| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
4. гаггадагарасад̣̇ааяагавимаанаван̣н̣анаа
4. Kakkaṭakarasadāyakavimānavaṇṇanā
ужжамид̣̇ам̣ ман̣ит̇уун̣ам̣ вимаананд̇и гаггадагарасад̣̇ааяагавимаанам̣. д̇асса гаа уббад̇д̇и? бхаг̇аваа рааж̇аг̇ахз вихарад̇и взл̣уванз. д̇зна самаязна ан̃н̃ад̇аро бхигку аарад̣̇д̇хавибассаго ган̣н̣асуулзна бийл̣ид̇о агалласарийрад̇ааяа вибассанам̣ уссуггаабзд̇ум̣ наасагки, взж̇ж̇зхи вуд̇д̇авид̇хинаа бхзсаж̇ж̇з гад̇зби рог̇о на вуубасами. со бхаг̇авад̇о зд̇амад̇т̇ам̣ аарожзси. ат̇асса бхаг̇аваа ‘‘гаггадагарасабхож̇анам̣ саббааяа’’нд̇и н̃ад̇ваа ааха ‘‘г̇ажча д̇вам̣ бхигку маг̇ад̇хакзд̇д̇з бин̣д̣ааяа жараахий’’д̇и.
Uccamidaṃmaṇithūṇaṃ vimānanti kakkaṭakarasadāyakavimānaṃ. Tassa kā uppatti? Bhagavā rājagahe viharati veḷuvane. Tena samayena aññataro bhikkhu āraddhavipassako kaṇṇasūlena pīḷito akallasarīratāya vipassanaṃ ussukkāpetuṃ nāsakkhi, vejjehi vuttavidhinā bhesajje katepi rogo na vūpasami. So bhagavato etamatthaṃ ārocesi. Athassa bhagavā ‘‘kakkaṭakarasabhojanaṃ sappāya’’nti ñatvā āha ‘‘gaccha tvaṃ bhikkhu magadhakhette piṇḍāya carāhī’’ti.
со бхигку ‘‘д̣̇ийгхад̣̇ассинаа ад̣̇д̇хаа гин̃жи д̣̇идтам̣ бхависсад̇ий’’д̇и жинд̇зд̇ваа ‘‘саад̇ху бханд̇з’’д̇и бхаг̇авад̇о бадиссун̣ид̇ваа бхаг̇аванд̇ам̣ ванд̣̇ид̇ваа бад̇д̇ажийварамаад̣̇ааяа маг̇ад̇хакзд̇д̇ам̣ г̇анд̇ваа ан̃н̃ад̇арасса кзд̇д̇абааласса гудияаа д̣̇ваарз бин̣д̣ааяа адтааси. со жа кзд̇д̇абаало гаггадагарасам̣ самбаад̣̇зд̇ваа бхад̇д̇ан̃жа бажид̇ваа ‘‘т̇огам̣ виссамид̇ваа бхун̃ж̇иссаамий’’д̇и нисинно т̇зрам̣ д̣̇исваа бад̇д̇ам̣ г̇ахзд̇ваа гудигааяам̣ нисийд̣̇аабзд̇ваа гаггадагарасабхад̇д̇ам̣ ад̣̇ааси. т̇зрасса д̇ам̣ бхад̇д̇ам̣ т̇огам̣ бхуд̇д̇ассаязва ган̣н̣асуулам̣ бадиббассамбхи, гхадасад̇зна нхаад̇о вияа ахоси . со саббааяаахааравасзна жид̇д̇апаасугам̣ лабхид̇ваа вибассанаавасзна жид̇д̇ам̣ абхининнаамзнд̇о абарияосид̇зязва бхож̇анз анавасзсад̇о аасавз кзбзд̇ваа арахад̇д̇з бад̇идтааяа кзд̇д̇абаалам̣ ааха ‘‘убаасага, д̇ава бин̣д̣абаад̇абхож̇анзна маяхам̣ рог̇о вуубасанд̇о, гааяажид̇д̇ам̣ галлам̣ ж̇аад̇ам̣, д̇вамби имасса бун̃н̃асса палзна виг̇ад̇агааяажид̇д̇ад̣̇угко бхависсасий’’д̇и вад̇ваа анумод̣̇анам̣ гад̇ваа баггаами.
