| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[273] 3. கச்ச²பஜாதகவண்ணனா
[273] 3. Kacchapajātakavaṇṇanā
கோ நு உத்³தி⁴தப⁴த்தோவாதி இத³ங் ஸத்தா² ஜேதவனே விஹரந்தோ கோஸலராஜஸ்ஸ த்³வின்னங் மஹாமத்தானங் கலஹவூபஸமனங் ஆரப்³ப⁴ கதே²ஸி. பச்சுப்பன்னவத்து² து³கனிபாதே கதி²தமேவ.
Konu uddhitabhattovāti idaṃ satthā jetavane viharanto kosalarājassa dvinnaṃ mahāmattānaṃ kalahavūpasamanaṃ ārabbha kathesi. Paccuppannavatthu dukanipāte kathitameva.
அதீதே பன பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ காஸிரட்டே² ப்³ராஹ்மணகுலே நிப்³ப³த்தித்வா வயப்பத்தோ தக்கஸிலாயங் ஸப்³ப³ஸிப்பானி உக்³க³ண்ஹித்வா காமே பஹாய இஸிபப்³ப³ஜ்ஜங் பப்³ப³ஜித்வா ஹிமவந்தபதே³ஸே க³ங்கா³தீரே அஸ்ஸமபத³ங் மாபெத்வா தத்த² அபி⁴ஞ்ஞா ச ஸமாபத்தியோ ச நிப்³ப³த்தெத்வா ஜா²னகீளங் கீளந்தோ வாஸங் கப்பேஸி. இமஸ்மிங் கிர ஜாதகே போ³தி⁴ஸத்தோ பரமமஜ்ஜ²த்தோ அஹோஸி, உபெக்கா²பாரமிங் பூரேஸி. தஸ்ஸ பண்ணஸாலத்³வாரே நிஸின்னஸ்ஸ ஏகோ பக³ப்³போ⁴ து³ஸ்ஸீலோ மக்கடோ ஆக³ந்த்வா கண்ணஸோதேஸு அங்க³ஜாதேன ஸலாகபவேஸனகம்மங் கரோதி, போ³தி⁴ஸத்தோ அவாரெத்வா மஜ்ஜ²த்தோ ஹுத்வா நிஸீத³தியேவ. அதே²கதி³வஸங் ஏகோ கச்ச²போ உத³கா உத்தரித்வா க³ங்கா³தீரே முக²ங் விவரித்வா ஆதபங் தப்பந்தோ நித்³தா³யதி. தங் தி³ஸ்வா ஸோ லோலவானரோ தஸ்ஸ முகே² ஸலாகபவேஸனகம்மங் அகாஸி. அத²ஸ்ஸ கச்ச²போ பபு³ஜ்ஜி²த்வா அங்க³ஜாதங் ஸமுக்³கே³ பக்கி²பந்தோ விய ட³ங்ஸி, ப³லவவேத³னா உப்பஜ்ஜி. வேத³னங் அதி⁴வாஸேதுங் அஸக்கொந்தோ ‘‘கோ நு கோ² மங் இமம்ஹா து³க்கா² மோசெய்ய, கஸ்ஸ ஸந்திகங் க³ச்சா²மீ’’தி சிந்தெத்வா ‘‘அஞ்ஞோ மங் இமம்ஹா து³க்கா² மோசேதுங் ஸமத்தோ² நத்தி² அஞ்ஞத்ர தாபஸேன, தஸ்ஸேவ ஸந்திகங் மயா க³ந்துங் வட்டதீ’’தி கச்ச²பங் த்³வீஹி ஹத்தே²ஹி உக்கி²பித்வா போ³தி⁴ஸத்தஸ்ஸ ஸந்திகங் அக³மாஸி. போ³தி⁴ஸத்தோ தேன து³ஸ்ஸீலமக்கடேன ஸத்³தி⁴ங் த³வங் கரொந்தோ பட²மங் கா³த²மாஹ –
Atīte pana bārāṇasiyaṃ brahmadatte rajjaṃ kārente bodhisatto kāsiraṭṭhe brāhmaṇakule nibbattitvā vayappatto takkasilāyaṃ sabbasippāni uggaṇhitvā kāme pahāya isipabbajjaṃ pabbajitvā himavantapadese gaṅgātīre assamapadaṃ māpetvā tattha abhiññā ca samāpattiyo ca nibbattetvā jhānakīḷaṃ kīḷanto vāsaṃ kappesi. Imasmiṃ kira jātake bodhisatto paramamajjhatto ahosi, upekkhāpāramiṃ pūresi. Tassa paṇṇasāladvāre nisinnassa eko pagabbho dussīlo makkaṭo āgantvā kaṇṇasotesu aṅgajātena salākapavesanakammaṃ karoti, bodhisatto avāretvā majjhatto hutvā nisīdatiyeva. Athekadivasaṃ eko kacchapo udakā uttaritvā gaṅgātīre mukhaṃ vivaritvā ātapaṃ tappanto niddāyati. Taṃ disvā so lolavānaro tassa mukhe salākapavesanakammaṃ akāsi. Athassa kacchapo pabujjhitvā aṅgajātaṃ samugge pakkhipanto viya ḍaṃsi, balavavedanā uppajji. Vedanaṃ adhivāsetuṃ asakkonto ‘‘ko nu kho maṃ imamhā dukkhā moceyya, kassa santikaṃ gacchāmī’’ti cintetvā ‘‘añño maṃ imamhā dukkhā mocetuṃ samattho natthi aññatra tāpasena, tasseva santikaṃ mayā gantuṃ vaṭṭatī’’ti kacchapaṃ dvīhi hatthehi ukkhipitvā bodhisattassa santikaṃ agamāsi. Bodhisatto tena dussīlamakkaṭena saddhiṃ davaṃ karonto paṭhamaṃ gāthamāha –
67.
