| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. කකුධථෙරසුත්‌තවණ්‌ණනා
10. Kakudhatherasuttavaṇṇanā
100. දසමෙ අත්‌තභාවපටිලාභොති සරීරපටිලාභො. ද්‌වෙ වා තීණි වා මාගධකානි ගාමක්‌ඛෙත්‌තානීති එත්‌ථ මාගධිකං ගාමක්‌ඛෙත්‌තං අත්‌ථි ඛුද්‌දකං, අත්‌ථි මජ්‌ඣිමං, අත්‌ථි මහන්‌තං. ඛුද්‌දකං ගාමක්‌ඛෙත්‌තං ඉතො චත්‌තාලීසං උසභානි, ඉතො චත්‌තාලීසන්‌ති ගාවුතං හොති, මජ්‌ඣිමං ඉතො ගාවුතං, ඉතො ගාවුතන්‌ති අඩ්‌ඪයොජනං හොති, මහන්‌තං ඉතො දියඩ්‌ඪගාවුතං, ඉතො දියඩ්‌ඪගාවුතන්‌ති තිගාවුතං හොති. තෙසු ඛුද්‌දකෙන ගාමක්‌ඛෙත්‌තෙන තීණි, ඛුද්‌දකෙන ච මජ්‌ඣිමෙන ච ද්‌වෙ ගාමක්‌ඛෙත්‌තානි තස්‌ස අත්‌තභාවො. තිගාවුතඤ්‌හිස්‌ස සරීරං. පරිහරිස්‌සාමීති පටිජග්‌ගිස්‌සාමි ගොපයිස්‌සාමි. රක්‌ඛස්‌සෙතන්‌ති රක්‌ඛස්‌සු එතං. මොඝපුරිසොති තුච්‌ඡපුරිසො. නාස්‌සස්‌සාති න එතස්‌ස භවෙය්‍ය. සමුදාචරෙය්‍යාමාති කථෙය්‍යාම. සම්‌මන්‌නතීති සම්‌මානං කරොති. යං තුමො කරිස්‌සති තුමොව තෙන පඤ්‌ඤායිස්‌සතීති යං එස කරිස්‌සති, එසොව තෙන කම්‌මෙන පාකටො භවිස්‌සති. සෙසං සබ්‌බත්‌ථ උත්‌තානත්‌ථමෙවාති.
100. Dasame attabhāvapaṭilābhoti sarīrapaṭilābho. Dve vā tīṇi vā māgadhakāni gāmakkhettānīti ettha māgadhikaṃ gāmakkhettaṃ atthi khuddakaṃ, atthi majjhimaṃ, atthi mahantaṃ. Khuddakaṃ gāmakkhettaṃ ito cattālīsaṃ usabhāni, ito cattālīsanti gāvutaṃ hoti, majjhimaṃ ito gāvutaṃ, ito gāvutanti aḍḍhayojanaṃ hoti, mahantaṃ ito diyaḍḍhagāvutaṃ, ito diyaḍḍhagāvutanti tigāvutaṃ hoti. Tesu khuddakena gāmakkhettena tīṇi, khuddakena ca majjhimena ca dve gāmakkhettāni tassa attabhāvo. Tigāvutañhissa sarīraṃ. Pariharissāmīti paṭijaggissāmi gopayissāmi. Rakkhassetanti rakkhassu etaṃ. Moghapurisoti tucchapuriso. Nāssassāti na etassa bhaveyya. Samudācareyyāmāti katheyyāma. Sammannatīti sammānaṃ karoti. Yaṃ tumo karissati tumova tena paññāyissatīti yaṃ esa karissati, esova tena kammena pākaṭo bhavissati. Sesaṃ sabbattha uttānatthamevāti.
කකුධවග්‌ගො පඤ්‌චමො.
Kakudhavaggo pañcamo.
දුතියපණ්‌ණාසකං නිට්‌ඨිතං.
Dutiyapaṇṇāsakaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. කකුධථෙරසුත්‌තං • 10. Kakudhatherasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. පඨමසම්‌පදාසුත්‌තාදිවණ්‌ණනා • 1-10. Paṭhamasampadāsuttādivaṇṇanā