So bhikkhu ‘‘dīghadassinā addhā kiñci diṭṭhaṃ bhavissatī’’ti cintetvā ‘‘sādhu bhante’’ti bhagavato paṭissuṇitvā bhagavantaṃ vanditvā pattacīvaramādāya magadhakhettaṃ gantvā aññatarassa khettapālassa kuṭiyā dvāre piṇḍāya aṭṭhāsi. So ca khettapālo kakkaṭakarasaṃ sampādetvā bhattañca pacitvā ‘‘thokaṃ vissamitvā bhuñjissāmī’’ti nisinno theraṃ disvā pattaṃ gahetvā kuṭikāyaṃ nisīdāpetvā kakkaṭakarasabhattaṃ adāsi. Therassa taṃ bhattaṃ thokaṃ bhuttassayeva kaṇṇasūlaṃ paṭippassambhi, ghaṭasatena nhāto viya ahosi . So sappāyāhāravasena cittaphāsukaṃ labhitvā vipassanāvasena cittaṃ abhininnāmento apariyositeyeva bhojane anavasesato āsave khepetvā arahatte patiṭṭhāya khettapālaṃ āha ‘‘upāsaka, tava piṇḍapātabhojanena mayhaṃ rogo vūpasanto, kāyacittaṃ kallaṃ jātaṃ, tvampi imassa puññassa phalena vigatakāyacittadukkho bhavissasī’’ti vatvā anumodanaṃ katvā pakkāmi.
кзд̇д̇абаало абарзна самаязна гаалам̣ гад̇ваа д̇аавад̇им̣сабхаванз д̣̇ваад̣̇асаяож̇анигз ман̣ит̇амбхз ганагавимаанз сад̇д̇асад̇агуудааг̇аарабадиман̣д̣ид̇з взл̣урияамаяаг̇аб̣бхз ниб̣б̣ад̇д̇и, д̣̇ваарз жасса яат̇уубажид̇агаммасам̣суужаго муд̇д̇аасиггааг̇ад̇о суван̣н̣агаггадаго оламб̣амаано адтааси. ат̇ааяасмаа махаамог̇г̇аллаано буб̣б̣з вуд̇д̇анаязна д̇ад̇т̇а г̇ад̇о д̇ам̣ д̣̇исваа имаахи г̇аат̇аахи бужчи –
Khettapālo aparena samayena kālaṃ katvā tāvatiṃsabhavane dvādasayojanike maṇithambhe kanakavimāne sattasatakūṭāgārapaṭimaṇḍite veḷuriyamayagabbhe nibbatti, dvāre cassa yathūpacitakammasaṃsūcako muttāsikkāgato suvaṇṇakakkaṭako olambamāno aṭṭhāsi. Athāyasmā mahāmoggallāno pubbe vuttanayena tattha gato taṃ disvā imāhi gāthāhi pucchi –
910.
910.
‘‘ужжамид̣̇ам̣ ман̣ит̇уун̣ам̣ вимаанам̣, саманд̇ад̇о д̣̇ваад̣̇аса яож̇анаани;
‘‘Uccamidaṃ maṇithūṇaṃ vimānaṃ, samantato dvādasa yojanāni;
гуудааг̇аараа сад̇д̇асад̇аа ул̣аараа, взл̣урияат̇амбхаа ружагад̇т̇ад̇аа субхаа.
Kūṭāgārā sattasatā uḷārā, veḷuriyathambhā rucakatthatā subhā.
911.
911.