67.
‘‘கோ நு உத்³தி⁴தப⁴த்தோவ, பூரஹத்தோ²வ ப்³ராஹ்மணோ;
‘‘Ko nu uddhitabhattova, pūrahatthova brāhmaṇo;
கஹங் நு பி⁴க்க²ங் அசரி, கங் ஸத்³த⁴ங் உபஸங்கமீ’’தி.
Kahaṃ nu bhikkhaṃ acari, kaṃ saddhaṃ upasaṅkamī’’ti.
தத்த² கோ நு உத்³தி⁴தப⁴த்தோவாதி கோ நு ஏஸ வட்³டி⁴தப⁴த்தோ விய, ஏகங் வட்³டி⁴தப⁴த்தங் ப⁴த்தபூரபாதிங் ஹத்தே²ஹி க³ஹெத்வா விய கோ நு ஏஸோ ஆக³ச்ச²தீதி அத்தோ². பூரஹத்தோ²வ ப்³ராஹ்மணோதி கத்திகமாஸே வாசனகங் லபி⁴த்வா பூரஹத்தோ² ப்³ராஹ்மணோ விய ச கோ நு கோ² ஏஸோதி வானரங் ஸந்தா⁴ய வத³தி. கஹங் நு பி⁴க்க²ங் அசரீதி, போ⁴ வானர, கஸ்மிங் பதே³ஸே அஜ்ஜ த்வங் பி⁴க்க²ங் அசரி. கங் ஸத்³த⁴ங் உபஸங்கமீதி கதரங் நாம புப்³ப³பேதே உத்³தி³ஸ்ஸ கதங் ஸத்³த⁴ப⁴த்தங், கதரங் வா ஸத்³த⁴ங் புக்³க³லங் த்வங் உபஸங்கமி, குதோ தே அயங் தெ³ய்யத⁴ம்மோ லத்³தோ⁴தி தீ³பேதி.
Tattha ko nu uddhitabhattovāti ko nu esa vaḍḍhitabhatto viya, ekaṃ vaḍḍhitabhattaṃ bhattapūrapātiṃ hatthehi gahetvā viya ko nu eso āgacchatīti attho. Pūrahatthova brāhmaṇoti kattikamāse vācanakaṃ labhitvā pūrahattho brāhmaṇo viya ca ko nu kho esoti vānaraṃ sandhāya vadati. Kahaṃ nu bhikkhaṃ acarīti, bho vānara, kasmiṃ padese ajja tvaṃ bhikkhaṃ acari. Kaṃ saddhaṃ upasaṅkamīti kataraṃ nāma pubbapete uddissa kataṃ saddhabhattaṃ, kataraṃ vā saddhaṃ puggalaṃ tvaṃ upasaṅkami, kuto te ayaṃ deyyadhammo laddhoti dīpeti.
தங் ஸுத்வா து³ஸ்ஸீலவானரோ து³தியங் கா³த²மாஹ –
Taṃ sutvā dussīlavānaro dutiyaṃ gāthamāha –
68.
68.
‘‘அஹங் கபிஸ்மி து³ம்மேதோ⁴, அனாமாஸானி ஆமஸிங்;
‘‘Ahaṃ kapismi dummedho, anāmāsāni āmasiṃ;
த்வங் மங் மோசய ப⁴த்³த³ங் தே, முத்தோ க³ச்செ²ய்ய பப்³ப³த’’ந்தி.
Tvaṃ maṃ mocaya bhaddaṃ te, mutto gaccheyya pabbata’’nti.
தத்த² அஹங் கபிஸ்மி து³ம்மேதோ⁴தி ப⁴த்³த³ங் தே அஹங் அஸ்மி து³ம்மேதோ⁴ சபலசித்தோ மக்கடோ. அனாமாஸானி ஆமஸிந்தி அனாமஸிதப்³ப³ட்டா²னானி ஆமஸிங். த்வங் மங் மோசய ப⁴த்³த³ங் தேதி த்வங் த³யாலு அனுகம்பகோ மங் இமம்ஹா து³க்கா² மோசேஹி, ப⁴த்³த³ங் தே ஹோது. முத்தோ க³ச்செ²ய்ய பப்³ப³தந்தி ஸோஹங் தவானுபா⁴வேன இமம்ஹா ப்³யஸனா முத்தோ பப்³ப³தமேவ க³ச்செ²ய்யங், ந தே புன சக்கு²பதே² அத்தானங் த³ஸ்ஸெய்யந்தி.
