| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
២៤. កកុសន្ធពុទ្ធវំសោ
24. Kakusandhabuddhavaṃso
១.
1.
វេស្សភុស្ស អបរេន, សម្ពុទ្ធោ ទ្វិបទុត្តមោ;
Vessabhussa aparena, sambuddho dvipaduttamo;
កកុសន្ធោ នាម នាមេន, អប្បមេយ្យោ ទុរាសទោ។
Kakusandho nāma nāmena, appameyyo durāsado.
២.
2.
ឧគ្ឃាដេត្វា សព្ពភវំ, ចរិយាយ បារមិំ គតោ;
Ugghāṭetvā sabbabhavaṃ, cariyāya pāramiṃ gato;
សីហោវ បញ្ជរំ ភេត្វា, បត្តោ សម្ពោធិមុត្តមំ។
Sīhova pañjaraṃ bhetvā, patto sambodhimuttamaṃ.
៣.
3.
ធម្មចក្កំ បវត្តេន្តេ, កកុសន្ធេ លោកនាយកេ;
Dhammacakkaṃ pavattente, kakusandhe lokanāyake;
ចត្តារីសកោដិសហស្សានំ, ធម្មាភិសមយោ អហុ។
Cattārīsakoṭisahassānaṃ, dhammābhisamayo ahu.
៤.
4.
អន្តលិក្ខម្ហិ អាកាសេ, យមកំ កត្វា វិកុព្ពនំ;
Antalikkhamhi ākāse, yamakaṃ katvā vikubbanaṃ;
តិំសកោដិសហស្សានំ, ពោធេសិ ទេវមានុសេ។
Tiṃsakoṭisahassānaṃ, bodhesi devamānuse.
៥.
5.
នរទេវស្ស យក្ខស្ស, ចតុសច្ចប្បកាសនេ;
Naradevassa yakkhassa, catusaccappakāsane;
ធម្មាភិសមយោ តស្ស, គណនាតោ អសង្ខិយោ។
Dhammābhisamayo tassa, gaṇanāto asaṅkhiyo.
៦.
6.
កកុសន្ធស្ស ភគវតោ, ឯកោ អាសិ សមាគមោ;
Kakusandhassa bhagavato, eko āsi samāgamo;
ខីណាសវានំ វិមលានំ, សន្តចិត្តាន តាទិនំ។
Khīṇāsavānaṃ vimalānaṃ, santacittāna tādinaṃ.
៧.
7.
ចត្តាលីសសហស្សានំ, តទា អាសិ សមាគមោ;
Cattālīsasahassānaṃ, tadā āsi samāgamo;
ទន្តភូមិមនុប្បត្តានំ, អាសវារិគណក្ខយា។
Dantabhūmimanuppattānaṃ, āsavārigaṇakkhayā.
៨.
8.
អហំ តេន សមយេន, ខេមោ នាមាសិ ខត្តិយោ;
Ahaṃ tena samayena, khemo nāmāsi khattiyo;
តថាគតេ ជិនបុត្តេ, ទានំ ទត្វា អនប្បកំ។
Tathāgate jinaputte, dānaṃ datvā anappakaṃ.
៩.
9.
បត្តញ្ច ចីវរំ ទត្វា, អញ្ជនំ មធុលដ្ឋិកំ;
Pattañca cīvaraṃ datvā, añjanaṃ madhulaṭṭhikaṃ;
ឥមេតំ បត្ថិតំ សព្ពំ, បដិយាទេមិ វរំ វរំ។
Imetaṃ patthitaṃ sabbaṃ, paṭiyādemi varaṃ varaṃ.
១០.
10.
សោបិ មំ ពុទ្ធោ ព្យាកាសិ, កកុសន្ធោ វិនាយកោ;
Sopi maṃ buddho byākāsi, kakusandho vināyako;
‘‘ឥមម្ហិ ភទ្ទកេ កប្បេ, អយំ ពុទ្ធោ ភវិស្សតិ។
‘‘Imamhi bhaddake kappe, ayaṃ buddho bhavissati.
១១.
11.
‘‘អហុ កបិលវ្ហយា រម្មា…បេ.… ហេស្សាម សម្មុខា ឥមំ’’។
‘‘Ahu kapilavhayā rammā…pe… hessāma sammukhā imaṃ’’.
១២.
12.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៣.
13.
នគរំ ខេមាវតី នាម, ខេមោ នាមាសហំ តទា;
Nagaraṃ khemāvatī nāma, khemo nāmāsahaṃ tadā;
សព្ពញ្ញុតំ គវេសន្តោ, បព្ពជិំ តស្ស សន្តិកេ។
Sabbaññutaṃ gavesanto, pabbajiṃ tassa santike.
១៤.
14.
ព្រាហ្មណោ អគ្គិទត្តោ ច, អាសិ ពុទ្ធស្ស សោ បិតា;
Brāhmaṇo aggidatto ca, āsi buddhassa so pitā;
វិសាខា នាម ជនិកា, កកុសន្ធស្ស សត្ថុនោ។
Visākhā nāma janikā, kakusandhassa satthuno.
