| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
6. කදම්‌බපුප්‌ඵියත්‌ථෙරඅපදානවණ්‌ණනා
6. Kadambapupphiyattheraapadānavaṇṇanā
හිමවන්‌තස්‌සාවිදූරෙතිආදිකං ආයස්‌මතො කදම්‌බපුප්‌ඵියත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සම්‌මාසම්‌බුද්‌ධසුඤ්‌ඤෙ ලොකෙ එකස්‌මිං කුලෙ නිබ්‌බත්‌තො වුද්‌ධිමන්‌වාය ඝරාවාසං වසන්‌තො තත්‌ථ ආදීනවං දිස්‌වා ඝරාවාසං පහාය තාපසපබ්‌බජ්‌ජං පබ්‌බජිත්‌වා හිමවන්‌තසමීපෙ කුක්‌කුටෙ නාම පබ්‌බතෙ අස්‌සමං කත්‌වා විහාසි. සො තත්‌ථ සත්‌ත පච්‌චෙකබුද්‌ධෙ දිස්‌වා පසන්‌නමානසො පුප්‌ඵිතං කදම්‌බපුප්‌ඵං ඔචිනිත්‌වා තෙ පච්‌චෙකබුද්‌ධෙ පූජෙසි. තෙපි ‘‘ඉච්‌ඡිතං පත්‌ථිත’’න්‌තිආදිනා අනුමොදනං අකංසු.
Himavantassāvidūretiādikaṃ āyasmato kadambapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto sammāsambuddhasuññe loke ekasmiṃ kule nibbatto vuddhimanvāya gharāvāsaṃ vasanto tattha ādīnavaṃ disvā gharāvāsaṃ pahāya tāpasapabbajjaṃ pabbajitvā himavantasamīpe kukkuṭe nāma pabbate assamaṃ katvā vihāsi. So tattha satta paccekabuddhe disvā pasannamānaso pupphitaṃ kadambapupphaṃ ocinitvā te paccekabuddhe pūjesi. Tepi ‘‘icchitaṃ patthita’’ntiādinā anumodanaṃ akaṃsu.
30. සො තෙන පුඤ්‌ඤෙන දෙවමනුස්‌සෙසු සංසරන්‌තො උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං කුලගෙහෙ නිබ්‌බත්‌තො වුද්‌ධිමන්‌වාය සත්‌ථු ධම්‌මදෙසනං සුත්‌වා පටිලද්‌ධසද්‌ධො පබ්‌බජිත්‌වා නචිරස්‌සෙව අරහා හුත්‌වා පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො හිමවන්‌තස්‌සාවිදූරෙතිආදිමාහ. තං වුත්‌තත්‌ථමෙව. කුක්‌කුටො නාම පබ්‌බතොති තස්‌ස උභොසු පස්‌සෙසු කුක්‌කුටචූළාකාරෙන පබ්‌බතකූටානං විජ්‌ජමානත්‌තා කුක්‌කුටොති සඞ්‌ඛං ගතො. පකාරෙන තිරො හුත්‌වා පතිට්‌ඨහතීති පබ්‌බතො. තම්‌හි පබ්‌බතපාදම්‌හීති තස්‌මිං පබ්‌බතසමීපෙ. සත්‌ත බුද්‌ධා වසන්‌තීති සත්‌ත පච්‌චෙකබුද්‌ධා තස්‌මිං කුක්‌කුටපබ්‌බතපාදෙ පණ්‌ණසාලායං වසන්‌තීති අත්‌ථො.
30. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ kulagehe nibbatto vuddhimanvāya satthu dhammadesanaṃ sutvā paṭiladdhasaddho pabbajitvā nacirasseva arahā hutvā pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ vuttatthameva. Kukkuṭo nāma pabbatoti tassa ubhosu passesu kukkuṭacūḷākārena pabbatakūṭānaṃ vijjamānattā kukkuṭoti saṅkhaṃ gato. Pakārena tiro hutvā patiṭṭhahatīti pabbato. Tamhi pabbatapādamhīti tasmiṃ pabbatasamīpe. Satta buddhā vasantīti satta paccekabuddhā tasmiṃ kukkuṭapabbatapāde paṇṇasālāyaṃ vasantīti attho.
31. දීපරාජංව උග්‌ගතන්‌ති දීපානං රාජා දීපරාජා, සබ්‌බෙසං දීපානං ජලමානානං තාරකානං රාජා චන්‌දොති අත්‌ථො. අථ වා සබ්‌බෙසු ජම්‌බුදීපපුබ්‌බවිදෙහඅපරගොයානඋත්‌තරකුරුසඞ්‌ඛාතෙසු චතූසු දීපෙසු ද්‌විසහස්‌සපරිත්‌තදීපෙසු ච රාජා ආලොකඵරණතො චන්‌දො දීපරාජාති වුච්‌චති, තං නභෙ උග්‌ගතං චන්‌දං ඉව පුප්‌ඵිතං ඵුල්‌ලිතං කදම්‌බරුක්‌ඛං දිස්‌වා තතො පුප්‌ඵං ඔචිනිත්‌වා උභොහි හත්‌ථෙහි පග්‌ගය්‌හ පකාරෙන ගහෙත්‌වා සත්‌ත පච්‌චෙකබුද්‌ධෙ සමොකිරිං සුට්‌ඨු ඔකිරිං, ආදරෙන පූජෙසින්‌ති අත්‌ථො. සෙසං උත්‌තානත්‌ථමෙවාති.
31.Dīparājaṃvauggatanti dīpānaṃ rājā dīparājā, sabbesaṃ dīpānaṃ jalamānānaṃ tārakānaṃ rājā candoti attho. Atha vā sabbesu jambudīpapubbavidehaaparagoyānauttarakurusaṅkhātesu catūsu dīpesu dvisahassaparittadīpesu ca rājā ālokapharaṇato cando dīparājāti vuccati, taṃ nabhe uggataṃ candaṃ iva pupphitaṃ phullitaṃ kadambarukkhaṃ disvā tato pupphaṃ ocinitvā ubhohi hatthehi paggayha pakārena gahetvā satta paccekabuddhe samokiriṃ suṭṭhu okiriṃ, ādarena pūjesinti attho. Sesaṃ uttānatthamevāti.
කදම්‌බපුප්‌ඵියත්‌ථෙරඅපදානවණ්‌ණනා සමත්‌තා.
Kadambapupphiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 6. කදම්‌බපුප්‌ඵියත්‌ථෙරඅපදානං • 6. Kadambapupphiyattheraapadānaṃ
