| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
4. කක්‌කාරුපුප්‌ඵපූජකත්‌ථෙරඅපදානවණ්‌ණනා
4. Kakkārupupphapūjakattheraapadānavaṇṇanā
දෙවපුත්‌තො අහං සන්‌තොතිආදිකං ආයස්‌මතො කක්‌කාරුපුප්‌ඵපූජකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ කතපුඤ්‌ඤසඤ්‌චයො සිඛිස්‌ස භගවතො කාලෙ භුම්‌මට්‌ඨකදෙවපුත්‌තො හුත්‌වා නිබ්‌බත්‌තො සිඛිං සම්‌මාසම්‌බුද්‌ධං දිස්‌වා දිබ්‌බකක්‌කාරුපුප්‌ඵං ගහෙත්‌වා පූජෙසි.
Devaputto ahaṃ santotiādikaṃ āyasmato kakkārupupphapūjakattherassa apadānaṃ. Ayampi purimabuddhesu katādhikāro tattha tattha bhave katapuññasañcayo sikhissa bhagavato kāle bhummaṭṭhakadevaputto hutvā nibbatto sikhiṃ sammāsambuddhaṃ disvā dibbakakkārupupphaṃ gahetvā pūjesi.
21. සො තෙන පුඤ්‌ඤෙන දෙවමනුස්‌සෙසු සංසරන්‌තො එකතිංසකප්‌පබ්‌භන්‌තරෙ උභයසුඛං අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං කුලගෙහෙ නිබ්‌බත්‌තො වුද්‌ධිමන්‌වාය සත්‌ථරි පසන්‌නො පබ්‌බජිත්‌වා නචිරස්‌සෙව අරහා හුත්‌වා අත්‌තනො පුබ්‌බකම්‌මං පච්‌චක්‌ඛතො ඤත්‌වා සොමනස්‌සජාතො පුබ්‌බචරිතාපදානං පකාසෙන්‌තො දෙවපුත්‌තො අහං සන්‌තොතිආදිමාහ. තත්‌ථ දිබ්‌බන්‌ති කීළන්‌ති පඤ්‌චහි දිබ්‌බෙහි කාමගුණෙහීති දෙවා, දෙවානං පුත්‌තො, දෙවො එව වා පුත්‌තො දෙවපුත්‌තො, අහං දෙවපුත්‌තො සන්‌තො විජ්‌ජමානො දිබ්‌බං කක්‌කාරුපුප්‌ඵං පග්‌ගය්‌හ පකාරෙන, ගහෙත්‌වා සිඛිස්‌ස භගවතො අභිරොපයිං පූජෙසින්‌ති අත්‌ථො. සෙසං උත්‌තානත්‌ථමෙවාති.
21. So tena puññena devamanussesu saṃsaranto ekatiṃsakappabbhantare ubhayasukhaṃ anubhavitvā imasmiṃ buddhuppāde sāvatthiyaṃ kulagehe nibbatto vuddhimanvāya satthari pasanno pabbajitvā nacirasseva arahā hutvā attano pubbakammaṃ paccakkhato ñatvā somanassajāto pubbacaritāpadānaṃ pakāsento devaputto ahaṃ santotiādimāha. Tattha dibbanti kīḷanti pañcahi dibbehi kāmaguṇehīti devā, devānaṃ putto, devo eva vā putto devaputto, ahaṃ devaputto santo vijjamāno dibbaṃ kakkārupupphaṃ paggayha pakārena, gahetvā sikhissa bhagavato abhiropayiṃ pūjesinti attho. Sesaṃ uttānatthamevāti.
කක්‌කාරුපුප්‌ඵපූජකත්‌ථෙරඅපදානවණ්‌ණනා සමත්‌තා.
Kakkārupupphapūjakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 4. කක්‌කාරුපුප්‌ඵපූජකත්‌ථෙරඅපදානං • 4. Kakkārupupphapūjakattheraapadānaṃ
