā māpitakāle susumāro girati saddaṃ niggirati etthāti susumāragirīti atthamanapekkhitvā vuttaṃ ‘‘nagarassa nāma’’nti. Taṃ panāti vanaṃ pana. ‘‘Migāna’’ntiādinā migānaṃ abhayo dīyati etthāti migadāyoti atthaṃ dasseti.
३५२. ‘‘जोतिके’’तिपदस्स जोतिस्स अग्गिस्स करणं जोतिकन्ति दस्सेतुं वुत्तं ‘‘जोतिकरणे’’ति।
352. ‘‘Jotike’’tipadassa jotissa aggissa karaṇaṃ jotikanti dassetuṃ vuttaṃ ‘‘jotikaraṇe’’ti.
३५४. ‘‘समादहितुकामताया’’तिपदं ‘‘अरणिसण्ठापनतो’’तिपदे हेतु। जालाति सिखा। सा हि जलति दिब्बतीति जालाति वुच्चति।
354. ‘‘Samādahitukāmatāyā’’tipadaṃ ‘‘araṇisaṇṭhāpanato’’tipade hetu. Jālāti sikhā. Sā hi jalati dibbatīti jālāti vuccati.
पतिलातं उक्खिपतीति एत्थ ‘‘पतितालात’’न्ति वत्तब्बे तकारलोपं कत्वा सन्धिवसेन पतिलातन्ति वुत्तन्ति आह ‘‘अलातं पतितं उक्खिपती’’ति। अलातन्ति उम्मुक्कं। तञ्हि आदित्तं हुत्वा अतिउण्हत्ता न लातब्बं न गण्हितब्बन्ति अलातन्ति वुच्चति। अविज्झातन्ति झायनतो डय्हनतो अविगतं अलातन्ति सम्बन्धो। झायनं डय्हनं झातं, विगतं झातं इमस्सालातस्साति विज्झातं।
Patilātaṃ ukkhipatīti ettha ‘‘patitālāta’’nti vattabbe takāralopaṃ katvā sandhivasena patilātanti vuttanti āha ‘‘alātaṃ patitaṃ ukkhipatī’’ti. Alātanti ummukkaṃ. Tañhi ādittaṃ hutvā atiuṇhattā na lātabbaṃ na gaṇhitabbanti alātanti vuccati. Avijjhātanti jhāyanato ḍayhanato avigataṃ alātanti sambandho. Jhāyanaṃ ḍayhanaṃ jhātaṃ, vigataṃ jhātaṃ imassālātassāti vijjhātaṃ.
३५६. पदीपादीनीति पदीपजोतिकादीनि। तत्थाति तासु दुट्ठवाळमिगअमनुस्ससङ्खातासु आपदासु निमित्तभूतासु। निमित्तत्थे चेतं भुम्मवचनन्ति। छट्ठं।
356.Padīpādīnīti padīpajotikādīni. Tatthāti tāsu duṭṭhavāḷamigaamanussasaṅkhātāsu āpadāsu nimittabhūtāsu. Nimittatthe cetaṃ bhummavacananti. Chaṭṭhaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ६. सुरापानवग्गो • 6. Surāpānavaggo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / ६. जोतिसिक्खापदवण्णना • 6. Jotisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ६. जोतिसिक्खापदवण्णना • 6. Jotisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ६. जोतिसिक्खापदवण्णना • 6. Jotisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ६. जोतिसिक्खापदवण्णना • 6. Jotisikkhāpadavaṇṇanā
