| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. ကစ္စာနဂောတ္တသုတ္တဝဏ္ဏနာ
5. Kaccānagottasuttavaṇṇanā
၁၅. ယသ္မာ ဣဓ ဇာနန္တာပိ ‘‘သမ္မာဒိဋ္ဌီ’’တိ ဝဒန္တိ အဇာနန္တာပိ ဗာဟိရကာပိ သာသနိကာပိ အနုသ္သဝာဒိဝသေနပိ အတ္တပစ္စက္ခေနပိ, တသ္မာ တံ ဗဟူနံ ဝစနံ ဥပာဒာယ အာမေဍိတဝသေန ‘‘သမ္မာဒိဋ္ဌိ သမ္မာဒိဋ္ဌီတိ, ဘန္တေ, ဝုစ္စတီ’’တိ အာဟ။ တထာနိဒ္ဒိဋ္ဌတာဒသ္သနတ္ထံ ဟိသ္သ အယံ အာမေဍိတပယောဂော။ အယဉ္ဟေတ္ထ အဓိပ္ပာယော – ‘‘အပရေဟိပိ သမ္မာဒိဋ္ဌီတိ ဝုစ္စတိ, သာ ပနာယံ ဧဝံ ဝုစ္စမာနာ အတ္ထဉ္စ လက္ခဏဉ္စ ဥပာဒာယ ကိတ္တာဝတာ နု ခော, ဘန္တေ, သမ္မာဒိဋ္ဌိ ဟောတီ’’တိ။ အဋ္ဌကထာယံ ပန ‘‘သမ္မာဒိဋ္ဌီ’’တိ ဝစနေ ယသ္မာ ဝိညူ ဧဝ ပမာဏံ, န အဝိညူ, တသ္မာ ‘‘ယံ ပဏ္ဍိတာ’’တိအာဒိ ဝုတ္တံ။ ဒ္ဝေ အဝယဝာ အသ္သာတိ ဒ္ဝယံ, ဒုဝိဓံ ဒိဋ္ဌိဂာဟဝတ္ထု, ဒ္ဝယံ ဒိဋ္ဌိဂာဟဝသေန နိသ္သိတော အပသ္သိတောတိ ဒ္ဝယနိသ္သိတော။ တေနာဟ ‘‘ဒ္ဝေ ကောဋ္ဌာသေ နိသ္သိတော’’တိ။ ယာယ ဒိဋ္ဌိယာ ‘‘သဗ္ဗောယံ လောကော အတ္ထိ ဝိဇ္ဇတိ သဗ္ဗကာလံ ဥပလဗ္ဘတီ’’တိ ဒိဋ္ဌိဂတိကော ဂဏ္ဟာတိ, သာ ဒိဋ္ဌိ အတ္ထိတာ, သာ ဧဝ သဒာ သဗ္ဗကာလံ လောကော အတ္ထီတိ ပဝတ္တဂာဟတာယ သသ္သတော, တံ သသ္သတံ။ ယာယ ဒိဋ္ဌိယာ ‘‘သဗ္ဗောယံ လောကော နတ္ထိ န ဟောတိ ဥစ္ဆိဇ္ဇတီ’’တိ ဒိဋ္ဌိဂတိကော ဂဏ္ဟာတိ, သာ ဒိဋ္ဌိ နတ္ထိတာ, သာ ဧဝ ဥစ္ဆိဇ္ဇတီတိ ဥပ္ပန္နဂာဟတာယ ဥစ္ဆေဒော, တံ ဥစ္ဆေဒံ။ လောကော နာမ သင္ခာရလောကော တမ္ဟိ ဂဟေတဗ္ဗတော။ သမ္မပ္ပညာယာတိ အဝိပရီတပညာယ ယထာဘူတပညာယ။ တေနာဟ ‘‘သဝိပသ္သနာ မဂ္ဂပညာ’’တိ။ နိဗ္ဗတ္တေသု ဓမ္မေသူတိ ယထာ ပစ္စယုပ္ပန္နေသု ရူပာရူပဓမ္မေသု။ ပညာယန္တေ သ္ဝေဝာတိ သန္တာနနိဗန္ဓနဝသေန ပညာယမာနေသု ဧဝ။ ယာ နတ္ထီတိ ယာ ဥစ္ဆေဒဒိဋ္ဌိ တတ္ထ တတ္ထေဝ သတ္တာနံ ဥစ္ဆိဇ္ဇနတော ဝိနသ္သနတော ကောစိ ဌိတော နာမ သတ္တော ဓမ္မော ဝာ နတ္ထီတိ သင္ခာရလောကေ ဥပ္ပဇ္ဇေယ္ယ။ ‘‘နတ္ထိ သတ္တာ ဩပပာတိကာ’’တိ ပဝတ္တမာနာပိ မိစ္ဆာဒိဋ္ဌိ တထာပဝတ္တသင္ခာရာရမ္မဏာဝ။ သာ န ဟောတီတိ ကမ္မာဝိဇ္ဇာတဏ္ဟာဒိဘေဒံ ပစ္စယံ ပဋိစ္စ သင္ခာရလောကသ္သ သမုဒယနိဗ္ဗတ္တိံ သမ္မပ္ပညာယ ပသ္သတော, သာ ဥစ္ဆေဒဒိဋ္ဌိ, န ဟောတိ, နပ္ပဝတ္တတိ အဝိစ္ဆေဒေန သင္ခာရာနံ နိဗ္ဗတ္တိဒသ္သနတော။ လောကနိရောဓန္တိ သင္ခာရလောကသ္သ ခဏိကနိရောဓံ။ တေနာဟ ‘‘သင္ခာရာနံ ဘင္ဂ’’န္တိ။ ယာ အတ္ထီတိ ဟေတုဖလသမ္ဗန္ဓေန ပဝတ္တမာနသ္သ သန္တာနာနုပစ္ဆေဒသ္သ ဧကတ္တဂ္ဂဟဏေန သင္ခာရလောကေ ယာ သသ္သတဒိဋ္ဌိ သဗ္ဗကာလံ လောကော အတ္ထီတိ ဥပ္ပဇ္ဇေယ္ယ။ သာ န ဟောတီတိ ဥပ္ပန္နုပ္ပန္နာနံ နိရောဓသ္သ နဝနဝာနဉ္စ ဥပ္ပာဒသ္သ ဒသ္သနတော, သာ သသ္သတဒိဋ္ဌိ န ဟောတိ။
15. Yasmā idha jānantāpi ‘‘sammādiṭṭhī’’ti vadanti ajānantāpi bāhirakāpi sāsanikāpi anussavādivasenapi attapaccakkhenapi, tasmā taṃ bahūnaṃ vacanaṃ upādāya āmeḍitavasena ‘‘sammādiṭṭhi sammādiṭṭhīti, bhante, vuccatī’’ti āha. Tathāniddiṭṭhatādassanatthaṃ hissa ayaṃ āmeḍitapayogo. Ayañhettha adhippāyo – ‘‘aparehipi sammādiṭṭhīti vuccati, sā panāyaṃ evaṃ vuccamānā atthañca lakkhaṇañca upādāya kittāvatā nu kho, bhante, sammādiṭṭhi hotī’’ti. Aṭṭhakathāyaṃ pana ‘‘sammādiṭṭhī’’ti vacane yasmā viññū eva pamāṇaṃ, na aviññū, tasmā ‘‘yaṃ paṇḍitā’’tiādi vuttaṃ. Dve avayavā assāti dvayaṃ, duvidhaṃ diṭṭhigāhavatthu, dvayaṃ diṭṭhigāhavasena nissito apassitoti dvayanissito. Tenāha ‘‘dve koṭṭhāse nissito’’ti. Yāya diṭṭhiyā ‘‘sabboyaṃ loko atthi vijjati sabbakālaṃ upalabbhatī’’ti diṭṭhigatiko gaṇhāti, sā diṭṭhi atthitā, sā eva sadā sabbakālaṃ loko atthīti pavattagāhatāya sassato, taṃ sassataṃ. Yāya diṭṭhiyā ‘‘sabboyaṃ loko natthi na hoti ucchijjatī’’ti diṭṭhigatiko gaṇhāti, sā diṭṭhi natthitā, sā eva ucchijjatīti uppannagāhatāya ucchedo, taṃ ucchedaṃ. Loko nāma saṅkhāraloko tamhi gahetabbato. Sammappaññāyāti aviparītapaññāya yathābhūtapaññāya. Tenāha ‘‘savipassanā maggapaññā’’ti. Nibbattesu dhammesūti yathā paccayuppannesu rūpārūpadhammesu. Paññāyante svevāti santānanibandhanavasena paññāyamānesu eva. Yā natthīti yā ucchedadiṭṭhi tattha tattheva