| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
5. гажжаанаг̇од̇д̇асуд̇д̇аван̣н̣анаа
5. Kaccānagottasuttavaṇṇanā
15. яасмаа ид̇ха ж̇аананд̇ааби ‘‘саммаад̣̇идтий’’д̇и вад̣̇анд̇и аж̇аананд̇ааби б̣аахирагааби саасанигааби ануссаваад̣̇ивасзнаби ад̇д̇абажжагкзнаби, д̇асмаа д̇ам̣ б̣ахуунам̣ важанам̣ убаад̣̇ааяа аамзд̣ид̇авасзна ‘‘саммаад̣̇идти саммаад̣̇идтийд̇и, бханд̇з, вужжад̇ий’’д̇и ааха. д̇ат̇аанид̣̇д̣̇идтад̇аад̣̇ассанад̇т̇ам̣ хисса аяам̣ аамзд̣ид̇абаяог̇о. аяан̃хзд̇т̇а ад̇хиббааяо – ‘‘абарзхиби саммаад̣̇идтийд̇и вужжад̇и, саа банааяам̣ звам̣ вужжамаанаа ад̇т̇ан̃жа лагкан̣ан̃жа убаад̣̇ааяа гид̇д̇аавад̇аа ну ко, бханд̇з, саммаад̣̇идти ход̇ий’’д̇и. адтагат̇ааяам̣ бана ‘‘саммаад̣̇идтий’’д̇и важанз яасмаа вин̃н̃уу зва бамаан̣ам̣, на авин̃н̃уу, д̇асмаа ‘‘яам̣ бан̣д̣ид̇аа’’д̇иаад̣̇и вуд̇д̇ам̣. д̣̇вз аваяаваа ассаад̇и д̣̇ваяам̣, д̣̇увид̇хам̣ д̣̇идтиг̇аахавад̇т̇у, д̣̇ваяам̣ д̣̇идтиг̇аахавасзна ниссид̇о абассид̇од̇и д̣̇ваяаниссид̇о. д̇знааха ‘‘д̣̇вз годтаасз ниссид̇о’’д̇и. яааяа д̣̇идтияаа ‘‘саб̣б̣ояам̣ лого ад̇т̇и виж̇ж̇ад̇и саб̣б̣агаалам̣ убалаб̣бхад̇ий’’д̇и д̣̇идтиг̇ад̇иго г̇ан̣хаад̇и, саа д̣̇идти ад̇т̇ид̇аа, саа зва сад̣̇аа саб̣б̣агаалам̣ лого ад̇т̇ийд̇и бавад̇д̇аг̇аахад̇ааяа сассад̇о, д̇ам̣ сассад̇ам̣. яааяа д̣̇идтияаа ‘‘саб̣б̣ояам̣ лого над̇т̇и на ход̇и ужчиж̇ж̇ад̇ий’’д̇и д̣̇идтиг̇ад̇иго г̇ан̣хаад̇и, саа д̣̇идти над̇т̇ид̇аа, саа зва ужчиж̇ж̇ад̇ийд̇и уббаннаг̇аахад̇ааяа ужчзд̣̇о, д̇ам̣ ужчзд̣̇ам̣. лого наама сан̇кааралого д̇амхи г̇ахзд̇аб̣б̣ад̇о. саммаббан̃н̃ааяаад̇и авибарийд̇абан̃н̃ааяа яат̇аабхууд̇абан̃н̃ааяа. д̇знааха ‘‘савибассанаа маг̇г̇абан̃н̃аа’’д̇и. ниб̣б̣ад̇д̇зсу д̇хаммзсууд̇и яат̇аа бажжаяуббаннзсу руубааруубад̇хаммзсу. бан̃н̃ааяанд̇з свзваад̇и санд̇аананиб̣анд̇ханавасзна бан̃н̃ааяамаанзсу зва. яаа над̇т̇ийд̇и яаа ужчзд̣̇ад̣̇идти д̇ад̇т̇а д̇ад̇т̇зва сад̇д̇аанам̣ ужчиж̇ж̇анад̇о винассанад̇о гожи тид̇о наама сад̇д̇о д̇хаммо ваа над̇т̇ийд̇и сан̇кааралогз уббаж̇ж̇зяяа. ‘‘над̇т̇и сад̇д̇аа обабаад̇игаа’’д̇и