| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༥. ཀཙྩཱནགོཏྟསུཏྟཾ
5. Kaccānagottasuttaṃ
༡༥. སཱཝཏྠིཡཾ ཝིཧརཏི། ཨཐ ཁོ ཨཱཡསྨཱ ཀཙྩཱནགོཏྟོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཀཙྩཱནགོཏྟོ བྷགཝནྟཾ ཨེཏདཝོཙ – ‘‘‘སམྨཱདིཊྛི སམྨཱདིཊྛཱི’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, སམྨཱདིཊྛི ཧོཏཱི’’ཏི?
15. Sāvatthiyaṃ viharati. Atha kho āyasmā kaccānagotto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kaccānagotto bhagavantaṃ etadavoca – ‘‘‘sammādiṭṭhi sammādiṭṭhī’ti, bhante, vuccati. Kittāvatā nu kho, bhante, sammādiṭṭhi hotī’’ti?
‘‘དྭཡནིསྶིཏོ ཁྭཱཡཾ, ཀཙྩཱན, ལོཀོ ཡེབྷུཡྻེན – ཨཏྠིཏཉྩེཝ ནཏྠིཏཉྩ། ལོཀསམུདཡཾ ཁོ, ཀཙྩཱན, ཡཐཱབྷཱུཏཾ སམྨཔྤཉྙཱཡ པསྶཏོ ཡཱ ལོཀེ ནཏྠིཏཱ སཱ ན ཧོཏི། ལོཀནིརོདྷཾ ཁོ, ཀཙྩཱན, ཡཐཱབྷཱུཏཾ སམྨཔྤཉྙཱཡ པསྶཏོ ཡཱ ལོཀེ ཨཏྠིཏཱ སཱ ན ཧོཏི། ཨུཔཡུཔཱདཱནཱབྷིནིཝེསཝིནིབནྡྷོ 1 ཁྭཱཡཾ, ཀཙྩཱན, ལོཀོ ཡེབྷུཡྻེན། ཏཉྩཱཡཾ ཨུཔཡུཔཱདཱནཾ ཙེཏསོ ཨདྷིཊྛཱནཾ ཨབྷིནིཝེསཱནུསཡཾ ན ཨུཔེཏི ན ཨུཔཱདིཡཏི ནཱདྷིཊྛཱཏི – ‘ཨཏྟཱ མེ’ཏི། ‘དུཀྑམེཝ ཨུཔྤཛྫམཱནཾ ཨུཔྤཛྫཏི, དུཀྑཾ ནིརུཛ྄ཛྷམཱནཾ ནིརུཛ྄ཛྷཏཱི’ཏི ན ཀངྑཏི ན ཝིཙིཀིཙྪཏི ཨཔརཔཙྩཡཱ ཉཱཎམེཝསྶ ཨེཏྠ ཧོཏི། ཨེཏྟཱཝཏཱ ཁོ, ཀཙྩཱན, སམྨཱདིཊྛི ཧོཏི།
‘‘Dvayanissito khvāyaṃ, kaccāna, loko yebhuyyena – atthitañceva natthitañca. Lokasamudayaṃ kho, kaccāna, yathābhūtaṃ sammappaññāya passato yā loke natthitā sā na hoti. Lokanirodhaṃ kho, kaccāna, yathābhūtaṃ sammappaññāya passato yā loke atthitā sā na hoti. Upayupādānābhinivesavinibandho 2 khvāyaṃ, kaccāna, loko yebhuyyena. Tañcāyaṃ upayupādānaṃ cetaso adhiṭṭhānaṃ abhinivesānusayaṃ na upeti na upādiyati nādhiṭṭhāti – ‘attā me’ti. ‘Dukkhameva uppajjamānaṃ uppajjati, dukkhaṃ nirujjhamānaṃ nirujjhatī’ti na kaṅkhati na vicikicchati aparapaccayā ñāṇamevassa ettha hoti. Ettāvatā kho, kaccāna, sammādiṭṭhi hoti.
‘‘‘སབྦཾ ཨཏྠཱི’ཏི ཁོ, ཀཙྩཱན, ཨཡམེཀོ ཨནྟོ། ‘སབྦཾ ནཏྠཱི’ཏི ཨཡཾ དུཏིཡོ ཨནྟོ། ཨེཏེ ཏེ, ཀཙྩཱན, ཨུབྷོ ཨནྟེ ཨནུཔགམྨ མཛ྄ཛྷེན ཏཐཱགཏོ དྷམྨཾ དེསེཏི – ‘ཨཝིཛྫཱཔཙྩཡཱ སངྑཱརཱ; སངྑཱརཔཙྩཡཱ ཝིཉྙཱཎཾ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི། ཨཝིཛྫཱཡ ཏྭེཝ ཨསེསཝིརཱགནིརོདྷཱ སངྑཱརནིརོདྷོ; སངྑཱརནིརོདྷཱ ཝིཉྙཱཎནིརོདྷོ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོ ཧོཏཱི’’’ཏི། པཉྩམཾ།
‘‘‘Sabbaṃ atthī’ti kho, kaccāna, ayameko anto. ‘Sabbaṃ natthī’ti ayaṃ dutiyo anto. Ete te, kaccāna, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. ཀཙྩཱནགོཏྟསུཏྟཝཎྞནཱ • 5. Kaccānagottasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥. ཀཙྩཱནགོཏྟསུཏྟཝཎྞནཱ • 5. Kaccānagottasuttavaṇṇanā