Tattha ahaṃ kapismi dummedhoti bhaddaṃ te ahaṃ asmi dummedho capalacitto makkaṭo. Anāmāsāni āmasinti anāmasitabbaṭṭhānāni āmasiṃ. Tvaṃ maṃ mocaya bhaddaṃ teti tvaṃ dayālu anukampako maṃ imamhā dukkhā mocehi, bhaddaṃ te hotu. Mutto gaccheyya pabbatanti sohaṃ tavānubhāvena imamhā byasanā mutto pabbatameva gaccheyyaṃ, na te puna cakkhupathe attānaṃ dasseyyanti.
போ³தி⁴ஸத்தோ தஸ்மிங் காருஞ்ஞேன கச்ச²பேன ஸத்³தி⁴ங் ஸல்லபந்தோ ததியங் கா³த²மாஹ –
Bodhisatto tasmiṃ kāruññena kacchapena saddhiṃ sallapanto tatiyaṃ gāthamāha –
69.
69.
‘‘கச்ச²பா கஸ்ஸபா ஹொந்தி, கொண்ட³ஞ்ஞா ஹொந்தி மக்கடா;
‘‘Kacchapā kassapā honti, koṇḍaññā honti makkaṭā;
முஞ்ச கஸ்ஸப கொண்ட³ஞ்ஞங், கதங் மேது²னகங் தயா’’தி.
Muñca kassapa koṇḍaññaṃ, kataṃ methunakaṃ tayā’’ti.
தஸ்ஸத்தோ² – கச்ச²பா நாம கஸ்ஸபகொ³த்தா ஹொந்தி, மக்கடா கொண்ட³ஞ்ஞகொ³த்தா, கஸ்ஸபகொண்ட³ஞ்ஞானஞ்ச அஞ்ஞமஞ்ஞங் ஆவாஹவிவாஹஸம்ப³ந்தோ⁴ அத்தி². அத்³தா⁴ தயித³ங் லோலேன து³ஸ்ஸீலமக்கடேன தயா ஸத்³தி⁴ங், தயா ச து³ஸ்ஸீலேன இமினா மக்கடேன ஸத்³தி⁴ங் கொ³த்தஸதி³ஸதாஸங்கா²தஸ்ஸ மேது²னத⁴ம்மஸ்ஸ அனுச்ச²விகங் து³ஸ்ஸீல்யகம்மஸங்கா²தம்பி மேது²னகங் கதங், தஸ்மா முஞ்ச, கஸ்ஸப, கொண்ட³ஞ்ஞந்தி.
Tassattho – kacchapā nāma kassapagottā honti, makkaṭā koṇḍaññagottā, kassapakoṇḍaññānañca aññamaññaṃ āvāhavivāhasambandho atthi. Addhā tayidaṃ lolena dussīlamakkaṭena tayā saddhiṃ, tayā ca dussīlena iminā makkaṭena saddhiṃ gottasadisatāsaṅkhātassa methunadhammassa anucchavikaṃ dussīlyakammasaṅkhātampi methunakaṃ kataṃ, tasmā muñca, kassapa, koṇḍaññanti.
கச்ச²போ போ³தி⁴ஸத்தஸ்ஸ வசனங் ஸுத்வா காரணேன பஸன்னோ வானரஸ்ஸ அங்க³ஜாதங் முஞ்சி. மக்கடோ முத்தமத்தோவ போ³தி⁴ஸத்தங் வந்தி³த்வா பலாதோ, புன தங் டா²னங் நிவத்தித்வாபி ந ஓலோகேஸி. கச்ச²போபி போ³தி⁴ஸத்தங் வந்தி³த்வா ஸகட்டா²னமேவ க³தோ. போ³தி⁴ஸத்தோபி அபரிஹீனஜ்ஜா²னோ ப்³ரஹ்மலோகபராயணோ அஹோஸி.
Kacchapo bodhisattassa vacanaṃ sutvā kāraṇena pasanno vānarassa aṅgajātaṃ muñci. Makkaṭo muttamattova bodhisattaṃ vanditvā palāto, puna taṃ ṭhānaṃ nivattitvāpi na olokesi. Kacchapopi bodhisattaṃ vanditvā sakaṭṭhānameva gato. Bodhisattopi aparihīnajjhāno brahmalokaparāyaṇo ahosi.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி – ‘‘ததா³ கச்ச²பவானரா த்³வே மஹாமத்தா அஹேஸுங், தாபஸோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi – ‘‘tadā kacchapavānarā dve mahāmattā ahesuṃ, tāpaso pana ahameva ahosi’’nti.
கச்ச²பஜாதகவண்ணனா ததியா.
Kacchapajātakavaṇṇanā tatiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 273. கச்ச²பஜாதகங் • 273. Kacchapajātakaṃ