бавад̇д̇амаанааби мижчаад̣̇идти д̇ат̇аабавад̇д̇асан̇каараарамман̣аава. саа на ход̇ийд̇и гаммаавиж̇ж̇аад̇ан̣хаад̣̇ибхзд̣̇ам̣ бажжаяам̣ бадижжа сан̇кааралогасса самуд̣̇аяаниб̣б̣ад̇д̇им̣ саммаббан̃н̃ааяа бассад̇о, саа ужчзд̣̇ад̣̇идти, на ход̇и, наббавад̇д̇ад̇и авижчзд̣̇зна сан̇каараанам̣ ниб̣б̣ад̇д̇ид̣̇ассанад̇о. логанирод̇ханд̇и сан̇кааралогасса кан̣иганирод̇хам̣. д̇знааха ‘‘сан̇каараанам̣ бхан̇г̇а’’нд̇и. яаа ад̇т̇ийд̇и хзд̇упаласамб̣анд̇хзна бавад̇д̇амаанасса санд̇аанаанубажчзд̣̇асса згад̇д̇аг̇г̇ахан̣зна сан̇кааралогз яаа сассад̇ад̣̇идти саб̣б̣агаалам̣ лого ад̇т̇ийд̇и уббаж̇ж̇зяяа. саа на ход̇ийд̇и уббаннуббаннаанам̣ нирод̇хасса наванаваанан̃жа уббаад̣̇асса д̣̇ассанад̇о, саа сассад̇ад̣̇идти на ход̇и.
15. Yasmā idha jānantāpi ‘‘sammādiṭṭhī’’ti vadanti ajānantāpi bāhirakāpi sāsanikāpi anussavādivasenapi attapaccakkhenapi, tasmā taṃ bahūnaṃ vacanaṃ upādāya āmeḍitavasena ‘‘sammādiṭṭhi sammādiṭṭhīti, bhante, vuccatī’’ti āha. Tathāniddiṭṭhatādassanatthaṃ hissa ayaṃ āmeḍitapayogo. Ayañhettha adhippāyo – ‘‘aparehipi sammādiṭṭhīti vuccati, sā panāyaṃ evaṃ vuccamānā atthañca lakkhaṇañca upādāya kittāvatā nu kho, bhante, sammādiṭṭhi hotī’’ti. Aṭṭhakathāyaṃ pana ‘‘sammādiṭṭhī’’ti vacane yasmā viññū eva pamāṇaṃ, na aviññū, tasmā ‘‘yaṃ paṇḍitā’’tiādi vuttaṃ. Dve avayavā assāti dvayaṃ, duvidhaṃ diṭṭhigāhavatthu, dvayaṃ diṭṭhigāhavasena nissito apassitoti dvayanissito. Tenāha ‘‘dve koṭṭhāse nissito’’ti. Yāya diṭṭhiyā ‘‘sabboyaṃ loko atthi vijjati sabbakālaṃ upalabbhatī’’ti diṭṭhigatiko gaṇhāti, sā diṭṭhi atthitā, sā eva sadā sabbakālaṃ loko atthīti pavattagāhatāya sassato, taṃ sassataṃ. Yāya diṭṭhiyā ‘‘sabboyaṃ loko natthi na hoti ucchijjatī’’ti diṭṭhigatiko gaṇhāti, sā diṭṭhi natthitā, sā eva ucchijjatīti uppannagāhatāya ucchedo, taṃ ucchedaṃ. Loko nāma saṅkhāraloko tamhi gahetabbato. Sammappaññāyāti aviparītapaññāya yathābhūtapaññāya. Tenāha ‘‘savipassanā maggapaññā’’ti. Nibbattesu dhammesūti yathā paccayuppannesu rūpārūpadhammesu. Paññāyante svevāti santānanibandhanavasena paññāyamānesu eva. Yā natthīti yā ucchedadiṭṭhi tattha tattheva sattānaṃ ucchijjanato vinassanato koci ṭhito nāma satto dhammo vā natthīti saṅkhāraloke uppajjeyya. ‘‘Natthi sattā opapātikā’’ti pavattamānāpi micchādiṭṭhi tathāpavattasaṅkhārārammaṇāva. Sā na hotīti kammāvijjātaṇhādibhedaṃ paccayaṃ paṭicca saṅkhāralokassa samudayanibbattiṃ sammappaññāya passato, sā ucchedadiṭṭhi, na hoti, nappavattati avicchedena saṅkhārānaṃ nibbattidassanato. Lokanirodhanti saṅkhāralokassa khaṇikanirodhaṃ. Tenāha ‘‘saṅkhārānaṃ bhaṅga’’nti. Yā atthīti hetuphalasambandhena pavattamānassa santānānupacchedassa ekattaggahaṇena saṅkhāraloke yā sassatadiṭṭhi sabbakālaṃ loko atthīti uppajjeyya. Sā na hotīti uppannuppannānaṃ nirodhassa navanavānañca uppādassa dassanato, sā sassatadiṭṭhi na hoti.
лого самуд̣̇зд̇и зд̇асмаад̇и логасамуд̣̇аяод̇и ааха ‘‘ануломабажжаяаагаара’’нд̇и. бажжаяад̇хаммаанан̃хи ад̇д̇ано паласса бажжаяабхааво ануломабажжаяаагааро. бадиломам̣ бажжаяаагааранд̇и аанзд̇ваа самб̣анд̇хо. д̇ам̣д̇ам̣хзд̇унирод̇хад̇о д̇ам̣д̇ам̣паланирод̇хо хи бадиломабажжаяаагааро. яо хи авиж̇ж̇аад̣̇ийнам̣ бажжаяад̇хаммаанам̣ хзд̇уаад̣̇ибажжаяабхааво, со ниббарияааяад̇о логасамуд̣̇аяо. бажжаяуббаннасса сан̇каараад̣̇игасса. анужчзд̣̇ам̣ бассад̇од̇и анужчзд̣̇ад̣̇ассанасса хзд̇у. аяамбийд̇и на гзвалам̣ кан̣ад̇о уд̣̇аяаваяанийхаран̣анаяо, ат̇а ко бажжаяад̇о уд̣̇аяаваяанийхаран̣анаяоби.
Loko samudeti etasmāti lokasamudayoti āha ‘‘anulomapaccayākāra’’nti. Paccayadhammānañhi attano phalassa paccayabhāvo anulomapaccayākāro. Paṭilomaṃ paccayākāranti ānetvā sambandho. Taṃtaṃhetunirodhato taṃtaṃphalanirodho hi paṭilomapaccayākāro. Yo hi avijjādīnaṃ paccayadhammānaṃ hetuādipaccayabhāvo, so nippariyāyato lokasamudayo. Paccayuppannassa saṅkhārādikassa. Anucchedaṃ passatoti anucchedadassanassa hetu. Ayampīti na kevalaṃ khaṇato udayavayanīharaṇanayo, atha kho paccayato udayavayanīharaṇanayopi.
