| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā |
༦. ཛོཏིསིཀྑཱཔདཝཎྞནཱ
6. Jotisikkhāpadavaṇṇanā
༣༥༠. ཚཊྛེ – བྷགྒཱཏི ཛནཔདསྶ ནཱམཾ། སཾསུམཱརགིརནྟི ནགརསྶ། བྷེསཀལཱ༹ཝནནྟི ཏནྣིསྶིཏཝནསྶ། ཏཾ པན མིགཱནཾ ཕཱསུཝིཧཱརཏྠཱཡ དིནྣཏྟཱ མིགདཱཡོཏི ཝུཙྩཏི། སམཱདཧིཏྭཱཏི ཛཱལེཏྭཱ། པརིཔཱཏེསཱིཏི ཨནུབནྡྷི།
350. Chaṭṭhe – bhaggāti janapadassa nāmaṃ. Saṃsumāragiranti nagarassa. Bhesakaḷāvananti tannissitavanassa. Taṃ pana migānaṃ phāsuvihāratthāya dinnattā migadāyoti vuccati. Samādahitvāti jāletvā. Paripātesīti anubandhi.
༣༥༢. པདཱིཔེཔཱིཏི པདཱིཔུཛྫལནེཔི། ཛོཏིཀེཔཱིཏི པཏྟཔཙནསེདཀམྨཱདཱིསུ ཛོཏིཀརཎེ། ཏཐཱརཱུཔཔཙྩཡཱཏི པདཱིཔཱདིཔཙྩཡཱ།
352.Padīpepīti padīpujjalanepi. Jotikepīti pattapacanasedakammādīsu jotikaraṇe. Tathārūpapaccayāti padīpādipaccayā.
༣༥༤-༥. སཡཾ སམཱདཧཏཱིཏི ཨེཏྠ ཛོཏིཾ སམཱདཧིཏུཀཱམཏཱཡ ཨརཎིསཎྛཔནཏོ པཊྛཱཡ ཡཱཝ ཛཱལཱ ན ཨུཊྛཧཏི, ཏཱཝ སབྦཔཡོགེསུ དུཀྐཊཾ། པཊིལཱཏཾ ཨུཀྑིཔཏཱིཏི དཡ྄ཧམཱནཾ ཨལཱཏཾ པཏིཏཾ ཨུཀྑིཔཏི, པུན ཡཐཱཋཱནེ ཋཔེཏཱིཏི ཨཏྠོ། ཨེཝཾ ཨཝིཛ྄ཛྷཱཏཾ ཨུཀྑིཔིཏྭཱ པཀྑིཔནྟསྶེཝ དུཀྐཊཾ, ཝིཛ྄ཛྷཱཏཾ པུན ཛཱལཱཔེནྟསྶ པཱཙིཏྟིཡམེཝ།
354-5.Sayaṃ samādahatīti ettha jotiṃ samādahitukāmatāya araṇisaṇṭhapanato paṭṭhāya yāva jālā na uṭṭhahati, tāva sabbapayogesu dukkaṭaṃ. Paṭilātaṃ ukkhipatīti dayhamānaṃ alātaṃ patitaṃ ukkhipati, puna yathāṭhāne ṭhapetīti attho. Evaṃ avijjhātaṃ ukkhipitvā pakkhipantasseva dukkaṭaṃ, vijjhātaṃ puna jālāpentassa pācittiyameva.
༣༥༦. ཏཐཱརཱུཔཔཙྩཡཱཏི ཋཔེཏྭཱ པདཱིཔཱདཱིནི ཨཉྙེནཔི ཏཐཱརཱུཔེན པཙྩཡེན སམཱདཧནྟསྶ ཨནཱཔཏྟི། ཨཱཔདཱསཱུཏི དུཊྛཝཱལ༹མིགཨམནུསྶེཧི ཨུཔདྡཝོ ཧོཏི, ཏཏྠ སམཱདཧནྟསྶཱཔི ཨནཱཔཏྟི། སེསཾ ཨུཏྟཱནམེཝཱཏི། ཚསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི།
356.Tathārūpapaccayāti ṭhapetvā padīpādīni aññenapi tathārūpena paccayena samādahantassa anāpatti. Āpadāsūti duṭṭhavāḷamigaamanussehi upaddavo hoti, tattha samādahantassāpi anāpatti. Sesaṃ uttānamevāti. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ཛོཏིསིཀྑཱཔདཾ ཚཊྛཾ།
Jotisikkhāpadaṃ chaṭṭhaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༦. སུརཱཔཱནཝགྒོ • 6. Surāpānavaggo
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. ཛོཏིསིཀྑཱཔདཝཎྞནཱ • 6. Jotisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. ཛོཏིསིཀྑཱཔདཝཎྞནཱ • 6. Jotisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. ཛོཏིསིཀྑཱཔདཝཎྞནཱ • 6. Jotisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦. ཛོཏིསིཀྑཱཔདཾ • 6. Jotisikkhāpadaṃ
