| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೪. ಕಕುಸನ್ಧಬುದ್ಧವಂಸೋ
24. Kakusandhabuddhavaṃso
೧.
1.
ವೇಸ್ಸಭುಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Vessabhussa aparena, sambuddho dvipaduttamo;
ಕಕುಸನ್ಧೋ ನಾಮ ನಾಮೇನ, ಅಪ್ಪಮೇಯ್ಯೋ ದುರಾಸದೋ॥
Kakusandho nāma nāmena, appameyyo durāsado.
೨.
2.
ಉಗ್ಘಾಟೇತ್ವಾ ಸಬ್ಬಭವಂ, ಚರಿಯಾಯ ಪಾರಮಿಂ ಗತೋ।
Ugghāṭetvā sabbabhavaṃ, cariyāya pāramiṃ gato;
ಸೀಹೋವ ಪಞ್ಜರಂ ಭೇತ್ವಾ, ಪತ್ತೋ ಸಮ್ಬೋಧಿಮುತ್ತಮಂ॥
Sīhova pañjaraṃ bhetvā, patto sambodhimuttamaṃ.
೩.
3.
ಧಮ್ಮಚಕ್ಕಂ ಪವತ್ತೇನ್ತೇ, ಕಕುಸನ್ಧೇ ಲೋಕನಾಯಕೇ।
Dhammacakkaṃ pavattente, kakusandhe lokanāyake;
ಚತ್ತಾರೀಸಕೋಟಿಸಹಸ್ಸಾನಂ, ಧಮ್ಮಾಭಿಸಮಯೋ ಅಹು॥
Cattārīsakoṭisahassānaṃ, dhammābhisamayo ahu.
೪.
4.
ಅನ್ತಲಿಕ್ಖಮ್ಹಿ ಆಕಾಸೇ, ಯಮಕಂ ಕತ್ವಾ ವಿಕುಬ್ಬನಂ।
Antalikkhamhi ākāse, yamakaṃ katvā vikubbanaṃ;
ತಿಂಸಕೋಟಿಸಹಸ್ಸಾನಂ, ಬೋಧೇಸಿ ದೇವಮಾನುಸೇ॥
Tiṃsakoṭisahassānaṃ, bodhesi devamānuse.
೫.
5.
ನರದೇವಸ್ಸ ಯಕ್ಖಸ್ಸ, ಚತುಸಚ್ಚಪ್ಪಕಾಸನೇ।
Naradevassa yakkhassa, catusaccappakāsane;
ಧಮ್ಮಾಭಿಸಮಯೋ ತಸ್ಸ, ಗಣನಾತೋ ಅಸಙ್ಖಿಯೋ॥
Dhammābhisamayo tassa, gaṇanāto asaṅkhiyo.
೬.
6.
ಕಕುಸನ್ಧಸ್ಸ ಭಗವತೋ, ಏಕೋ ಆಸಿ ಸಮಾಗಮೋ।
Kakusandhassa bhagavato, eko āsi samāgamo;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೭.
7.
ಚತ್ತಾಲೀಸಸಹಸ್ಸಾನಂ, ತದಾ ಆಸಿ ಸಮಾಗಮೋ।
Cattālīsasahassānaṃ, tadā āsi samāgamo;
ದನ್ತಭೂಮಿಮನುಪ್ಪತ್ತಾನಂ, ಆಸವಾರಿಗಣಕ್ಖಯಾ॥
Dantabhūmimanuppattānaṃ, āsavārigaṇakkhayā.
೮.
8.
ಅಹಂ ತೇನ ಸಮಯೇನ, ಖೇಮೋ ನಾಮಾಸಿ ಖತ್ತಿಯೋ।
Ahaṃ tena samayena, khemo nāmāsi khattiyo;
ತಥಾಗತೇ ಜಿನಪುತ್ತೇ, ದಾನಂ ದತ್ವಾ ಅನಪ್ಪಕಂ॥
Tathāgate jinaputte, dānaṃ datvā anappakaṃ.
೯.
9.