убаг̇аманадтзна д̇ан̣хаава убаяо. д̇ат̇аа д̣̇идтубаяо. зсзва наяод̇и иминаа убаязхи убаад̣̇аанаад̣̇ийнам̣ анад̇т̇анд̇арад̇ам̣ ад̇ид̣̇исад̇и. д̇ат̇аа жа бана д̇зсу д̣̇увид̇хад̇аа убаад̣̇ийяад̇и. нану жа жад̇д̇аари убаад̣̇аанаани ан̃н̃ад̇т̇а вуд̇д̇аанийд̇и? сажжам̣ вуд̇д̇аани, д̇аани жа ко ад̇т̇ад̇о д̣̇вз зваад̇и ид̇ха звам̣ вуд̇д̇ам̣. гаамам̣ ‘‘ахам̣ мама’’нд̇и аяат̇аануггамзна вуд̇д̇ам̣, яат̇аануггамам̣язва бана ад̇т̇о взд̣̇ид̇аб̣б̣о. аад̣̇и-сад̣̇д̣̇зна баробарасса субхам̣ асубханд̇иаад̣̇ийнан̃жа сан̇г̇ахо взд̣̇ид̇аб̣б̣о. д̇з д̇хаммзд̇и д̇збхуумагад̇хаммз. винивисанд̇ийд̇и вируубам̣ нивисанд̇и, абхинивисанд̇ийд̇и ад̇т̇о. д̇аахийд̇и д̇ан̣хаад̣̇идтийхи. виниб̣ад̣̇д̇ход̇и вируубам̣ вимужжид̇ум̣ ваа аббад̣̇аанавасзна нияамзд̇ваа б̣ад̣̇д̇хо.
Upagamanaṭṭhena taṇhāva upayo. Tathā diṭṭhupayo. Eseva nayoti iminā upayehi upādānādīnaṃ anatthantarataṃ atidisati. Tathā ca pana tesu duvidhatā upādīyati. Nanu ca cattāri upādānāni aññattha vuttānīti? Saccaṃ vuttāni, tāni ca kho atthato dve evāti idha evaṃ vuttaṃ. Kāmaṃ ‘‘ahaṃ mama’’nti ayathānukkamena vuttaṃ, yathānukkamaṃyeva pana attho veditabbo. Ādi-saddena paroparassa subhaṃ asubhantiādīnañca saṅgaho veditabbo. Te dhammeti tebhūmakadhamme. Vinivisantīti virūpaṃ nivisanti, abhinivisantīti attho. Tāhīti taṇhādiṭṭhīhi. Vinibaddhoti virūpaṃ vimuccituṃ vā appadānavasena niyametvā baddho.
‘‘абхинивзсо’’д̇и убаяубаад̣̇аанаанам̣ бавад̇д̇иаагаарависзсо вуд̇д̇од̇и ааха ‘‘д̇ан̃жааяанд̇и д̇ан̃жа убаяубаад̣̇аана’’нд̇и. жид̇д̇ассаад̇и агусалажид̇д̇асса. бад̇идтаанабхууд̇анд̇и аад̇хаарабхууд̇ам̣. д̣̇осамохавасзнаби агусалажид̇д̇аббавад̇д̇и д̇ан̣хаад̣̇идтаабхинивзсуубаниссаяаа зваад̇и д̇ан̣хаад̣̇идтияо агусаласса жид̇д̇асса ад̇хидтаананд̇и вуд̇д̇аа. д̇асминд̇и агусалажид̇д̇з. абхинивисанд̇ийд̇и ‘‘зд̇ам̣ мама, зсо мз ад̇д̇аа’’д̇иаад̣̇инаа абхинивзсанам̣ бавад̇д̇знд̇и. анусзнд̇ийд̇и т̇аамаг̇ад̇аа худ̇ваа аббахаанабхаавзна анусзнд̇и. д̇ад̣̇убхаяанд̇и д̇ан̣хаад̣̇идтид̣̇ваяам̣. на убаг̇ажчад̇ийд̇и ‘‘зд̇ам̣ мамаа’’д̇иаад̣̇инаа д̇ан̣хаад̣̇идтиг̇ад̇ияаа на убасан̇гамад̇и на аллийяад̇и. на убаад̣̇ияад̇ийд̇и на д̣̇ал̣хаг̇г̇аахам̣ г̇ан̣хаад̇и. на ад̇хидтаад̇ийд̇и на д̇ан̣хаад̣̇идтиг̇аахзна ад̇хидтааяа бавад̇д̇ад̇и. ад̇д̇анияаг̇аахо наама сад̇и ад̇д̇аг̇аахз ход̇ийд̇и вуд̇д̇ам̣ ‘‘ад̇д̇аа мз’’д̇и. ид̣̇ам̣ д̣̇угкаг̇г̇ахан̣ам̣ убаад̣̇аанагканд̇хаабассаяам̣ д̇аб̣б̣инимуд̇д̇асса д̣̇угкасса абхааваад̇и вуд̇д̇ам̣ ‘‘д̣̇угкамзваад̇и бан̃жубаад̣̇аанагканд̇хамад̇д̇амзваа’’д̇и. ‘‘сам̣кид̇д̇зна бан̃жубаад̣̇аанагканд̇хаа д̣̇угкаа’’д̇и (д̣̇ий. ни. 2.387; ма. ни. 1.120; 3.373; вибха. 190) хи вуд̇д̇ам̣. ган̇кам̣ на гарод̇ийд̇и сам̣саяам̣ на уббаад̣̇зд̇и саб̣б̣асо вижигижчааяа самужчинд̣̇анад̇о.
