| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
६. जोतिसिक्खापदवण्णना
6. Jotisikkhāpadavaṇṇanā
३५०. छट्ठे – भग्गाति जनपदस्स नामं। संसुमारगिरन्ति नगरस्स। भेसकळावनन्ति तन्निस्सितवनस्स। तं पन मिगानं फासुविहारत्थाय दिन्नत्ता मिगदायोति वुच्चति। समादहित्वाति जालेत्वा। परिपातेसीति अनुबन्धि।
350. Chaṭṭhe – bhaggāti janapadassa nāmaṃ. Saṃsumāragiranti nagarassa. Bhesakaḷāvananti tannissitavanassa. Taṃ pana migānaṃ phāsuvihāratthāya dinnattā migadāyoti vuccati. Samādahitvāti jāletvā. Paripātesīti anubandhi.
३५२. पदीपेपीति पदीपुज्जलनेपि। जोतिकेपीति पत्तपचनसेदकम्मादीसु जोतिकरणे। तथारूपपच्चयाति पदीपादिपच्चया।
352.Padīpepīti padīpujjalanepi. Jotikepīti pattapacanasedakammādīsu jotikaraṇe. Tathārūpapaccayāti padīpādipaccayā.
३५४-५. सयं समादहतीति एत्थ जोतिं समादहितुकामताय अरणिसण्ठपनतो पट्ठाय याव जाला न उट्ठहति, ताव सब्बपयोगेसु दुक्कटं। पटिलातं उक्खिपतीति दय्हमानं अलातं पतितं उक्खिपति, पुन यथाठाने ठपेतीति अत्थो। एवं अविज्झातं उक्खिपित्वा पक्खिपन्तस्सेव दुक्कटं, विज्झातं पुन जालापेन्तस्स पाचित्तियमेव।
354-5.Sayaṃ samādahatīti ettha jotiṃ samādahitukāmatāya araṇisaṇṭhapanato paṭṭhāya yāva jālā na uṭṭhahati, tāva sabbapayogesu dukkaṭaṃ. Paṭilātaṃ ukkhipatīti dayhamānaṃ alātaṃ patitaṃ ukkhipati, puna yathāṭhāne ṭhapetīti attho. Evaṃ avijjhātaṃ ukkhipitvā pakkhipantasseva dukkaṭaṃ, vijjhātaṃ puna jālāpentassa pācittiyameva.
३५६. तथारूपपच्चयाति ठपेत्वा पदीपादीनि अञ्ञेनपि तथारूपेन पच्चयेन समादहन्तस्स अनापत्ति। आपदासूति दुट्ठवाळमिगअमनुस्सेहि उपद्दवो होति, तत्थ समादहन्तस्सापि अनापत्ति। सेसं उत्तानमेवाति। छसमुट्ठानं – किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति।
356.Tathārūpapaccayāti ṭhapetvā padīpādīni aññenapi tathārūpena paccayena samādahantassa anāpatti. Āpadāsūti duṭṭhavāḷamigaamanussehi upaddavo hoti, tattha samādahantassāpi anāpatti. Sesaṃ uttānamevāti. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
जोतिसिक्खापदं छट्ठं।
Jotisikkhāpadaṃ chaṭṭhaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ६. सुरापानवग्गो • 6. Surāpānavaggo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ६. जोतिसिक्खापदवण्णना • 6. Jotisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ६. जोतिसिक्खापदवण्णना • 6. Jotisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ६. जोतिसिक्खापदवण्णना • 6. Jotisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ६. जोतिसिक्खापदं • 6. Jotisikkhāpadaṃ
