| Library / Tipiṭaka / තිපිටක • Tipiṭaka / උදානපාළි • Udānapāḷi |
8. කච්‌චානසුත්‌තං
8. Kaccānasuttaṃ
68. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා මහාකච්‌චානො භගවතො අවිදූරෙ නිසින්‌නො හොති පල්‌ලඞ්‌කං ආභුජිත්‌වා උජුං කායං පණිධාය කායගතාය සතියා අජ්‌ඣත්‌තං පරිමුඛං සූපට්‌ඨිතාය.
68. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā mahākaccāno bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya kāyagatāya satiyā ajjhattaṃ parimukhaṃ sūpaṭṭhitāya.
අද්‌දසා ඛො භගවා ආයස්‌මන්‌තං මහාකච්‌චානං අවිදූරෙ නිසින්‌නං පල්‌ලඞ්‌කං ආභුජිත්‌වා උජුං කායං පණිධාය කායගතාය සතියා අජ්‌ඣත්‌තං පරිමුඛං සූපට්‌ඨිතාය.
Addasā kho bhagavā āyasmantaṃ mahākaccānaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya kāyagatāya satiyā ajjhattaṃ parimukhaṃ sūpaṭṭhitāya.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘යස්‌ස සියා සබ්‌බදා සති,
‘‘Yassa siyā sabbadā sati,
සතතං කායගතා උපට්‌ඨිතා;
Satataṃ kāyagatā upaṭṭhitā;
නො චස්‌ස නො ච මෙ සියා,
No cassa no ca me siyā,
න භවිස්‌සති න ච මෙ භවිස්‌සති;
Na bhavissati na ca me bhavissati;
අනුපුබ්‌බවිහාරි තත්‌ථ සො,
Anupubbavihāri tattha so,
කාලෙනෙව තරෙ විසත්‌තික’’න්‌ති. අට්‌ඨමං;
Kāleneva tare visattika’’nti. aṭṭhamaṃ;
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 8. කච්‌චානසුත්‌තවණ්‌ණනා • 8. Kaccānasuttavaṇṇanā