‘‘Abhiniveso’’ti upayupādānānaṃ pavattiākāraviseso vuttoti āha ‘‘tañcāyanti tañca upayupādāna’’nti. Cittassāti akusalacittassa. Patiṭṭhānabhūtanti ādhārabhūtaṃ. Dosamohavasenapi akusalacittappavatti taṇhādiṭṭhābhinivesūpanissayā evāti taṇhādiṭṭhiyo akusalassa cittassa adhiṭṭhānanti vuttā. Tasminti akusalacitte. Abhinivisantīti ‘‘etaṃ mama, eso me attā’’tiādinā abhinivesanaṃ pavattenti. Anusentīti thāmagatā hutvā appahānabhāvena anusenti. Tadubhayanti taṇhādiṭṭhidvayaṃ. Na upagacchatīti ‘‘etaṃ mamā’’tiādinā taṇhādiṭṭhigatiyā na upasaṅkamati na allīyati. Na upādiyatīti na daḷhaggāhaṃ gaṇhāti. Na adhiṭṭhātīti na taṇhādiṭṭhigāhena adhiṭṭhāya pavattati. Attaniyagāho nāma sati attagāhe hotīti vuttaṃ ‘‘attā me’’ti. Idaṃ dukkhaggahaṇaṃ upādānakkhandhāpassayaṃ tabbinimuttassa dukkhassa abhāvāti vuttaṃ ‘‘dukkhamevāti pañcupādānakkhandhamattamevā’’ti. ‘‘Saṃkhittena pañcupādānakkhandhā dukkhā’’ti (dī. ni. 2.387; ma. ni. 1.120; 3.373; vibha. 190) hi vuttaṃ. Kaṅkhaṃ na karotīti saṃsayaṃ na uppādeti sabbaso vicikicchāya samucchindanato.
