| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
ககுஸந்தோ⁴ பு³த்³தோ⁴
Kakusandho buddho
தஸ்ஸ அபரபா⁴கே³ இமஸ்மிங் கப்பே சத்தாரோ பு³த்³தா⁴ நிப்³ப³த்தா ககுஸந்தோ⁴, கோணாக³மனோ, கஸ்ஸபோ, அம்ஹாகங் ப⁴க³வாதி. ககுஸந்த⁴ஸ்ஸ ப⁴க³வதோ ஏகோவ ஸாவகஸன்னிபாதோ, தத்த² சத்தாலீஸ பி⁴க்கு²ஸஹஸ்ஸானி அஹேஸுங். ததா³ போ³தி⁴ஸத்தோ கே²மோ நாம ராஜா ஹுத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ ஸபத்தசீவரங் மஹாதா³னஞ்சேவ அஞ்ஜனாதி³பே⁴ஸஜ்ஜானி ச த³த்வா ஸத்து² த⁴ம்மதே³ஸனங் ஸுத்வா பப்³ப³ஜி. ஸோபி நங் ஸத்தா² ‘‘பு³த்³தோ⁴ ப⁴விஸ்ஸதீ’’தி ப்³யாகாஸி. ககுஸந்த⁴ஸ்ஸ பன ப⁴க³வதோ கே²மங் நாம நக³ரங் அஹோஸி, அக்³கி³த³த்தோ நாம ப்³ராஹ்மணோ பிதா, விஸாகா² நாம ப்³ராஹ்மணீ மாதா, விது⁴ரோ ச ஸஞ்ஜீவோ ச த்³வே அக்³க³ஸாவகா, பு³த்³தி⁴ஜோ நாமுபட்டா²கோ, ஸாமா ச சம்பா ச த்³வே அக்³க³ஸாவிகா, மஹாஸிரீஸருக்கோ² போ³தி⁴, ஸரீரங் சத்தாலீஸஹத்து²ப்³பே³த⁴ங் அஹோஸி, சத்தாலீஸ வஸ்ஸஸஹஸ்ஸானி ஆயூதி.
Tassa aparabhāge imasmiṃ kappe cattāro buddhā nibbattā kakusandho, koṇāgamano, kassapo, amhākaṃ bhagavāti. Kakusandhassa bhagavato ekova sāvakasannipāto, tattha cattālīsa bhikkhusahassāni ahesuṃ. Tadā bodhisatto khemo nāma rājā hutvā buddhappamukhassa bhikkhusaṅghassa sapattacīvaraṃ mahādānañceva añjanādibhesajjāni ca datvā satthu dhammadesanaṃ sutvā pabbaji. Sopi naṃ satthā ‘‘buddho bhavissatī’’ti byākāsi. Kakusandhassa pana bhagavato khemaṃ nāma nagaraṃ ahosi, aggidatto nāma brāhmaṇo pitā, visākhā nāma brāhmaṇī mātā, vidhuro ca sañjīvo ca dve aggasāvakā, buddhijo nāmupaṭṭhāko, sāmā ca campā ca dve aggasāvikā, mahāsirīsarukkho bodhi, sarīraṃ cattālīsahatthubbedhaṃ ahosi, cattālīsa vassasahassāni āyūti.
‘‘வெஸ்ஸபு⁴ஸ்ஸ அபரேன, ஸம்பு³த்³தோ⁴ த்³விபது³த்தமோ;
‘‘Vessabhussa aparena, sambuddho dvipaduttamo;
ககுஸந்தோ⁴ நாம நாமேன, அப்பமெய்யோ து³ராஸதோ³’’தி. (பு³॰ வங்॰ 24.1);
Kakusandho nāma nāmena, appameyyo durāsado’’ti. (bu. vaṃ. 24.1);
