| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. ককুধসুত্তৰণ্ণনা
8. Kakudhasuttavaṇṇanā
৯৯. ‘‘নন্দামী’’তি ৰুত্তে নন্দী নাম পব্বজিতস্স মলন্তি চোদেতুকামো দেৰপুত্তো ‘‘নন্দসী’’তি পুচ্ছি। অথস্স ভগৰা তং পটিক্খিপন্তো ‘‘কিং লদ্ধা’’তি? আহ। তেন ‘‘তযা মম অধিপ্পেতনন্দিযা ইধ পচ্চযো এৰ নত্থি, কুতো সা নন্দী’’তি দস্সেতি। তেনাহ ‘‘তুট্ঠি নামা’’তিআদি। অথ দেৰপুত্তো নন্দিযা অসতি সোকেন ভৰিতব্বং, সোকো চ পব্বজিতস্স মলন্তি চোদেন্তো আহ ‘‘তেন হি, সমণ, সোচসী’’তি। ভগৰা তম্পি পটিক্খিপন্তো ‘‘কিং জীযিত্থা’’তিআদিমাহ। কিং মং জিনাতীতি অত্থো?
99. ‘‘Nandāmī’’ti vutte nandī nāma pabbajitassa malanti codetukāmo devaputto ‘‘nandasī’’ti pucchi. Athassa bhagavā taṃ paṭikkhipanto ‘‘kiṃ laddhā’’ti? Āha. Tena ‘‘tayā mama adhippetanandiyā idha paccayo eva natthi, kuto sā nandī’’ti dasseti. Tenāha ‘‘tuṭṭhi nāmā’’tiādi. Atha devaputto nandiyā asati sokena bhavitabbaṃ, soko ca pabbajitassa malanti codento āha ‘‘tena hi, samaṇa, socasī’’ti. Bhagavā tampi paṭikkhipanto ‘‘kiṃ jīyitthā’’tiādimāha. Kiṃ maṃ jinātīti attho?
যদি তে নন্দিসোকা ন সন্তি হাসৰত্থুনো লাভস্স জানিযা চ অভাৰতো, একৰিহারিনো পন অরতিযা ভৰিতব্বন্তি আহ – ‘‘কচ্চি তং একমাসীনং, অরতী নাভিকীরতী’’তি। তস্মিম্পি ভগৰতা পটিক্খিত্তে অথ নেসম্পি নন্দিসোকারতীনং অভাৰে কারণং পুচ্ছন্তো ‘‘কথং ত্ৰ’’ন্তি গাথমাহ? অথস্স ভগৰা তং কারণং পৰেদেন্তো ‘‘অঘজাতস্সা’’তি গাথমাহ। তত্থ অঘজাতস্সাতি অঘে জাতস্স। তেনাহ ‘‘ৰট্টদুক্খে ঠিতস্সা’’তি। জাততণ্হস্স অপ্পহীনতণ্হস্স ৰট্টদুক্খং আগতমেৰ কারণস্স অপ্পহীনত্তা। তস্সেৰ হি কারণস্স অপ্পহীনতং দস্সেন্তো ‘‘দুক্খী সুখং পত্থযতীতি হি ৰুত্ত’’ন্তি আহ। দুক্খপ্পৰত্তিযা সাপি তণ্হাপ্পৰত্তি তেন দস্সিতা। ইতীতিআদিনা ৰুত্তমেৰত্থং নিগমনৰসেন দস্সেতি।
Yadi te nandisokā na santi hāsavatthuno lābhassa jāniyā ca abhāvato, ekavihārino pana aratiyā bhavitabbanti āha – ‘‘kacci taṃ ekamāsīnaṃ, aratī nābhikīratī’’ti. Tasmimpi bhagavatā paṭikkhitte atha nesampi nandisokāratīnaṃ abhāve kāraṇaṃ pucchanto ‘‘kathaṃ tva’’nti gāthamāha? Athassa bhagavā taṃ kāraṇaṃ pavedento ‘‘aghajātassā’’ti gāthamāha. Tattha aghajātassāti aghe jātassa. Tenāha ‘‘vaṭṭadukkhe ṭhitassā’’ti. Jātataṇhassa appahīnataṇhassa vaṭṭadukkhaṃ āgatameva kāraṇassa appahīnattā. Tasseva hi kāraṇassa appahīnataṃ dassento ‘‘dukkhī sukhaṃ patthayatīti hi vutta’’nti āha. Dukkhappavattiyā sāpi taṇhāppavatti tena dassitā. Itītiādinā vuttamevatthaṃ nigamanavasena dasseti.
ককুধসুত্তৰণ্ণনা নিট্ঠিতা।
Kakudhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. ককুধসুত্তং • 8. Kakudhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮-১০. ককুধসুত্তাদিৰণ্ণনা • 8-10. Kakudhasuttādivaṇṇanā