на бараббажжаязнаад̇и барасса асад̣̇д̣̇аханзна. миссагасаммаад̣̇идтим̣ аахаад̇и наамаруубабарижчзд̣̇ад̇о бадтааяа саммаад̣̇идтияаа вуд̇д̇ад̇д̇аа логияалогуд̇д̇арамиссагам̣ саммаад̣̇идтим̣ авожа. нигууданд̇од̇и нихийнанд̇о. нихийнабарияааяо хи аяам̣ нигууда-сад̣̇д̣̇о. д̇знааха ‘‘лаамаганд̇о’’д̇и. батамаганд̇и жа г̇арахааяам̣ га-сад̣̇д̣̇о. саб̣б̣ам̣ над̇т̇ийд̇и яат̇аасан̇кад̇ам̣ бхан̇г̇уббад̇д̇ияаа над̇т̇и зва, саб̣б̣ам̣ над̇т̇и ужчиж̇ж̇ад̇и винассад̇ийд̇и ад̇хиббааяо. саб̣б̣амад̇т̇ийд̇и жа яат̇аа асан̇кад̇ам̣ ад̇т̇и виж̇ж̇ад̇и, саб̣б̣агаалам̣ убалаб̣бхад̇ийд̇и ад̇хиббааяо. саб̣б̣анд̇и жзд̇т̇а саггааяасаб̣б̣ам̣ взд̣̇ид̇аб̣б̣ам̣ ‘‘саб̣б̣ад̇хаммамуулабарияааяа’’нд̇иаад̣̇ийсу (ма. ни. 1.1) вияа. д̇ан̃хи барин̃н̃аан̃аан̣аанам̣ бажжаяабхууд̇ам̣. ид̇и-сад̣̇д̣̇о нид̣̇ассанз. гим̣ нид̣̇ассзд̇и? ад̇т̇и-сад̣̇д̣̇зна вуд̇д̇ам̣. ‘‘ад̇т̇ид̇а’’нд̇и нижжад̇ам̣. сассад̇аг̇г̇аахо хи ид̇ха батамо анд̇од̇и ад̇хиббзд̇о. ужчзд̣̇аг̇г̇аахо д̣̇уд̇ияод̇и д̇ад̣̇убхаяавинимуд̇д̇аа жа ид̣̇аббажжаяад̇аа. зд̇т̇а жа уббаннанирод̇хагат̇анад̇о сассад̇ад̇ам̣, нируж̇жханд̇аанам̣ асад̇и ниб̣б̣аанаббад̇д̇ияам̣ яат̇аабажжаяам̣ бунуубаг̇аманагат̇анад̇о ужчзд̣̇ад̇ан̃жа анубаг̇амма маж̇жхимзна бхаг̇аваа д̇хаммам̣ д̣̇зсзд̇и ид̣̇аббажжаяад̇аанаязна. д̇зна вуд̇д̇ам̣ ‘‘зд̇з…бз… анд̇з’’д̇иаад̣̇и.
Na parappaccayenāti parassa asaddahanena. Missakasammādiṭṭhiṃ āhāti nāmarūpaparicchedato paṭṭhāya sammādiṭṭhiyā vuttattā lokiyalokuttaramissakaṃ sammādiṭṭhiṃ avoca. Nikūṭantoti nihīnanto. Nihīnapariyāyo hi ayaṃ nikūṭa-saddo. Tenāha ‘‘lāmakanto’’ti. Paṭhamakanti ca garahāyaṃ ka-saddo. Sabbaṃ natthīti yathāsaṅkhataṃ bhaṅguppattiyā natthi eva, sabbaṃ natthi ucchijjati vinassatīti adhippāyo. Sabbamatthīti ca yathā asaṅkhataṃ atthi vijjati, sabbakālaṃ upalabbhatīti adhippāyo. Sabbanti cettha sakkāyasabbaṃ veditabbaṃ ‘‘sabbadhammamūlapariyāya’’ntiādīsu (ma. ni. 1.1) viya. Tañhi pariññāñāṇānaṃ paccayabhūtaṃ. Iti-saddo nidassane. Kiṃ nidasseti? Atthi-saddena vuttaṃ. ‘‘Atthita’’nti niccataṃ. Sassataggāho hi idha paṭhamo antoti adhippeto. Ucchedaggāho dutiyoti tadubhayavinimuttā ca idappaccayatā. Ettha ca uppannanirodhakathanato sassatataṃ, nirujjhantānaṃ asati nibbānappattiyaṃ yathāpaccayaṃ punūpagamanakathanato ucchedatañca anupagamma majjhimena bhagavā dhammaṃ deseti idappaccayatānayena. Tena vuttaṃ ‘‘ete…pe… ante’’tiādi.
гажжаанаг̇од̇д̇асуд̇д̇аван̣н̣анаа нидтид̇аа.
Kaccānagottasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 5. гажжаанаг̇од̇д̇асуд̇д̇ам̣ • 5. Kaccānagottasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 5. гажжаанаг̇од̇д̇асуд̇д̇аван̣н̣анаа • 5. Kaccānagottasuttavaṇṇanā
