| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၆. ဇောတိသိက္ခာပဒဝဏ္ဏနာ
6. Jotisikkhāpadavaṇṇanā
၃၅၀. ဆဋ္ဌေ – ဘဂ္ဂာတိ ဇနပဒသ္သ နာမံ။ သံသုမာရဂိရန္တိ နဂရသ္သ။ ဘေသကဠာဝနန္တိ တန္နိသ္သိတဝနသ္သ။ တံ ပန မိဂာနံ ဖာသုဝိဟာရတ္ထာယ ဒိန္နတ္တာ မိဂဒာယောတိ ဝုစ္စတိ။ သမာဒဟိတ္ဝာတိ ဇာလေတ္ဝာ။ ပရိပာတေသီတိ အနုဗန္ဓိ။
350. Chaṭṭhe – bhaggāti janapadassa nāmaṃ. Saṃsumāragiranti nagarassa. Bhesakaḷāvananti tannissitavanassa. Taṃ pana migānaṃ phāsuvihāratthāya dinnattā migadāyoti vuccati. Samādahitvāti jāletvā. Paripātesīti anubandhi.
၃၅၂. ပဒီပေပီတိ ပဒီပုဇ္ဇလနေပိ။ ဇောတိကေပီတိ ပတ္တပစနသေဒကမ္မာဒီသု ဇောတိကရဏေ။ တထာရူပပစ္စယာတိ ပဒီပာဒိပစ္စယာ။
352.Padīpepīti padīpujjalanepi. Jotikepīti pattapacanasedakammādīsu jotikaraṇe. Tathārūpapaccayāti padīpādipaccayā.
၃၅၄-၅. သယံ သမာဒဟတီတိ ဧတ္ထ ဇောတိံ သမာဒဟိတုကာမတာယ အရဏိသဏ္ဌပနတော ပဋ္ဌာယ ယာဝ ဇာလာ န ဥဋ္ဌဟတိ, တာဝ သဗ္ဗပယောဂေသု ဒုက္ကဋံ။ ပဋိလာတံ ဥက္ခိပတီတိ ဒယ္ဟမာနံ အလာတံ ပတိတံ ဥက္ခိပတိ, ပုန ယထာဌာနေ ဌပေတီတိ အတ္ထော။ ဧဝံ အဝိဇ္ဈာတံ ဥက္ခိပိတ္ဝာ ပက္ခိပန္တသ္သေဝ ဒုက္ကဋံ, ဝိဇ္ဈာတံ ပုန ဇာလာပေန္တသ္သ ပာစိတ္တိယမေဝ။
354-5.Sayaṃ samādahatīti ettha jotiṃ samādahitukāmatāya araṇisaṇṭhapanato paṭṭhāya yāva jālā na uṭṭhahati, tāva sabbapayogesu dukkaṭaṃ. Paṭilātaṃ ukkhipatīti dayhamānaṃ alātaṃ patitaṃ ukkhipati, puna yathāṭhāne ṭhapetīti attho. Evaṃ avijjhātaṃ ukkhipitvā pakkhipantasseva dukkaṭaṃ, vijjhātaṃ puna jālāpentassa pācittiyameva.
၃၅၆. တထာရူပပစ္စယာတိ ဌပေတ္ဝာ ပဒီပာဒီနိ အညေနပိ တထာရူပေန ပစ္စယေန သမာဒဟန္တသ္သ အနာပတ္တိ။ အာပဒာသူတိ ဒုဋ္ဌဝာဠမိဂအမနုသ္သေဟိ ဥပဒ္ဒဝော ဟောတိ, တတ္ထ သမာဒဟန္တသ္သာပိ အနာပတ္တိ။ သေသံ ဥတ္တာနမေဝာတိ။ ဆသမုဋ္ဌာနံ – ကိရိယံ, နောသညာဝိမောက္ခံ, အစိတ္တကံ, ပဏ္ဏတ္တိဝဇ္ဇံ, ကာယကမ္မံ, ဝစီကမ္မံ, တိစိတ္တံ, တိဝေဒနန္တိ။
356.Tathārūpapaccayāti ṭhapetvā padīpādīni aññenapi tathārūpena paccayena samādahantassa anāpatti. Āpadāsūti duṭṭhavāḷamigaamanussehi upaddavo hoti, tattha samādahantassāpi anāpatti. Sesaṃ uttānamevāti. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ဇောတိသိက္ခာပဒံ ဆဋ္ဌံ။
Jotisikkhāpadaṃ chaṭṭhaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၆. သုရာပာနဝဂ္ဂော • 6. Surāpānavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၆. ဇောတိသိက္ခာပဒဝဏ္ဏနာ • 6. Jotisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၆. ဇောတိသိက္ခာပဒဝဏ္ဏနာ • 6. Jotisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၆. ဇောတိသိက္ခာပဒဝဏ္ဏနာ • 6. Jotisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၆. ဇောတိသိက္ခာပဒံ • 6. Jotisikkhāpadaṃ
