| Library / Tipiṭaka / তিপিটক • Tipiṭaka / ৰিমানৰত্থুপাল়ি • Vimānavatthupāḷi |
৪. কক্কটকরসদাযকৰিমানৰত্থু
4. Kakkaṭakarasadāyakavimānavatthu
৯১০.
910.
‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি।
‘‘Uccamidaṃ maṇithūṇaṃ vimānaṃ, samantato dvādasa yojanāni;
কূটাগারা সত্তসতা উল়ারা, ৰেল়ুরিযথম্ভা রুচকত্থতা 1 সুভা॥
Kūṭāgārā sattasatā uḷārā, veḷuriyathambhā rucakatthatā 2 subhā.
৯১১.
911.
‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং 3।
‘‘Tatthacchasi pivasi khādasi ca, dibbā ca vīṇā pavadanti vagguṃ 4;
দিব্বা রসা কামগুণেত্থ পঞ্চ, নারিযো চ নচ্চন্তি সুৰণ্ণছন্না॥
Dibbā rasā kāmaguṇettha pañca, nāriyo ca naccanti suvaṇṇachannā.
৯১২.
912.
‘‘কেন তেতাদিসো ৰণ্ণো, কেন তে ইধ মিজ্ঝতি।
‘‘Kena tetādiso vaṇṇo, kena te idha mijjhati;
উপ্পজ্জন্তি চ তে ভোগা, যে কেচি মনসো পিযা॥
Uppajjanti ca te bhogā, ye keci manaso piyā.
৯১৩.
913.
‘‘পুচ্ছামি তং দেৰ মহানুভাৰ, মনুস্সভূতো কিমকাসি পুঞ্ঞং।
‘‘Pucchāmi taṃ deva mahānubhāva, manussabhūto kimakāsi puññaṃ;
কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
৯১৪.
914.
সো দেৰপুত্তো অত্তমনো, মোগ্গল্লানেন পুচ্ছিতো।
So devaputto attamano, moggallānena pucchito;
পঞ্হং পুট্ঠো ৰিযাকাসি, যস্স কম্মস্সিদং ফলং॥
Pañhaṃ puṭṭho viyākāsi, yassa kammassidaṃ phalaṃ.
৯১৫.
915.
‘‘সতিসমুপ্পাদকরো , দ্ৰারে কক্কটকো ঠিতো।
‘‘Satisamuppādakaro , dvāre kakkaṭako ṭhito;
নিট্ঠিতো জাতরূপস্স, সোভতি দসপাদকো॥
Niṭṭhito jātarūpassa, sobhati dasapādako.
৯১৬.
916.
‘‘তেন মেতাদিসো ৰণ্ণো, তেন মে ইধ মিজ্ঝতি।
‘‘Tena metādiso vaṇṇo, tena me idha mijjhati;
উপ্পজ্জন্তি চ মে ভোগা, যে কেচি মনসো পিযা॥
Uppajjanti ca me bhogā, ye keci manaso piyā.
৯১৭.
917.
‘‘অক্খামি তে ভিক্খু মহানুভাৰ, মনুস্সভূতো যমকাসি পুঞ্ঞং।
‘‘Akkhāmi te bhikkhu mahānubhāva, manussabhūto yamakāsi puññaṃ;
তেনম্হি এৰং জলিতানুভাৰো, ৰণ্ণো চ মে সব্বদিসা পভাসতী’’তি॥
Tenamhi evaṃ jalitānubhāvo, vaṇṇo ca me sabbadisā pabhāsatī’’ti.
কক্কটকরসদাযকৰিমানং চতুত্থং।
Kakkaṭakarasadāyakavimānaṃ catutthaṃ.
(অনন্তরং পঞ্চৰিমানং যথা কক্কটকরসদাযকৰিমানং তথা ৰিত্থারেতব্বং)
(Anantaraṃ pañcavimānaṃ yathā kakkaṭakarasadāyakavimānaṃ tathā vitthāretabbaṃ)
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ৰিমানৰত্থু-অট্ঠকথা • Vimānavatthu-aṭṭhakathā / ৪. কক্কটকরসদাযকৰিমানৰণ্ণনা • 4. Kakkaṭakarasadāyakavimānavaṇṇanā
