| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
8. අට්‌ඨකනිපාතො
8. Aṭṭhakanipāto
417. කච්‌චානිජාතකං (1)
417. Kaccānijātakaṃ (1)
1.
1.
ඔදාතවත්‌ථා සුචි අල්‌ලකෙසා, කච්‌චානි කිං කුම්‌භිමධිස්‌සයිත්‌වා 1;
Odātavatthā suci allakesā, kaccāni kiṃ kumbhimadhissayitvā 2;
පිට්‌ඨා තිලා ධොවසි තණ්‌ඩුලානි, තිලොදනො හෙහිති කිස්‌ස හෙතු.
Piṭṭhā tilā dhovasi taṇḍulāni, tilodano hehiti kissa hetu.
2.
2.
න ඛො අයං බ්‍රාහ්‌මණ භොජනත්‌ථා 3, තිලොදනො හෙහිති සාධුපක්‌කො;
Na kho ayaṃ brāhmaṇa bhojanatthā 4, tilodano hehiti sādhupakko;
ධම්‌මො මතො තස්‌ස පහුත්‌තමජ්‌ජ 5, අහං කරිස්‌සාමි සුසානමජ්‌ඣෙ.
Dhammo mato tassa pahuttamajja 6, ahaṃ karissāmi susānamajjhe.
3.
3.
අනුවිච්‌ච කච්‌චානි කරොහි කිච්‌චං, ධම්‌මො මතො කො නු තවෙව 7 සංසි;
Anuvicca kaccāni karohi kiccaṃ, dhammo mato ko nu taveva 8 saṃsi;
සහස්‌සනෙත්‌තො අතුලානුභාවො, න මිය්‍යතී ධම්‌මවරො කදාචි.
Sahassanetto atulānubhāvo, na miyyatī dhammavaro kadāci.
4.
4.
දළ්‌හප්‌පමාණං මම එත්‌ථ බ්‍රහ්‌මෙ, ධම්‌මො මතො නත්‌ථි මමෙත්‌ථ කඞ්‌ඛා;
Daḷhappamāṇaṃ mama ettha brahme, dhammo mato natthi mamettha kaṅkhā;
යෙ යෙව දානි පාපා භවන්‌ති, තෙ තෙව දානි සුඛිතා භවන්‌ති.
Ye yeva dāni pāpā bhavanti, te teva dāni sukhitā bhavanti.
5.
5.
සුණිසා හි මය්‌හං වඤ්‌ඣා අහොසි, සා මං වධිත්‌වාන විජායි පුත්‌තං;
Suṇisā hi mayhaṃ vañjhā ahosi, sā maṃ vadhitvāna vijāyi puttaṃ;
සා දානි සබ්‌බස්‌ස කුලස්‌ස ඉස්‌සරා, අහං පනම්‌හි 9 අපවිද්‌ධා එකිකා.
Sā dāni sabbassa kulassa issarā, ahaṃ panamhi 10 apaviddhā ekikā.
6.
6.
ජීවාමි වොහං න මතොහමස්‌මි 11, තවෙව අත්‌ථාය ඉධාගතොස්‌මි;
Jīvāmi vohaṃ na matohamasmi 12, taveva atthāya idhāgatosmi;
යා තං වධිත්‌වාන විජායි පුත්‌තං, සහාව පුත්‌තෙන කරොමි භස්‌මං.
Yā taṃ vadhitvāna vijāyi puttaṃ, sahāva puttena karomi bhasmaṃ.
7.
7.
එවඤ්‌ච 13 තෙ රුච්‌චති දෙවරාජ, මමෙව අත්‌ථාය ඉධාගතොසි;
Evañca 14 te ruccati devarāja, mameva atthāya idhāgatosi;
අහඤ්‌ච පුත්‌තො සුණිසා ච නත්‌තා, සම්‌මොදමානා ඝරමාවසෙම.
Ahañca putto suṇisā ca nattā, sammodamānā gharamāvasema.
8.
8.
එවඤ්‌ච තෙ රුච්‌චති කාතියානි, හතාපි සන්‌තා න ජහාසි ධම්‌මං;
Evañca te ruccati kātiyāni, hatāpi santā na jahāsi dhammaṃ;
තුවඤ්‌ච 15 පුත්‌තො සුණිසා ච නත්‌තා, සම්‌මොදමානා ඝරමාවසෙථ.
Tuvañca 16 putto suṇisā ca nattā, sammodamānā gharamāvasetha.
9.
9.
සා කාතියානී සුණිසාය සද්‌ධිං, සම්‌මොදමානා ඝරමාවසිත්‌ථ;
Sā kātiyānī suṇisāya saddhiṃ, sammodamānā gharamāvasittha;
පුත්‌තො ච නත්‌තා ච උපට්‌ඨහිංසු, දෙවානමින්‌දෙන අධිග්‌ගහීතාති.
Putto ca nattā ca upaṭṭhahiṃsu, devānamindena adhiggahītāti.
කච්‌චානිජාතකං පඨමං.
Kaccānijātakaṃ paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [417] 1. කච්‌චානිජාතකවණ්‌ණනා • [417] 1. Kaccānijātakavaṇṇanā
