| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. কচ্চানগোত্তসুত্তং
5. Kaccānagottasuttaṃ
১৫. সাৰত্থিযং ৰিহরতি। অথ খো আযস্মা কচ্চানগোত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা কচ্চানগোত্তো ভগৰন্তং এতদৰোচ – ‘‘‘সম্মাদিট্ঠি সম্মাদিট্ঠী’তি, ভন্তে, ৰুচ্চতি। কিত্তাৰতা নু খো, ভন্তে, সম্মাদিট্ঠি হোতী’’তি?
15. Sāvatthiyaṃ viharati. Atha kho āyasmā kaccānagotto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kaccānagotto bhagavantaṃ etadavoca – ‘‘‘sammādiṭṭhi sammādiṭṭhī’ti, bhante, vuccati. Kittāvatā nu kho, bhante, sammādiṭṭhi hotī’’ti?
‘‘দ্ৰযনিস্সিতো খ্ৰাযং, কচ্চান, লোকো যেভুয্যেন – অত্থিতঞ্চেৰ নত্থিতঞ্চ। লোকসমুদযং খো, কচ্চান, যথাভূতং সম্মপ্পঞ্ঞায পস্সতো যা লোকে নত্থিতা সা ন হোতি। লোকনিরোধং খো, কচ্চান, যথাভূতং সম্মপ্পঞ্ঞায পস্সতো যা লোকে অত্থিতা সা ন হোতি। উপযুপাদানাভিনিৰেসৰিনিবন্ধো 1 খ্ৰাযং, কচ্চান, লোকো যেভুয্যেন। তঞ্চাযং উপযুপাদানং চেতসো অধিট্ঠানং অভিনিৰেসানুসযং ন উপেতি ন উপাদিযতি নাধিট্ঠাতি – ‘অত্তা মে’তি। ‘দুক্খমেৰ উপ্পজ্জমানং উপ্পজ্জতি, দুক্খং নিরুজ্ঝমানং নিরুজ্ঝতী’তি ন কঙ্খতি ন ৰিচিকিচ্ছতি অপরপচ্চযা ঞাণমেৰস্স এত্থ হোতি। এত্তাৰতা খো, কচ্চান, সম্মাদিট্ঠি হোতি।
‘‘Dvayanissito khvāyaṃ, kaccāna, loko yebhuyyena – atthitañceva natthitañca. Lokasamudayaṃ kho, kaccāna, yathābhūtaṃ sammappaññāya passato yā loke natthitā sā na hoti. Lokanirodhaṃ kho, kaccāna, yathābhūtaṃ sammappaññāya passato yā loke atthitā sā na hoti. Upayupādānābhinivesavinibandho 2 khvāyaṃ, kaccāna, loko yebhuyyena. Tañcāyaṃ upayupādānaṃ cetaso adhiṭṭhānaṃ abhinivesānusayaṃ na upeti na upādiyati nādhiṭṭhāti – ‘attā me’ti. ‘Dukkhameva uppajjamānaṃ uppajjati, dukkhaṃ nirujjhamānaṃ nirujjhatī’ti na kaṅkhati na vicikicchati aparapaccayā ñāṇamevassa ettha hoti. Ettāvatā kho, kaccāna, sammādiṭṭhi hoti.
‘‘‘সব্বং অত্থী’তি খো, কচ্চান, অযমেকো অন্তো। ‘সব্বং নত্থী’তি অযং দুতিযো অন্তো। এতে তে, কচ্চান, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে॰… এৰমেতস্স কেৰলস্স দুক্খক্খন্ধস্স সমুদযো হোতি। অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে॰… এৰমেতস্স কেৰলস্স দুক্খক্খন্ধস্স নিরোধো হোতী’’’তি। পঞ্চমং।
‘‘‘Sabbaṃ atthī’ti kho, kaccāna, ayameko anto. ‘Sabbaṃ natthī’ti ayaṃ dutiyo anto. Ete te, kaccāna, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. কচ্চানগোত্তসুত্তৰণ্ণনা • 5. Kaccānagottasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. কচ্চানগোত্তসুত্তৰণ্ণনা • 5. Kaccānagottasuttavaṇṇanā