ಪತ್ತಞ್ಚ ಚೀವರಂ ದತ್ವಾ, ಅಞ್ಜನಂ ಮಧುಲಟ್ಠಿಕಂ।
Pattañca cīvaraṃ datvā, añjanaṃ madhulaṭṭhikaṃ;
ಇಮೇತಂ ಪತ್ಥಿತಂ ಸಬ್ಬಂ, ಪಟಿಯಾದೇಮಿ ವರಂ ವರಂ॥
Imetaṃ patthitaṃ sabbaṃ, paṭiyādemi varaṃ varaṃ.
೧೦.
10.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಕಕುಸನ್ಧೋ ವಿನಾಯಕೋ।
Sopi maṃ buddho byākāsi, kakusandho vināyako;
‘‘ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Imamhi bhaddake kappe, ayaṃ buddho bhavissati.
೧೧.
11.
‘‘ಅಹು ಕಪಿಲವ್ಹಯಾ ರಮ್ಮಾ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Ahu kapilavhayā rammā…pe… hessāma sammukhā imaṃ’’.
೧೨.
12.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೩.
13.
ನಗರಂ ಖೇಮಾವತೀ ನಾಮ, ಖೇಮೋ ನಾಮಾಸಹಂ ತದಾ।
Nagaraṃ khemāvatī nāma, khemo nāmāsahaṃ tadā;
ಸಬ್ಬಞ್ಞುತಂ ಗವೇಸನ್ತೋ, ಪಬ್ಬಜಿಂ ತಸ್ಸ ಸನ್ತಿಕೇ॥
Sabbaññutaṃ gavesanto, pabbajiṃ tassa santike.
೧೪.
14.
ಬ್ರಾಹ್ಮಣೋ ಅಗ್ಗಿದತ್ತೋ ಚ, ಆಸಿ ಬುದ್ಧಸ್ಸ ಸೋ ಪಿತಾ।
Brāhmaṇo aggidatto ca, āsi buddhassa so pitā;
ವಿಸಾಖಾ ನಾಮ ಜನಿಕಾ, ಕಕುಸನ್ಧಸ್ಸ ಸತ್ಥುನೋ॥
Visākhā nāma janikā, kakusandhassa satthuno.
೧೫.
15.
ವಸತೇ ತತ್ಥ ಖೇಮೇ ಪುರೇ, ಸಮ್ಬುದ್ಧಸ್ಸ ಮಹಾಕುಲಂ।
Vasate tattha kheme pure, sambuddhassa mahākulaṃ;
ನರಾನಂ ಪವರಂ ಸೇಟ್ಠಂ, ಜಾತಿಮನ್ತಂ ಮಹಾಯಸಂ॥
Narānaṃ pavaraṃ seṭṭhaṃ, jātimantaṃ mahāyasaṃ.
೧೬.
16.
ಚತುವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Catuvassasahassāni, agāraṃ ajjha so vasi;
ಕಾಮ -ಕಾಮವಣ್ಣ-ಕಾಮಸುದ್ಧಿನಾಮಾ 1, ತಯೋ ಪಾಸಾದಮುತ್ತಮಾ॥
Kāma -kāmavaṇṇa-kāmasuddhināmā 2, tayo pāsādamuttamā.
೧೭.
17.
ಸಮತಿಂಸಸಹಸ್ಸಾನಿ , ನಾರಿಯೋ ಸಮಲಙ್ಕತಾ।
Samatiṃsasahassāni , nāriyo samalaṅkatā;
ರೋಚಿನೀ ನಾಮ ಸಾ ನಾರೀ, ಉತ್ತರೋ ನಾಮ ಅತ್ರಜೋ॥
Rocinī nāma sā nārī, uttaro nāma atrajo.
೧೮.
18.
ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ।
Nimitte caturo disvā, rathayānena nikkhami;
ಅನೂನಅಟ್ಠಮಾಸಾನಿ, ಪಧಾನಂ ಪದಹೀ ಜಿನೋ॥
Anūnaaṭṭhamāsāni, padhānaṃ padahī jino.
೧೯.
19.
