| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. கத³ம்ப³புப்பி²யத்தே²ரஅபதா³னவண்ணனா
6. Kadambapupphiyattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ கத³ம்ப³புப்பி²யத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸம்மாஸம்பு³த்³த⁴ஸுஞ்ஞே லோகே ஏகஸ்மிங் குலே நிப்³ப³த்தோ வுத்³தி⁴மன்வாய க⁴ராவாஸங் வஸந்தோ தத்த² ஆதீ³னவங் தி³ஸ்வா க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா ஹிமவந்தஸமீபே குக்குடே நாம பப்³ப³தே அஸ்ஸமங் கத்வா விஹாஸி. ஸோ தத்த² ஸத்த பச்சேகபு³த்³தே⁴ தி³ஸ்வா பஸன்னமானஸோ புப்பி²தங் கத³ம்ப³புப்ப²ங் ஓசினித்வா தே பச்சேகபு³த்³தே⁴ பூஜேஸி. தேபி ‘‘இச்சி²தங் பத்தி²த’’ந்திஆதி³னா அனுமோத³னங் அகங்ஸு.
Himavantassāvidūretiādikaṃ āyasmato kadambapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto sammāsambuddhasuññe loke ekasmiṃ kule nibbatto vuddhimanvāya gharāvāsaṃ vasanto tattha ādīnavaṃ disvā gharāvāsaṃ pahāya tāpasapabbajjaṃ pabbajitvā himavantasamīpe kukkuṭe nāma pabbate assamaṃ katvā vihāsi. So tattha satta paccekabuddhe disvā pasannamānaso pupphitaṃ kadambapupphaṃ ocinitvā te paccekabuddhe pūjesi. Tepi ‘‘icchitaṃ patthita’’ntiādinā anumodanaṃ akaṃsu.
30. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ வுத்³தி⁴மன்வாய ஸத்து² த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா நசிரஸ்ஸேவ அரஹா ஹுத்வா புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. தங் வுத்தத்த²மேவ. குக்குடோ நாம பப்³ப³தோதி தஸ்ஸ உபோ⁴ஸு பஸ்ஸேஸு குக்குடசூளாகாரேன பப்³ப³தகூடானங் விஜ்ஜமானத்தா குக்குடோதி ஸங்க²ங் க³தோ. பகாரேன திரோ ஹுத்வா பதிட்ட²ஹதீதி பப்³ப³தோ. தம்ஹி பப்³ப³தபாத³ம்ஹீதி தஸ்மிங் பப்³ப³தஸமீபே. ஸத்த பு³த்³தா⁴ வஸந்தீதி ஸத்த பச்சேகபு³த்³தா⁴ தஸ்மிங் குக்குடபப்³ப³தபாதே³ பண்ணஸாலாயங் வஸந்தீதி அத்தோ².
30. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ kulagehe nibbatto vuddhimanvāya satthu dhammadesanaṃ sutvā paṭiladdhasaddho pabbajitvā nacirasseva arahā hutvā pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ vuttatthameva. Kukkuṭo nāma pabbatoti tassa ubhosu passesu kukkuṭacūḷākārena pabbatakūṭānaṃ vijjamānattā kukkuṭoti saṅkhaṃ gato. Pakārena tiro hutvā patiṭṭhahatīti pabbato. Tamhi pabbatapādamhīti tasmiṃ pabbatasamīpe. Satta buddhā vasantīti satta paccekabuddhā tasmiṃ kukkuṭapabbatapāde paṇṇasālāyaṃ vasantīti attho.
31. தீ³பராஜங்வ உக்³க³தந்தி தீ³பானங் ராஜா தீ³பராஜா, ஸப்³பே³ஸங் தீ³பானங் ஜலமானானங் தாரகானங் ராஜா சந்தோ³தி அத்தோ². அத² வா ஸப்³பே³ஸு ஜம்பு³தீ³பபுப்³ப³விதே³ஹஅபரகோ³யானஉத்தரகுருஸங்கா²தேஸு சதூஸு தீ³பேஸு த்³விஸஹஸ்ஸபரித்ததீ³பேஸு ச ராஜா ஆலோகப²ரணதோ சந்தோ³ தீ³பராஜாதி வுச்சதி, தங் நபே⁴ உக்³க³தங் சந்த³ங் இவ புப்பி²தங் பு²ல்லிதங் கத³ம்ப³ருக்க²ங் தி³ஸ்வா ததோ புப்ப²ங் ஓசினித்வா உபோ⁴ஹி ஹத்தே²ஹி பக்³க³ய்ஹ பகாரேன க³ஹெத்வா ஸத்த பச்சேகபு³த்³தே⁴ ஸமோகிரிங் ஸுட்டு² ஓகிரிங், ஆத³ரேன பூஜேஸிந்தி அத்தோ². ஸேஸங் உத்தானத்த²மேவாதி.
31.Dīparājaṃvauggatanti dīpānaṃ rājā dīparājā, sabbesaṃ dīpānaṃ jalamānānaṃ tārakānaṃ rājā candoti attho. Atha vā sabbesu jambudīpapubbavidehaaparagoyānauttarakurusaṅkhātesu catūsu dīpesu dvisahassaparittadīpesu ca rājā ālokapharaṇato cando dīparājāti vuccati, taṃ nabhe uggataṃ candaṃ iva pupphitaṃ phullitaṃ kadambarukkhaṃ disvā tato pupphaṃ ocinitvā ubhohi hatthehi paggayha pakārena gahetvā satta paccekabuddhe samokiriṃ suṭṭhu okiriṃ, ādarena pūjesinti attho. Sesaṃ uttānatthamevāti.
கத³ம்ப³புப்பி²யத்தே²ரஅபதா³னவண்ணனா ஸமத்தா.
Kadambapupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. கத³ம்ப³புப்பி²யத்தே²ரஅபதா³னங் • 6. Kadambapupphiyattheraapadānaṃ
