| Library / Tipiṭaka / තිපිටක • Tipiṭaka / විමානවත්‌ථුපාළි • Vimānavatthupāḷi |
4. කක්‌කටකරසදායකවිමානවත්‌ථු
4. Kakkaṭakarasadāyakavimānavatthu
910.
910.
‘‘උච්‌චමිදං මණිථූණං විමානං, සමන්‌තතො ද්‌වාදස යොජනානි;
‘‘Uccamidaṃ maṇithūṇaṃ vimānaṃ, samantato dvādasa yojanāni;
කූටාගාරා සත්‌තසතා උළාරා, වෙළුරියථම්‌භා රුචකත්‌ථතා 1 සුභා.
Kūṭāgārā sattasatā uḷārā, veḷuriyathambhā rucakatthatā 2 subhā.
911.
911.
‘‘තත්‌ථච්‌ඡසි පිවසි ඛාදසි ච, දිබ්‌බා ච වීණා පවදන්‌ති වග්‌ගුං 3;
‘‘Tatthacchasi pivasi khādasi ca, dibbā ca vīṇā pavadanti vagguṃ 4;
දිබ්‌බා රසා කාමගුණෙත්‌ථ පඤ්‌ච, නාරියො ච නච්‌චන්‌ති සුවණ්‌ණඡන්‌නා.
Dibbā rasā kāmaguṇettha pañca, nāriyo ca naccanti suvaṇṇachannā.
912.
912.
‘‘කෙන තෙතාදිසො වණ්‌ණො, කෙන තෙ ඉධ මිජ්‌ඣති;
‘‘Kena tetādiso vaṇṇo, kena te idha mijjhati;
උප්‌පජ්‌ජන්‌ති ච තෙ භොගා, යෙ කෙචි මනසො පියා.
Uppajjanti ca te bhogā, ye keci manaso piyā.
913.
913.
‘‘පුච්‌ඡාමි තං දෙව මහානුභාව, මනුස්‌සභූතො කිමකාසි පුඤ්‌ඤං;
‘‘Pucchāmi taṃ deva mahānubhāva, manussabhūto kimakāsi puññaṃ;
කෙනාසි එවං ජලිතානුභාවො, වණ්‌ණො ච තෙ සබ්‌බදිසා පභාසතී’’ති.
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
914.
914.
සො දෙවපුත්‌තො අත්‌තමනො, මොග්‌ගල්‌ලානෙන පුච්‌ඡිතො;
So devaputto attamano, moggallānena pucchito;
පඤ්‌හං පුට්‌ඨො වියාකාසි, යස්‌ස කම්‌මස්‌සිදං ඵලං.
Pañhaṃ puṭṭho viyākāsi, yassa kammassidaṃ phalaṃ.
915.
915.
‘‘සතිසමුප්‌පාදකරො , ද්‌වාරෙ කක්‌කටකො ඨිතො;
‘‘Satisamuppādakaro , dvāre kakkaṭako ṭhito;
නිට්‌ඨිතො ජාතරූපස්‌ස, සොභති දසපාදකො.
Niṭṭhito jātarūpassa, sobhati dasapādako.
916.
916.
‘‘තෙන මෙතාදිසො වණ්‌ණො, තෙන මෙ ඉධ මිජ්‌ඣති;
‘‘Tena metādiso vaṇṇo, tena me idha mijjhati;
උප්‌පජ්‌ජන්‌ති ච මෙ භොගා, යෙ කෙචි මනසො පියා.
Uppajjanti ca me bhogā, ye keci manaso piyā.
917.
917.
‘‘අක්‌ඛාමි තෙ භික්‌ඛු මහානුභාව, මනුස්‌සභූතො යමකාසි පුඤ්‌ඤං;
‘‘Akkhāmi te bhikkhu mahānubhāva, manussabhūto yamakāsi puññaṃ;
තෙනම්‌හි එවං ජලිතානුභාවො, වණ්‌ණො ච මෙ සබ්‌බදිසා පභාසතී’’ති.
Tenamhi evaṃ jalitānubhāvo, vaṇṇo ca me sabbadisā pabhāsatī’’ti.
කක්‌කටකරසදායකවිමානං චතුත්‌ථං.
Kakkaṭakarasadāyakavimānaṃ catutthaṃ.
(අනන්‌තරං පඤ්‌චවිමානං යථා කක්‌කටකරසදායකවිමානං තථා විත්‌ථාරෙතබ්‌බං)
(Anantaraṃ pañcavimānaṃ yathā kakkaṭakarasadāyakavimānaṃ tathā vitthāretabbaṃ)
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / විමානවත්‌ථු-අට්‌ඨකථා • Vimānavatthu-aṭṭhakathā / 4. කක්‌කටකරසදායකවිමානවණ්‌ණනා • 4. Kakkaṭakarasadāyakavimānavaṇṇanā
