| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
6. ජොතිසික්‌ඛාපදවණ්‌ණනා
6. Jotisikkhāpadavaṇṇanā
350. ඡට්‌ඨෙ – භග්‌ගාති ජනපදස්‌ස නාමං. සංසුමාරගිරන්‌ති නගරස්‌ස. භෙසකළාවනන්‌ති තන්‌නිස්‌සිතවනස්‌ස. තං පන මිගානං ඵාසුවිහාරත්‌ථාය දින්‌නත්‌තා මිගදායොති වුච්‌චති. සමාදහිත්‌වාති ජාලෙත්‌වා. පරිපාතෙසීති අනුබන්‌ධි.
350. Chaṭṭhe – bhaggāti janapadassa nāmaṃ. Saṃsumāragiranti nagarassa. Bhesakaḷāvananti tannissitavanassa. Taṃ pana migānaṃ phāsuvihāratthāya dinnattā migadāyoti vuccati. Samādahitvāti jāletvā. Paripātesīti anubandhi.
352. පදීපෙපීති පදීපුජ්‌ජලනෙපි. ජොතිකෙපීති පත්‌තපචනසෙදකම්‌මාදීසු ජොතිකරණෙ. තථාරූපපච්‌චයාති පදීපාදිපච්‌චයා.
352.Padīpepīti padīpujjalanepi. Jotikepīti pattapacanasedakammādīsu jotikaraṇe. Tathārūpapaccayāti padīpādipaccayā.
354-5. සයං සමාදහතීති එත්‌ථ ජොතිං සමාදහිතුකාමතාය අරණිසණ්‌ඨපනතො පට්‌ඨාය යාව ජාලා න උට්‌ඨහති, තාව සබ්‌බපයොගෙසු දුක්‌කටං. පටිලාතං උක්‌ඛිපතීති දය්‌හමානං අලාතං පතිතං උක්‌ඛිපති, පුන යථාඨානෙ ඨපෙතීති අත්‌ථො. එවං අවිජ්‌ඣාතං උක්‌ඛිපිත්‌වා පක්‌ඛිපන්‌තස්‌සෙව දුක්‌කටං, විජ්‌ඣාතං පුන ජාලාපෙන්‌තස්‌ස පාචිත්‌තියමෙව.
354-5.Sayaṃ samādahatīti ettha jotiṃ samādahitukāmatāya araṇisaṇṭhapanato paṭṭhāya yāva jālā na uṭṭhahati, tāva sabbapayogesu dukkaṭaṃ. Paṭilātaṃ ukkhipatīti dayhamānaṃ alātaṃ patitaṃ ukkhipati, puna yathāṭhāne ṭhapetīti attho. Evaṃ avijjhātaṃ ukkhipitvā pakkhipantasseva dukkaṭaṃ, vijjhātaṃ puna jālāpentassa pācittiyameva.
356. තථාරූපපච්‌චයාති ඨපෙත්‌වා පදීපාදීනි අඤ්‌ඤෙනපි තථාරූපෙන පච්‌චයෙන සමාදහන්‌තස්‌ස අනාපත්‌ති. ආපදාසූති දුට්‌ඨවාළමිගඅමනුස්‌සෙහි උපද්‌දවො හොති, තත්‌ථ සමාදහන්‌තස්‌සාපි අනාපත්‌ති. සෙසං උත්‌තානමෙවාති. ඡසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං, තිවෙදනන්‌ති.
356.Tathārūpapaccayāti ṭhapetvā padīpādīni aññenapi tathārūpena paccayena samādahantassa anāpatti. Āpadāsūti duṭṭhavāḷamigaamanussehi upaddavo hoti, tattha samādahantassāpi anāpatti. Sesaṃ uttānamevāti. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ජොතිසික්‌ඛාපදං ඡට්‌ඨං.
Jotisikkhāpadaṃ chaṭṭhaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුරාපානවග්‌ගො • 6. Surāpānavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. ජොතිසික්‌ඛාපදවණ්‌ණනා • 6. Jotisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. ජොතිසික්‌ඛාපදං • 6. Jotisikkhāpadaṃ