‘‘д̇ад̇т̇ажчаси биваси каад̣̇аси жа, д̣̇иб̣б̣аа жа вийн̣аа бавад̣̇анд̇и ваг̇г̇ум̣;
‘‘Tatthacchasi pivasi khādasi ca, dibbā ca vīṇā pavadanti vagguṃ;
д̣̇иб̣б̣аа расаа гаамаг̇ун̣зд̇т̇а бан̃жа, наарияо жа нажжанд̇и суван̣н̣ачаннаа.
Dibbā rasā kāmaguṇettha pañca, nāriyo ca naccanti suvaṇṇachannā.
912.
912.
‘‘гзна д̇зд̇аад̣̇исо ван̣н̣о, гзна д̇з ид̇ха миж̇жхад̇и;
‘‘Kena tetādiso vaṇṇo, kena te idha mijjhati;
уббаж̇ж̇анд̇и жа д̇з бхог̇аа, яз гзжи манасо бияаа.
Uppajjanti ca te bhogā, ye keci manaso piyā.
913.
913.
‘‘бужчаами д̇ам̣ д̣̇зва махаанубхаава, мануссабхууд̇о гимагааси бун̃н̃ам̣;
‘‘Pucchāmi taṃ deva mahānubhāva, manussabhūto kimakāsi puññaṃ;
гзнааси звам̣ ж̇алид̇аанубхааво, ван̣н̣о жа д̇з саб̣б̣ад̣̇исаа бабхаасад̇ий’’д̇и.
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
собисса б̣яаагааси, д̇ам̣ д̣̇ассзд̇ум̣ –
Sopissa byākāsi, taṃ dassetuṃ –
914.
914.
‘‘со д̣̇звабуд̇д̇о ад̇д̇амано, мог̇г̇аллаанзна бужчид̇о;
‘‘So devaputto attamano, moggallānena pucchito;
бан̃хам̣ будто вияаагааси, яасса гаммассид̣̇ам̣ пала’’нд̇и. – вуд̇д̇ам̣;
Pañhaṃ puṭṭho viyākāsi, yassa kammassidaṃ phala’’nti. – vuttaṃ;
915.
915.
‘‘сад̇исамуббаад̣̇агаро , д̣̇ваарз гаггадаго тид̇о;
‘‘Satisamuppādakaro , dvāre kakkaṭako ṭhito;
нидтид̇о ж̇аад̇аруубасса, собхад̇и д̣̇асабаад̣̇аго.
Niṭṭhito jātarūpassa, sobhati dasapādako.
916.
916.
‘‘д̇зна мзд̇аад̣̇исо ван̣н̣о, д̇зна мз ид̇ха миж̇жхад̇и;
‘‘Tena metādiso vaṇṇo, tena me idha mijjhati;
уббаж̇ж̇анд̇и жа мз бхог̇аа, яз гзжи манасо бияаа.
Uppajjanti ca me bhogā, ye keci manaso piyā.
917.
917.
‘‘агкаами д̇з бхигку махаанубхаава, мануссабхууд̇о яамагааси бун̃н̃ам̣;
‘‘Akkhāmi te bhikkhu mahānubhāva, manussabhūto yamakāsi puññaṃ;
д̇знамхи звам̣ ж̇алид̇аанубхааво, ван̣н̣о жа мз саб̣б̣ад̣̇исаа бабхаасад̇ий’’д̇и.
Tenamhi evaṃ jalitānubhāvo, vaṇṇo ca me sabbadisā pabhāsatī’’ti.
910. д̇ад̇т̇а ужжанд̇и ажжуг̇г̇ад̇ам̣. ман̣ит̇уун̣анд̇и бад̣̇умарааг̇аад̣̇иман̣имаяат̇амбхам̣. саманд̇ад̇од̇и жад̇уусуби бассзсу. ружагад̇т̇ад̇аад̇и д̇ассам̣ д̇ассам̣ бхуумияам̣ суван̣н̣апалагзхи ад̇т̇ад̇аа.