sattānaṃ ucchijjanato vinassanato koci ṭhito nāma satto dhammo vā natthīti saṅkhāraloke uppajjeyya. ‘‘Natthi sattā opapātikā’’ti pavattamānāpi micchādiṭṭhi tathāpavattasaṅkhārārammaṇāva. Sā na hotīti kammāvijjātaṇhādibhedaṃ paccayaṃ paṭicca saṅkhāralokassa samudayanibbattiṃ sammappaññāya passato, sā ucchedadiṭṭhi, na hoti, nappavattati avicchedena saṅkhārānaṃ nibbattidassanato. Lokanirodhanti saṅkhāralokassa khaṇikanirodhaṃ. Tenāha ‘‘saṅkhārānaṃ bhaṅga’’nti. Yā atthīti hetuphalasambandhena pavattamānassa santānānupacchedassa ekattaggahaṇena saṅkhāraloke yā sassatadiṭṭhi sabbakālaṃ loko atthīti uppajjeyya. Sā na hotīti uppannuppannānaṃ nirodhassa navanavānañca uppādassa dassanato, sā sassatadiṭṭhi na hoti.
လောကော သမုဒေတိ ဧတသ္မာတိ လောကသမုဒယောတိ အာဟ ‘‘အနုလောမပစ္စယာကာရ’’န္တိ။ ပစ္စယဓမ္မာနဉ္ဟိ အတ္တနော ဖလသ္သ ပစ္စယဘာဝော အနုလောမပစ္စယာကာရော။ ပဋိလောမံ ပစ္စယာကာရန္တိ အာနေတ္ဝာ သမ္ဗန္ဓော။ တံတံဟေတုနိရောဓတော တံတံဖလနိရောဓော ဟိ ပဋိလောမပစ္စယာကာရော။ ယော ဟိ အဝိဇ္ဇာဒီနံ ပစ္စယဓမ္မာနံ ဟေတုအာဒိပစ္စယဘာဝော, သော နိပ္ပရိယာယတော လောကသမုဒယော။ ပစ္စယုပ္ပန္နသ္သ သင္ခာရာဒိကသ္သ။ အနုစ္ဆေဒံ ပသ္သတောတိ အနုစ္ဆေဒဒသ္သနသ္သ ဟေတု။ အယမ္ပီတိ န ကေဝလံ ခဏတော ဥဒယဝယနီဟရဏနယော, အထ ခော ပစ္စယတော ဥဒယဝယနီဟရဏနယောပိ။
Loko samudeti etasmāti lokasamudayoti āha ‘‘anulomapaccayākāra’’nti. Paccayadhammānañhi attano phalassa paccayabhāvo anulomapaccayākāro. Paṭilomaṃ paccayākāranti ānetvā sambandho. Taṃtaṃhetunirodhato taṃtaṃphalanirodho hi paṭilomapaccayākāro. Yo hi avijjādīnaṃ paccayadhammānaṃ hetuādipaccayabhāvo, so nippariyāyato lokasamudayo. Paccayuppannassa saṅkhārādikassa. Anucchedaṃ passatoti anucchedadassanassa hetu. Ayampīti na kevalaṃ khaṇato udayavayanīharaṇanayo, atha kho paccayato udayavayanīharaṇanayopi.
