| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
6. ජොතිසික්‌ඛාපදං
6. Jotisikkhāpadaṃ
350. ඡට්‌ඨෙ ජනපදස්‌ස නාමත්‌තා බහුවචනවසෙන ‘‘භග්‌ගෙසූ’’ති පාළියං වුත්‌තං. සුසුමාරසණ්‌ඨානො පබ්‌බතසඞ්‌ඛාතො ගිරි එත්‌ථාති සුසුමාරගිරි, එතස්‌ස වා මාපිතකාලෙ සුසුමාරො ගිරති සද්‌දං නිග්‌ගිරති එත්‌ථාති සුසුමාරගිරීති අත්‌ථමනපෙක්‌ඛිත්‌වා වුත්‌තං ‘‘නගරස්‌ස නාම’’න්‌ති. තං පනාති වනං පන. ‘‘මිගාන’’න්‌තිආදිනා මිගානං අභයො දීයති එත්‌ථාති මිගදායොති අත්‌ථං දස්‌සෙති.
350. Chaṭṭhe janapadassa nāmattā bahuvacanavasena ‘‘bhaggesū’’ti pāḷiyaṃ vuttaṃ. Susumārasaṇṭhāno pabbatasaṅkhāto giri etthāti susumāragiri, etassa vā māpitakāle susumāro girati saddaṃ niggirati etthāti susumāragirīti atthamanapekkhitvā vuttaṃ ‘‘nagarassa nāma’’nti. Taṃ panāti vanaṃ pana. ‘‘Migāna’’ntiādinā migānaṃ abhayo dīyati etthāti migadāyoti atthaṃ dasseti.
352. ‘‘ජොතිකෙ’’තිපදස්‌ස ජොතිස්‌ස අග්‌ගිස්‌ස කරණං ජොතිකන්‌ති දස්‌සෙතුං වුත්‌තං ‘‘ජොතිකරණෙ’’ති.
352. ‘‘Jotike’’tipadassa jotissa aggissa karaṇaṃ jotikanti dassetuṃ vuttaṃ ‘‘jotikaraṇe’’ti.
354. ‘‘සමාදහිතුකාමතායා’’තිපදං ‘‘අරණිසණ්‌ඨාපනතො’’තිපදෙ හෙතු. ජාලාති සිඛා. සා හි ජලති දිබ්‌බතීති ජාලාති වුච්‌චති.
354. ‘‘Samādahitukāmatāyā’’tipadaṃ ‘‘araṇisaṇṭhāpanato’’tipade hetu. Jālāti sikhā. Sā hi jalati dibbatīti jālāti vuccati.
පතිලාතං උක්‌ඛිපතීති එත්‌ථ ‘‘පතිතාලාත’’න්‌ති වත්‌තබ්‌බෙ තකාරලොපං කත්‌වා සන්‌ධිවසෙන පතිලාතන්‌ති වුත්‌තන්‌ති ආහ ‘‘අලාතං පතිතං උක්‌ඛිපතී’’ති. අලාතන්‌ති උම්‌මුක්‌කං. තඤ්‌හි ආදිත්‌තං හුත්‌වා අතිඋණ්‌හත්‌තා න ලාතබ්‌බං න ගණ්‌හිතබ්‌බන්‌ති අලාතන්‌ති වුච්‌චති. අවිජ්‌ඣාතන්‌ති ඣායනතො ඩය්‌හනතො අවිගතං අලාතන්‌ති සම්‌බන්‌ධො. ඣායනං ඩය්‌හනං ඣාතං, විගතං ඣාතං ඉමස්‌සාලාතස්‌සාති විජ්‌ඣාතං.
Patilātaṃ ukkhipatīti ettha ‘‘patitālāta’’nti vattabbe takāralopaṃ katvā sandhivasena patilātanti vuttanti āha ‘‘alātaṃ patitaṃ ukkhipatī’’ti. Alātanti ummukkaṃ. Tañhi ādittaṃ hutvā atiuṇhattā na lātabbaṃ na gaṇhitabbanti alātanti vuccati. Avijjhātanti jhāyanato ḍayhanato avigataṃ alātanti sambandho. Jhāyanaṃ ḍayhanaṃ jhātaṃ, vigataṃ jhātaṃ imassālātassāti vijjhātaṃ.
356. පදීපාදීනීති පදීපජොතිකාදීනි. තත්‌ථාති තාසු දුට්‌ඨවාළමිගඅමනුස්‌සසඞ්‌ඛාතාසු ආපදාසු නිමිත්‌තභූතාසු. නිමිත්‌තත්‌ථෙ චෙතං භුම්‌මවචනන්‌ති. ඡට්‌ඨං.
356.Padīpādīnīti padīpajotikādīni. Tatthāti tāsu duṭṭhavāḷamigaamanussasaṅkhātāsu āpadāsu nimittabhūtāsu. Nimittatthe cetaṃ bhummavacananti. Chaṭṭhaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුරාපානවග්‌ගො • 6. Surāpānavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