910. Tattha uccanti accuggataṃ. Maṇithūṇanti padumarāgādimaṇimayathambhaṃ. Samantatoti catūsupi passesu. Rucakatthatāti tassaṃ tassaṃ bhūmiyaṃ suvaṇṇaphalakehi atthatā.
911. биваси каад̣̇аси жаад̇и гаалзна гаалам̣ убаяуж̇ж̇амаанам̣ г̇анд̇хабаанам̣ суд̇хаабхож̇анан̃жа санд̇хааяа вад̣̇ад̇и. бавад̣̇анд̇ийд̇и баваж̇ж̇анд̇и. д̣̇иб̣б̣аа расаа гаамаг̇ун̣зд̇т̇а бан̃жаад̇и д̣̇иб̣б̣аа расаа анаббагаа бан̃жа гаамаг̇ун̣аа зд̇т̇а зд̇асмим̣ д̇ава вимаанз сам̣виж̇ж̇анд̇ийд̇и ад̇т̇о. суван̣н̣ачаннаад̇и хзмаабхаран̣авибхуусид̇аа.
911.Pivasi khādasi cāti kālena kālaṃ upayujjamānaṃ gandhapānaṃ sudhābhojanañca sandhāya vadati. Pavadantīti pavajjanti. Dibbā rasā kāmaguṇettha pañcāti dibbā rasā anappakā pañca kāmaguṇā ettha etasmiṃ tava vimāne saṃvijjantīti attho. Suvaṇṇachannāti hemābharaṇavibhūsitā.
915. сад̇исамуббаад̣̇агарод̇и сад̇уббаад̣̇агаро, язна бун̃н̃агаммзна аяам̣ д̣̇иб̣б̣асамбад̇д̇и маяаа лад̣̇д̇хаа, д̇ад̇т̇а сад̇уббаад̣̇асса гаараго, ‘‘гаггадагарасад̣̇аанзна аяам̣ д̇аяаа самбад̇д̇и лад̣̇д̇хаа’’д̇и звам̣ сад̇уббаад̣̇ам̣ гаронд̇од̇и ад̇т̇о. нидтид̇о ж̇аад̇аруубассаад̇и ж̇аад̇аруубзна сид̣̇д̇хо ж̇аад̇аруубамаяо. згамзгасмим̣ бассз бан̃жа бан̃жа гад̇ваа д̣̇аса баад̣̇аа зд̇ассаад̇и д̣̇асабаад̣̇аго д̣̇ваарз гаггадаго тид̇о собхад̇и. со зва мама бун̃н̃агаммам̣ д̇аад̣̇исаанам̣ махзсийнам̣ вибхаавзд̇и, на зд̇т̇а маяаа вад̇д̇аб̣б̣ам̣ ад̇т̇ийд̇и ад̇хиббааяо. д̇знааха ‘‘д̇зна мзд̇аад̣̇исо ван̣н̣о’’д̇иаад̣̇и. сзсам̣ вуд̇д̇анаяамзва.
915.Satisamuppādakaroti satuppādakaro, yena puññakammena ayaṃ dibbasampatti mayā laddhā, tattha satuppādassa kārako, ‘‘kakkaṭakarasadānena ayaṃ tayā sampatti laddhā’’ti evaṃ satuppādaṃ karontoti attho. Niṭṭhito jātarūpassāti jātarūpena siddho jātarūpamayo. Ekamekasmiṃ passe pañca pañca katvā dasa pādā etassāti dasapādako dvāre kakkaṭako ṭhito sobhati. So eva mama puññakammaṃ tādisānaṃ mahesīnaṃ vibhāveti, na ettha mayā vattabbaṃ atthīti adhippāyo. Tenāha ‘‘tena metādiso vaṇṇo’’tiādi. Sesaṃ vuttanayameva.
гаггадагарасад̣̇ааяагавимаанаван̣н̣анаа нидтид̇аа.
Kakkaṭakarasadāyakavimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 4. гаггадагарасад̣̇ааяагавимаанавад̇т̇у • 4. Kakkaṭakarasadāyakavimānavatthu