ဥပဂမနဋ္ဌေန တဏ္ဟာဝ ဥပယော။ တထာ ဒိဋ္ဌုပယော။ ဧသေဝ နယောတိ ဣမိနာ ဥပယေဟိ ဥပာဒာနာဒီနံ အနတ္ထန္တရတံ အတိဒိသတိ။ တထာ စ ပန တေသု ဒုဝိဓတာ ဥပာဒီယတိ။ နနု စ စတ္တာရိ ဥပာဒာနာနိ အညတ္ထ ဝုတ္တာနီတိ? သစ္စံ ဝုတ္တာနိ, တာနိ စ ခော အတ္ထတော ဒ္ဝေ ဧဝာတိ ဣဓ ဧဝံ ဝုတ္တံ။ ကာမံ ‘‘အဟံ မမ’’န္တိ အယထာနုက္ကမေန ဝုတ္တံ, ယထာနုက္ကမံယေဝ ပန အတ္ထော ဝေဒိတဗ္ဗော။ အာဒိ-သဒ္ဒေန ပရောပရသ္သ သုဘံ အသုဘန္တိအာဒီနဉ္စ သင္ဂဟော ဝေဒိတဗ္ဗော။ တေ ဓမ္မေတိ တေဘူမကဓမ္မေ။ ဝိနိဝိသန္တီတိ ဝိရူပံ နိဝိသန္တိ, အဘိနိဝိသန္တီတိ အတ္ထော။ တာဟီတိ တဏ္ဟာဒိဋ္ဌီဟိ။ ဝိနိဗဒ္ဓောတိ ဝိရူပံ ဝိမုစ္စိတုံ ဝာ အပ္ပဒာနဝသေန နိယမေတ္ဝာ ဗဒ္ဓော။
Upagamanaṭṭhena taṇhāva upayo. Tathā diṭṭhupayo. Eseva nayoti iminā upayehi upādānādīnaṃ anatthantarataṃ atidisati. Tathā ca pana tesu duvidhatā upādīyati. Nanu ca cattāri upādānāni aññattha vuttānīti? Saccaṃ vuttāni, tāni ca kho atthato dve evāti idha evaṃ vuttaṃ. Kāmaṃ ‘‘ahaṃ mama’’nti ayathānukkamena vuttaṃ, yathānukkamaṃyeva pana attho veditabbo. Ādi-saddena paroparassa subhaṃ asubhantiādīnañca saṅgaho veditabbo. Te dhammeti tebhūmakadhamme. Vinivisantīti virūpaṃ nivisanti, abhinivisantīti attho. Tāhīti taṇhādiṭṭhīhi. Vinibaddhoti virūpaṃ vimuccituṃ vā appadānavasena niyametvā baddho.
‘‘အဘိနိဝေသော’’တိ ဥပယုပာဒာနာနံ ပဝတ္တိအာကာရဝိသေသော ဝုတ္တောတိ အာဟ ‘‘တဉ္စာယန္တိ တဉ္စ ဥပယုပာဒာန’’န္တိ။ စိတ္တသ္သာတိ အကုသလစိတ္တသ္သ။ ပတိဋ္ဌာနဘူတန္တိ အာဓာရဘူတံ။ ဒောသမောဟဝသေနပိ အကုသလစိတ္တပ္ပဝတ္တိ တဏ္ဟာဒိဋ္ဌာဘိနိဝေသူပနိသ္သယာ ဧဝာတိ တဏ္ဟာဒိဋ္ဌိယော အကုသလသ္သ စိတ္တသ္သ အဓိဋ္ဌာနန္တိ ဝုတ္တာ။ တသ္မိန္တိ အကုသလစိတ္တေ။ အဘိနိဝိသန္တီတိ ‘‘ဧတံ မမ, ဧသော မေ အတ္တာ’’တိအာဒိနာ အဘိနိဝေသနံ ပဝတ္တေန္တိ။ အနုသေန္တီတိ ထာမဂတာ ဟုတ္ဝာ အပ္ပဟာနဘာဝေန အနုသေန္တိ။ တဒုဘယန္တိ တဏ္ဟာဒိဋ္ဌိဒ္ဝယံ။ န ဥပဂစ္ဆတီတိ ‘‘ဧတံ မမာ’’တိအာဒိနာ တဏ္ဟာဒိဋ္ဌိဂတိယာ န ဥပသင္ကမတိ န အလ္လီယတိ။ န ဥပာဒိယတီတိ န ဒဠ္ဟဂ္ဂာဟံ ဂဏ္ဟာတိ။ န အဓိဋ္ဌာတီတိ န တဏ္ဟာဒိဋ္ဌိဂာဟေန အဓိဋ္ဌာယ ပဝတ္တတိ။ အတ္တနိယဂာဟော နာမ သတိ အတ္တဂာဟေ ဟောတီတိ ဝုတ္တံ ‘‘အတ္တာ မေ’’တိ။ ဣဒံ ဒုက္ခဂ္ဂဟဏံ ဥပာဒာနက္ခန္ဓာပသ္သယံ တဗ္ဗိနိမုတ္တသ္သ ဒုက္ခသ္သ အဘာဝာတိ ဝုတ္တံ ‘‘ဒုက္ခမေဝာတိ ပဉ္စုပာဒာနက္ခန္ဓမတ္တမေဝာ’’တိ။ ‘‘သံခိတ္တေန ပဉ္စုပာဒာနက္ခန္ဓာ ဒုက္ခာ’’တိ (ဒီ. နိ. ၂.၃၈၇; မ. နိ. ၁.၁၂၀; ၃.၃၇၃; ဝိဘ. ၁၉၀) ဟိ ဝုတ္တံ။ ကင္ခံ န ကရောတီတိ သံသယံ န ဥပ္ပာဒေတိ သဗ္ဗသော ဝိစိကိစ္ဆာယ သမုစ္ဆိန္ဒနတော။
‘‘Abhiniveso’’ti upayupādānānaṃ pavattiākāraviseso vuttoti āha ‘‘tañcāyanti tañca upayupādāna’’nti. Cittassāti akusalacittassa. Patiṭṭhānabhūtanti ādhārabhūtaṃ. Dosamohavasenapi akusalacittappavatti taṇhādiṭṭhābhinivesūpanissayā evāti taṇhādiṭṭhiyo akusalassa cittassa adhiṭṭhānanti vuttā. Tasminti akusalacitte. Abhinivisantīti ‘‘etaṃ mama, eso me attā’’tiādinā abhinivesanaṃ pavattenti. Anusentīti thāmagatā hutvā appahānabhāvena anusenti. Tadubhayanti taṇhādiṭṭhidvayaṃ. Na upagacchatīti ‘‘etaṃ mamā’’tiādinā taṇhādiṭṭhigatiyā na upasaṅkamati na allīyati. Na upādiyatīti na daḷhaggāhaṃ gaṇhāti. Na adhiṭṭhātīti na taṇhādiṭṭhigāhena adhiṭṭhāya pavattati. Attaniyagāho nāma sati attagāhe hotīti vuttaṃ ‘‘attā me’’ti. Idaṃ dukkhaggahaṇaṃ upādānakkhandhāpassayaṃ tabbinimuttassa dukkhassa abhāvāti vuttaṃ ‘‘dukkhamevāti pañcupādānakkhandhamattamevā’’ti. ‘‘Saṃkhittena pañcupādānakkhandhā dukkhā’’ti (dī. ni. 2.387; ma. ni. 1.120; 3.373; vibha. 190) hi vuttaṃ. Kaṅkhaṃ na karotīti saṃsayaṃ na uppādeti sabbaso vicikicchāya samucchindanato.
