| Library / Tipiṭaka / ติปิฎก • Tipiṭaka / อปทาน-อฎฺฐกถา • Apadāna-aṭṭhakathā |
๔. กกฺการุปุปฺผปูชกเตฺถรอปทานวณฺณนา
4. Kakkārupupphapūjakattheraapadānavaṇṇanā
เทวปุโตฺต อหํ สโนฺตติอาทิกํ อายสฺมโต กกฺการุปุปฺผปูชกเตฺถรสฺส อปทานํฯ อยมฺปิ ปุริมพุเทฺธสุ กตาธิกาโร ตตฺถ ตตฺถ ภเว กตปุญฺญสญฺจโย สิขิสฺส ภควโต กาเล ภุมฺมฎฺฐกเทวปุโตฺต หุตฺวา นิพฺพโตฺต สิขิํ สมฺมาสมฺพุทฺธํ ทิสฺวา ทิพฺพกกฺการุปุปฺผํ คเหตฺวา ปูเชสิฯ
Devaputto ahaṃ santotiādikaṃ āyasmato kakkārupupphapūjakattherassa apadānaṃ. Ayampi purimabuddhesu katādhikāro tattha tattha bhave katapuññasañcayo sikhissa bhagavato kāle bhummaṭṭhakadevaputto hutvā nibbatto sikhiṃ sammāsambuddhaṃ disvā dibbakakkārupupphaṃ gahetvā pūjesi.
๒๑. โส เตน ปุเญฺญน เทวมนุเสฺสสุ สํสรโนฺต เอกติํสกปฺปพฺภนฺตเร อุภยสุขํ อนุภวิตฺวา อิมสฺมิํ พุทฺธุปฺปาเท สาวตฺถิยํ กุลเคเห นิพฺพโตฺต วุทฺธิมนฺวาย สตฺถริ ปสโนฺน ปพฺพชิตฺวา นจิรเสฺสว อรหา หุตฺวา อตฺตโน ปุพฺพกมฺมํ ปจฺจกฺขโต ญตฺวา โสมนสฺสชาโต ปุพฺพจริตาปทานํ ปกาเสโนฺต เทวปุโตฺต อหํ สโนฺตติอาทิมาหฯ ตตฺถ ทิพฺพนฺติ กีฬนฺติ ปญฺจหิ ทิเพฺพหิ กามคุเณหีติ เทวา, เทวานํ ปุโตฺต, เทโว เอว วา ปุโตฺต เทวปุโตฺต, อหํ เทวปุโตฺต สโนฺต วิชฺชมาโน ทิพฺพํ กกฺการุปุปฺผํ ปคฺคยฺห ปกาเรน, คเหตฺวา สิขิสฺส ภควโต อภิโรปยิํ ปูเชสินฺติ อโตฺถฯ เสสํ อุตฺตานตฺถเมวาติฯ
21. So tena puññena devamanussesu saṃsaranto ekatiṃsakappabbhantare ubhayasukhaṃ anubhavitvā imasmiṃ buddhuppāde sāvatthiyaṃ kulagehe nibbatto vuddhimanvāya satthari pasanno pabbajitvā nacirasseva arahā hutvā attano pubbakammaṃ paccakkhato ñatvā somanassajāto pubbacaritāpadānaṃ pakāsento devaputto ahaṃ santotiādimāha. Tattha dibbanti kīḷanti pañcahi dibbehi kāmaguṇehīti devā, devānaṃ putto, devo eva vā putto devaputto, ahaṃ devaputto santo vijjamāno dibbaṃ kakkārupupphaṃ paggayha pakārena, gahetvā sikhissa bhagavato abhiropayiṃ pūjesinti attho. Sesaṃ uttānatthamevāti.
กกฺการุปุปฺผปูชกเตฺถรอปทานวณฺณนา สมตฺตาฯ
Kakkārupupphapūjakattheraapadānavaṇṇanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / อปทานปาฬิ • Apadānapāḷi / ๔. กกฺการุปุปฺผปูชกเตฺถรอปทานํ • 4. Kakkārupupphapūjakattheraapadānaṃ