១៥.
15.
វសតេ តត្ថ ខេមេ បុរេ, សម្ពុទ្ធស្ស មហាកុលំ;
Vasate tattha kheme pure, sambuddhassa mahākulaṃ;
នរានំ បវរំ សេដ្ឋំ, ជាតិមន្តំ មហាយសំ។
Narānaṃ pavaraṃ seṭṭhaṃ, jātimantaṃ mahāyasaṃ.
១៦.
16.
ចតុវស្សសហស្សានិ, អគារំ អជ្ឈ សោ វសិ;
Catuvassasahassāni, agāraṃ ajjha so vasi;
កាម -កាមវណ្ណ-កាមសុទ្ធិនាមា 1, តយោ បាសាទមុត្តមា។
Kāma -kāmavaṇṇa-kāmasuddhināmā 2, tayo pāsādamuttamā.
១៧.
17.
សមតិំសសហស្សានិ , នារិយោ សមលង្កតា;
Samatiṃsasahassāni , nāriyo samalaṅkatā;
រោចិនី នាម សា នារី, ឧត្តរោ នាម អត្រជោ។
Rocinī nāma sā nārī, uttaro nāma atrajo.
១៨.
18.
និមិត្តេ ចតុរោ ទិស្វា, រថយានេន និក្ខមិ;
Nimitte caturo disvā, rathayānena nikkhami;
អនូនអដ្ឋមាសានិ, បធានំ បទហី ជិនោ។
Anūnaaṭṭhamāsāni, padhānaṃ padahī jino.
១៩.
19.
ព្រហ្មុនា យាចិតោ សន្តោ, កកុសន្ធោ វិនាយកោ;
Brahmunā yācito santo, kakusandho vināyako;
វត្តិ ចក្កំ មហាវីរោ, មិគទាយេ នរុត្តមោ។
Vatti cakkaṃ mahāvīro, migadāye naruttamo.
២០.
20.
វិធុរោ ច សញ្ជីវោ ច, អហេសុំ អគ្គសាវកា;
Vidhuro ca sañjīvo ca, ahesuṃ aggasāvakā;
ពុទ្ធិជោ នាមុបដ្ឋាកោ, កកុសន្ធស្ស សត្ថុនោ។
Buddhijo nāmupaṭṭhāko, kakusandhassa satthuno.
២១.
21.
សាមា ច ចម្បានាមា ច, អហេសុំ អគ្គសាវិកា;
Sāmā ca campānāmā ca, ahesuṃ aggasāvikā;
ពោធិ តស្ស ភគវតោ, សិរីសោតិ បវុច្ចតិ។
Bodhi tassa bhagavato, sirīsoti pavuccati.
២២.
22.
អច្ចុតោ ច សុមនោ ច, អហេសុំ អគ្គុបដ្ឋកា;
Accuto ca sumano ca, ahesuṃ aggupaṭṭhakā;
នន្ទា ចេវ សុនន្ទា ច, អហេសុំ អគ្គុបដ្ឋិកា។
Nandā ceva sunandā ca, ahesuṃ aggupaṭṭhikā.
២៣.
23.
ចត្តាលីសរតនានិ , អច្ចុគ្គតោ មហាមុនិ;
Cattālīsaratanāni , accuggato mahāmuni;
កនកប្បភា និច្ឆរតិ, សមន្តា ទសយោជនំ។
Kanakappabhā niccharati, samantā dasayojanaṃ.
២៤.
24.
ចត្តាលីសវស្សសហស្សានិ, អាយុ តស្ស មហេសិនោ;
Cattālīsavassasahassāni, āyu tassa mahesino;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៥.
25.
ធម្មាបណំ បសារេត្វា, នរនារីនំ សទេវកេ;
Dhammāpaṇaṃ pasāretvā, naranārīnaṃ sadevake;
នទិត្វា សីហនាទំវ, និព្ពុតោ សោ សសាវកោ។
Naditvā sīhanādaṃva, nibbuto so sasāvako.
២៦.
26.
អដ្ឋង្គវចនសម្បន្នោ, អច្ឆិទ្ទានិ និរន្តរំ;
Aṭṭhaṅgavacanasampanno, acchiddāni nirantaraṃ;
សព្ពំ តមន្តរហិតំ, ននុ រិត្តា សព្ពសង្ខារា។
Sabbaṃ tamantarahitaṃ, nanu rittā sabbasaṅkhārā.
២៧.
27.
កកុសន្ធោ ជិនវរោ, ខេមារាមម្ហិ និព្ពុតោ;
Kakusandho jinavaro, khemārāmamhi nibbuto;
តត្ថេវស្ស ថូបវរោ, គាវុតំ នភមុគ្គតោតិ។
Tatthevassa thūpavaro, gāvutaṃ nabhamuggatoti.
កកុសន្ធស្ស ភគវតោ វំសោ ទ្វាវីសតិមោ។
Kakusandhassa bhagavato vaṃso dvāvīsatimo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ២៤. កកុសន្ធពុទ្ធវំសវណ្ណនា • 24. Kakusandhabuddhavaṃsavaṇṇanā