ಬ್ರಹ್ಮುನಾ ಯಾಚಿತೋ ಸನ್ತೋ, ಕಕುಸನ್ಧೋ ವಿನಾಯಕೋ।
Brahmunā yācito santo, kakusandho vināyako;
ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ॥
Vatti cakkaṃ mahāvīro, migadāye naruttamo.
೨೦.
20.
ವಿಧುರೋ ಚ ಸಞ್ಜೀವೋ ಚ, ಅಹೇಸುಂ ಅಗ್ಗಸಾವಕಾ।
Vidhuro ca sañjīvo ca, ahesuṃ aggasāvakā;
ಬುದ್ಧಿಜೋ ನಾಮುಪಟ್ಠಾಕೋ, ಕಕುಸನ್ಧಸ್ಸ ಸತ್ಥುನೋ॥
Buddhijo nāmupaṭṭhāko, kakusandhassa satthuno.
೨೧.
21.
ಸಾಮಾ ಚ ಚಮ್ಪಾನಾಮಾ ಚ, ಅಹೇಸುಂ ಅಗ್ಗಸಾವಿಕಾ।
Sāmā ca campānāmā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಸಿರೀಸೋತಿ ಪವುಚ್ಚತಿ॥
Bodhi tassa bhagavato, sirīsoti pavuccati.
೨೨.
22.
ಅಚ್ಚುತೋ ಚ ಸುಮನೋ ಚ, ಅಹೇಸುಂ ಅಗ್ಗುಪಟ್ಠಕಾ।
Accuto ca sumano ca, ahesuṃ aggupaṭṭhakā;
ನನ್ದಾ ಚೇವ ಸುನನ್ದಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Nandā ceva sunandā ca, ahesuṃ aggupaṭṭhikā.
೨೩.
23.
ಚತ್ತಾಲೀಸರತನಾನಿ , ಅಚ್ಚುಗ್ಗತೋ ಮಹಾಮುನಿ।
Cattālīsaratanāni , accuggato mahāmuni;
ಕನಕಪ್ಪಭಾ ನಿಚ್ಛರತಿ, ಸಮನ್ತಾ ದಸಯೋಜನಂ॥
Kanakappabhā niccharati, samantā dasayojanaṃ.
೨೪.
24.
ಚತ್ತಾಲೀಸವಸ್ಸಸಹಸ್ಸಾನಿ, ಆಯು ತಸ್ಸ ಮಹೇಸಿನೋ।
Cattālīsavassasahassāni, āyu tassa mahesino;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೫.
25.
ಧಮ್ಮಾಪಣಂ ಪಸಾರೇತ್ವಾ, ನರನಾರೀನಂ ಸದೇವಕೇ।
Dhammāpaṇaṃ pasāretvā, naranārīnaṃ sadevake;
ನದಿತ್ವಾ ಸೀಹನಾದಂವ, ನಿಬ್ಬುತೋ ಸೋ ಸಸಾವಕೋ॥
Naditvā sīhanādaṃva, nibbuto so sasāvako.
೨೬.
26.
ಅಟ್ಠಙ್ಗವಚನಸಮ್ಪನ್ನೋ, ಅಚ್ಛಿದ್ದಾನಿ ನಿರನ್ತರಂ।
Aṭṭhaṅgavacanasampanno, acchiddāni nirantaraṃ;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೨೭.
27.
ಕಕುಸನ್ಧೋ ಜಿನವರೋ, ಖೇಮಾರಾಮಮ್ಹಿ ನಿಬ್ಬುತೋ।
Kakusandho jinavaro, khemārāmamhi nibbuto;
ತತ್ಥೇವಸ್ಸ ಥೂಪವರೋ, ಗಾವುತಂ ನಭಮುಗ್ಗತೋತಿ॥
Tatthevassa thūpavaro, gāvutaṃ nabhamuggatoti.
ಕಕುಸನ್ಧಸ್ಸ ಭಗವತೋ ವಂಸೋ ದ್ವಾವೀಸತಿಮೋ।
Kakusandhassa bhagavato vaṃso dvāvīsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೨೪. ಕಕುಸನ್ಧಬುದ್ಧವಂಸವಣ್ಣನಾ • 24. Kakusandhabuddhavaṃsavaṇṇanā