န ပရပ္ပစ္စယေနာတိ ပရသ္သ အသဒ္ဒဟနေန။ မိသ္သကသမ္မာဒိဋ္ဌိံ အာဟာတိ နာမရူပပရိစ္ဆေဒတော ပဋ္ဌာယ သမ္မာဒိဋ္ဌိယာ ဝုတ္တတ္တာ လောကိယလောကုတ္တရမိသ္သကံ သမ္မာဒိဋ္ဌိံ အဝောစ။ နိကူဋန္တောတိ နိဟီနန္တော။ နိဟီနပရိယာယော ဟိ အယံ နိကူဋ-သဒ္ဒော။ တေနာဟ ‘‘လာမကန္တော’’တိ။ ပဌမကန္တိ စ ဂရဟာယံ က-သဒ္ဒော။ သဗ္ဗံ နတ္ထီတိ ယထာသင္ခတံ ဘင္ဂုပ္ပတ္တိယာ နတ္ထိ ဧဝ, သဗ္ဗံ နတ္ထိ ဥစ္ဆိဇ္ဇတိ ဝိနသ္သတီတိ အဓိပ္ပာယော။ သဗ္ဗမတ္ထီတိ စ ယထာ အသင္ခတံ အတ္ထိ ဝိဇ္ဇတိ, သဗ္ဗကာလံ ဥပလဗ္ဘတီတိ အဓိပ္ပာယော။ သဗ္ဗန္တိ စေတ္ထ သက္ကာယသဗ္ဗံ ဝေဒိတဗ္ဗံ ‘‘သဗ္ဗဓမ္မမူလပရိယာယ’’န္တိအာဒီသု (မ. နိ. ၁.၁) ဝိယ။ တဉ္ဟိ ပရိညာဉာဏာနံ ပစ္စယဘူတံ။ ဣတိ-သဒ္ဒော နိဒသ္သနေ။ ကိံ နိဒသ္သေတိ? အတ္ထိ-သဒ္ဒေန ဝုတ္တံ။ ‘‘အတ္ထိတ’’န္တိ နိစ္စတံ။ သသ္သတဂ္ဂာဟော ဟိ ဣဓ ပဌမော အန္တောတိ အဓိပ္ပေတော။ ဥစ္ဆေဒဂ္ဂာဟော ဒုတိယောတိ တဒုဘယဝိနိမုတ္တာ စ ဣဒပ္ပစ္စယတာ။ ဧတ္ထ စ ဥပ္ပန္နနိရောဓကထနတော သသ္သတတံ, နိရုဇ္ဈန္တာနံ အသတိ နိဗ္ဗာနပ္ပတ္တိယံ ယထာပစ္စယံ ပုနူပဂမနကထနတော ဥစ္ဆေဒတဉ္စ အနုပဂမ္မ မဇ္ဈိမေန ဘဂဝာ ဓမ္မံ ဒေသေတိ ဣဒပ္ပစ္စယတာနယေန။ တေန ဝုတ္တံ ‘‘ဧတေ။ပေ.။ အန္တေ’’တိအာဒိ။
Na parappaccayenāti parassa asaddahanena. Missakasammādiṭṭhiṃ āhāti nāmarūpaparicchedato paṭṭhāya sammādiṭṭhiyā vuttattā lokiyalokuttaramissakaṃ sammādiṭṭhiṃ avoca. Nikūṭantoti nihīnanto. Nihīnapariyāyo hi ayaṃ nikūṭa-saddo. Tenāha ‘‘lāmakanto’’ti. Paṭhamakanti ca garahāyaṃ ka-saddo. Sabbaṃ natthīti yathāsaṅkhataṃ bhaṅguppattiyā natthi eva, sabbaṃ natthi ucchijjati vinassatīti adhippāyo. Sabbamatthīti ca yathā asaṅkhataṃ atthi vijjati, sabbakālaṃ upalabbhatīti adhippāyo. Sabbanti cettha sakkāyasabbaṃ veditabbaṃ ‘‘sabbadhammamūlapariyāya’’ntiādīsu (ma. ni. 1.1) viya. Tañhi pariññāñāṇānaṃ paccayabhūtaṃ. Iti-saddo nidassane. Kiṃ nidasseti? Atthi-saddena vuttaṃ. ‘‘Atthita’’nti niccataṃ. Sassataggāho hi idha paṭhamo antoti adhippeto. Ucchedaggāho dutiyoti tadubhayavinimuttā ca idappaccayatā. Ettha ca uppannanirodhakathanato sassatataṃ, nirujjhantānaṃ asati nibbānappattiyaṃ yathāpaccayaṃ punūpagamanakathanato ucchedatañca anupagamma majjhimena bhagavā dhammaṃ deseti idappaccayatānayena. Tena vuttaṃ ‘‘ete…pe… ante’’tiādi.
ကစ္စာနဂောတ္တသုတ္တဝဏ္ဏနာ နိဋ္ဌိတာ။
Kaccānagottasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ကစ္စာနဂောတ္တသုတ္တံ • 5. Kaccānagottasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ကစ္စာနဂောတ္တသုတ္တဝဏ္ဏနာ • 5. Kaccānagottasuttavaṇṇanā
