| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. கச்சானகொ³த்தஸுத்தங்
5. Kaccānagottasuttaṃ
15. ஸாவத்தி²யங் விஹரதி. அத² கோ² ஆயஸ்மா கச்சானகொ³த்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா கச்சானகொ³த்தோ ப⁴க³வந்தங் ஏதத³வோச – ‘‘‘ஸம்மாதி³ட்டி² ஸம்மாதி³ட்டீ²’தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸம்மாதி³ட்டி² ஹோதீ’’தி?
15. Sāvatthiyaṃ viharati. Atha kho āyasmā kaccānagotto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kaccānagotto bhagavantaṃ etadavoca – ‘‘‘sammādiṭṭhi sammādiṭṭhī’ti, bhante, vuccati. Kittāvatā nu kho, bhante, sammādiṭṭhi hotī’’ti?
‘‘த்³வயனிஸ்ஸிதோ க்²வாயங், கச்சான, லோகோ யேபு⁴ய்யேன – அத்தி²தஞ்சேவ நத்தி²தஞ்ச. லோகஸமுத³யங் கோ², கச்சான, யதா²பூ⁴தங் ஸம்மப்பஞ்ஞாய பஸ்ஸதோ யா லோகே நத்தி²தா ஸா ந ஹோதி. லோகனிரோத⁴ங் கோ², கச்சான, யதா²பூ⁴தங் ஸம்மப்பஞ்ஞாய பஸ்ஸதோ யா லோகே அத்தி²தா ஸா ந ஹோதி. உபயுபாதா³னாபி⁴னிவேஸவினிப³ந்தோ⁴ 1 க்²வாயங், கச்சான, லோகோ யேபு⁴ய்யேன. தஞ்சாயங் உபயுபாதா³னங் சேதஸோ அதி⁴ட்டா²னங் அபி⁴னிவேஸானுஸயங் ந உபேதி ந உபாதி³யதி நாதி⁴ட்டா²தி – ‘அத்தா மே’தி. ‘து³க்க²மேவ உப்பஜ்ஜமானங் உப்பஜ்ஜதி, து³க்க²ங் நிருஜ்ஜ²மானங் நிருஜ்ஜ²தீ’தி ந கங்க²தி ந விசிகிச்ச²தி அபரபச்சயா ஞாணமேவஸ்ஸ எத்த² ஹோதி. எத்தாவதா கோ², கச்சான, ஸம்மாதி³ட்டி² ஹோதி.
‘‘Dvayanissito khvāyaṃ, kaccāna, loko yebhuyyena – atthitañceva natthitañca. Lokasamudayaṃ kho, kaccāna, yathābhūtaṃ sammappaññāya passato yā loke natthitā sā na hoti. Lokanirodhaṃ kho, kaccāna, yathābhūtaṃ sammappaññāya passato yā loke atthitā sā na hoti. Upayupādānābhinivesavinibandho 2 khvāyaṃ, kaccāna, loko yebhuyyena. Tañcāyaṃ upayupādānaṃ cetaso adhiṭṭhānaṃ abhinivesānusayaṃ na upeti na upādiyati nādhiṭṭhāti – ‘attā me’ti. ‘Dukkhameva uppajjamānaṃ uppajjati, dukkhaṃ nirujjhamānaṃ nirujjhatī’ti na kaṅkhati na vicikicchati aparapaccayā ñāṇamevassa ettha hoti. Ettāvatā kho, kaccāna, sammādiṭṭhi hoti.
‘‘‘ஸப்³ப³ங் அத்தீ²’தி கோ², கச்சான, அயமேகோ அந்தோ. ‘ஸப்³ப³ங் நத்தீ²’தி அயங் து³தியோ அந்தோ. ஏதே தே, கச்சான, உபோ⁴ அந்தே அனுபக³ம்ம மஜ்ஜே²ன ததா²க³தோ த⁴ம்மங் தே³ஸேதி – ‘அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’’தி. பஞ்சமங்.
‘‘‘Sabbaṃ atthī’ti kho, kaccāna, ayameko anto. ‘Sabbaṃ natthī’ti ayaṃ dutiyo anto. Ete te, kaccāna, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. கச்சானகொ³த்தஸுத்தவண்ணனா • 5. Kaccānagottasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. கச்சானகொ³த்தஸுத்தவண்ணனா • 5. Kaccānagottasuttavaṇṇanā
