| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
456. ජුණ්‌හජාතකං (2)
456. Juṇhajātakaṃ (2)
13.
13.
සුණොහි මය්‌හං වචනං ජනින්‌ද, අත්‌ථෙන ජුණ්‌හම්‌හි ඉධානුපත්‌තො;
Suṇohi mayhaṃ vacanaṃ janinda, atthena juṇhamhi idhānupatto;
14.
14.
සුණොමි තිට්‌ඨාමි වදෙහි බ්‍රහ්‌මෙ, යෙනාසි 5 අත්‌ථෙන ඉධානුපත්‌තො;
Suṇomi tiṭṭhāmi vadehi brahme, yenāsi 6 atthena idhānupatto;
කං වා ත්‌වමත්‌ථං මයි පත්‌ථයානො, ඉධාගමා බ්‍රහ්‌මෙ තදිඞ්‌ඝ බ්‍රූහි.
Kaṃ vā tvamatthaṃ mayi patthayāno, idhāgamā brahme tadiṅgha brūhi.
15.
15.
දදාහි මෙ ගාමවරානි පඤ්‌ච, දාසීසතං සත්‌ත ගවංසතානි;
Dadāhi me gāmavarāni pañca, dāsīsataṃ satta gavaṃsatāni;
පරොසහස්‌සඤ්‌ච සුවණ්‌ණනික්‌ඛෙ, භරියා ච මෙ සාදිසී ද්‌වෙ දදාහි.
Parosahassañca suvaṇṇanikkhe, bhariyā ca me sādisī dve dadāhi.
16.
16.
තපො නු තෙ බ්‍රාහ්‌මණ භිංසරූපො, මන්‌තා නු තෙ බ්‍රාහ්‌මණ චිත්‌තරූපා;
Tapo nu te brāhmaṇa bhiṃsarūpo, mantā nu te brāhmaṇa cittarūpā;
යක්‌ඛා නු 7 තෙ අස්‌සවා සන්‌ති කෙචි, අත්‌ථං වා මෙ අභිජානාසි කත්‌තං.
Yakkhā nu 8 te assavā santi keci, atthaṃ vā me abhijānāsi kattaṃ.
17.
17.
න මෙ තපො අත්‌ථි න චාපි මන්‌තා, යක්‌ඛාපි මෙ අස්‌සවා නත්‌ථි කෙචි;
Na me tapo atthi na cāpi mantā, yakkhāpi me assavā natthi keci;
අත්‌ථම්‌පි තෙ නාභිජානාමි කත්‌තං, පුබ්‌බෙ ච ඛො 9 සඞ්‌ගතිමත්‌තමාසි.
Atthampi te nābhijānāmi kattaṃ, pubbe ca kho 10 saṅgatimattamāsi.
18.
18.
පඨමං ඉදං දස්‌සනං ජානතො මෙ, න තාභිජානාමි ඉතො පුරත්‌ථා;
Paṭhamaṃ idaṃ dassanaṃ jānato me, na tābhijānāmi ito puratthā;
අක්‌ඛාහි මෙ පුච්‌ඡිතො එතමත්‌ථං, කදා කුහිං වා අහු සඞ්‌ගමො නො.
Akkhāhi me pucchito etamatthaṃ, kadā kuhiṃ vā ahu saṅgamo no.
19.
19.
ගන්‌ධාරරාජස්‌ස පුරම්‌හි රම්‌මෙ, අවසිම්‌හසෙ තක්‌කසීලායං දෙව;
Gandhārarājassa puramhi ramme, avasimhase takkasīlāyaṃ deva;
තත්‌ථන්‌ධකාරම්‌හි තිමීසිකායං 11, අංසෙන අංසං සමඝට්‌ටයිම්‌හ.
Tatthandhakāramhi timīsikāyaṃ 12, aṃsena aṃsaṃ samaghaṭṭayimha.
20.
20.
සායෙව නො සඞ්‌ගතිමත්‌තමාසි, තතො න පච්‌ඡා න පුරෙ අහොසි.
Sāyeva no saṅgatimattamāsi, tato na pacchā na pure ahosi.
21.
21.
යදා කදාචි මනුජෙසු බ්‍රහ්‌මෙ, සමාගමො සප්‌පුරිසෙන හොති;
Yadā kadāci manujesu brahme, samāgamo sappurisena hoti;
න පණ්‌ඩිතා සඞ්‌ගතිසන්‌ථවානි, පුබ්‌බෙ කතං වාපි විනාසයන්‌ති.
Na paṇḍitā saṅgatisanthavāni, pubbe kataṃ vāpi vināsayanti.
22.
22.
බාලාව 17 ඛො සඞ්‌ගතිසන්‌ථවානි, පුබ්‌බෙ කතං වාපි විනාසයන්‌ති;
Bālāva 18 kho saṅgatisanthavāni, pubbe kataṃ vāpi vināsayanti;
බහුම්‌පි බාලෙසු කතං විනස්‌සති, තථා හි බාලා අකතඤ්‌ඤුරූපා.
Bahumpi bālesu kataṃ vinassati, tathā hi bālā akataññurūpā.
23.
23.
ධීරා ච ඛො සඞ්‌ගතිසන්‌ථවානි, පුබ්‌බෙ කතං වාපි න නාසයන්‌ති;
Dhīrā ca kho saṅgatisanthavāni, pubbe kataṃ vāpi na nāsayanti;
අප්‌පම්‌පි ධීරෙසු කතං න නස්‌සති, තථා හි ධීරා සුකතඤ්‌ඤුරූපා.
Appampi dhīresu kataṃ na nassati, tathā hi dhīrā sukataññurūpā.
24.
24.
දදාමි තෙ ගාමවරානි පඤ්‌ච, දාසීසතං සත්‌ත ගවංසතානි;
Dadāmi te gāmavarāni pañca, dāsīsataṃ satta gavaṃsatāni;
පරොසහස්‌සඤ්‌ච සුවණ්‌ණනික්‌ඛෙ, භරියා ච තෙ සාදිසී ද්‌වෙ දදාමි.
Parosahassañca suvaṇṇanikkhe, bhariyā ca te sādisī dve dadāmi.
25.
25.
එවං සතං හොති සමෙච්‌ච රාජ, නක්‌ඛත්‌තරාජාරිව තාරකානං;
Evaṃ sataṃ hoti samecca rāja, nakkhattarājāriva tārakānaṃ;
ආපූරතී කාසිපතී තථාහං, තයාපි මෙ සඞ්‌ගමො අජ්‌ජ ලද්‌ධොති.
Āpūratī kāsipatī tathāhaṃ, tayāpi me saṅgamo ajja laddhoti.
ජුණ්‌හජාතකං දුතියං.
Juṇhajātakaṃ dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [456] 2. ජුණ්‌හජාතකවණ්‌ණනා • [456] 2. Juṇhajātakavaṇṇanā
