| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๑๑. กลหวิวาทสุตฺตํ
11. Kalahavivādasuttaṃ
๘๖๘.
868.
‘‘กุโตปหูตา กลหา วิวาทา, ปริเทวโสกา สหมจฺฉรา จ;
‘‘Kutopahūtā kalahā vivādā, paridevasokā sahamaccharā ca;
มานาติมานา สหเปสุณา จ, กุโตปหูตา เต ตทิงฺฆ พฺรูหิ’’ฯ
Mānātimānā sahapesuṇā ca, kutopahūtā te tadiṅgha brūhi’’.
๘๖๙.
869.
‘‘ปิยปฺปหูตา กลหา วิวาทา,
‘‘Piyappahūtā kalahā vivādā,
ปริเทวโสกา สหมจฺฉรา จ;
Paridevasokā sahamaccharā ca;
มานาติมานา สหเปสุณา จ,
Mānātimānā sahapesuṇā ca,
มเจฺฉรยุตฺตา กลหา วิวาทา;
Maccherayuttā kalahā vivādā;
วิวาทชาเตสุ จ เปสุณานิ’’ฯ
Vivādajātesu ca pesuṇāni’’.
๘๗๐.
870.
อาสา จ นิฎฺฐา จ กุโตนิทานา, เย สมฺปรายาย นรสฺส โหนฺติ’’ฯ
Āsā ca niṭṭhā ca kutonidānā, ye samparāyāya narassa honti’’.
๘๗๑.
871.
‘‘ฉนฺทานิทานานิ ปิยานิ โลเก, เย จาปิ โลภา วิจรนฺติ โลเก;
‘‘Chandānidānāni piyāni loke, ye cāpi lobhā vicaranti loke;
อาสา จ นิฎฺฐา จ อิโตนิทานา, เย สมฺปรายาย นรสฺส โหนฺติ’’ฯ
Āsā ca niṭṭhā ca itonidānā, ye samparāyāya narassa honti’’.
๘๗๒.
872.
‘‘ฉโนฺท นุ โลกสฺมิํ กุโตนิทาโน, วินิจฺฉยา จาปิ 5 กุโตปหูตา;
‘‘Chando nu lokasmiṃ kutonidāno, vinicchayā cāpi 6 kutopahūtā;
โกโธ โมสวชฺชญฺจ กถํกถา จ, เย วาปิ ธมฺมา สมเณน วุตฺตา’’ฯ
Kodho mosavajjañca kathaṃkathā ca, ye vāpi dhammā samaṇena vuttā’’.
๘๗๓.
873.
‘‘สาตํ อสาตนฺติ ยมาหุ โลเก, ตมูปนิสฺสาย ปโหติ ฉโนฺท;
‘‘Sātaṃ asātanti yamāhu loke, tamūpanissāya pahoti chando;
รูเปสุ ทิสฺวา วิภวํ ภวญฺจ, วินิจฺฉยํ กุพฺพติ 7 ชนฺตุ โลเกฯ
Rūpesu disvā vibhavaṃ bhavañca, vinicchayaṃ kubbati 8 jantu loke.
๘๗๔.
874.
‘‘โกโธ โมสวชฺชญฺจ กถํกถา จ, เอเตปิ ธมฺมา ทฺวยเมว สเนฺต;
‘‘Kodho mosavajjañca kathaṃkathā ca, etepi dhammā dvayameva sante;
กถํกถี ญาณปถาย สิเกฺข, ญตฺวา ปวุตฺตา สมเณน ธมฺมา’’ฯ
Kathaṃkathī ñāṇapathāya sikkhe, ñatvā pavuttā samaṇena dhammā’’.
๘๗๕.
875.
‘‘สาตํ อสาตญฺจ กุโตนิทานา, กิสฺมิํ อสเนฺต น ภวนฺติ เหเต;
‘‘Sātaṃ asātañca kutonidānā, kismiṃ asante na bhavanti hete;
วิภวํ ภวญฺจาปิ ยเมตมตฺถํ, เอตํ เม ปพฺรูหิ ยโตนิทานํ’’ฯ
Vibhavaṃ bhavañcāpi yametamatthaṃ, etaṃ me pabrūhi yatonidānaṃ’’.
๘๗๖.
876.
‘‘ผสฺสนิทานํ สาตํ อสาตํ, ผเสฺส อสเนฺต น ภวนฺติ เหเต;
‘‘Phassanidānaṃ sātaṃ asātaṃ, phasse asante na bhavanti hete;
วิภวํ ภวญฺจาปิ ยเมตมตฺถํ, เอตํ เต ปพฺรูมิ อิโตนิทานํ’’ฯ
Vibhavaṃ bhavañcāpi yametamatthaṃ, etaṃ te pabrūmi itonidānaṃ’’.
๘๗๗.
877.
‘‘ผโสฺส นุ โลกสฺมิ กุโตนิทาโน, ปริคฺคหา จาปิ กุโตปหูตา;
‘‘Phasso nu lokasmi kutonidāno, pariggahā cāpi kutopahūtā;
กิสฺมิํ อสเนฺต น มมตฺตมตฺถิ, กิสฺมิํ วิภูเต น ผุสนฺติ ผสฺสา’’ฯ
Kismiṃ asante na mamattamatthi, kismiṃ vibhūte na phusanti phassā’’.
๘๗๘.
878.
‘‘นามญฺจ รูปญฺจ ปฎิจฺจ ผโสฺส, อิจฺฉานิทานานิ ปริคฺคหานิ;
‘‘Nāmañca rūpañca paṭicca phasso, icchānidānāni pariggahāni;
อิจฺฉายสนฺตฺยา น มมตฺตมตฺถิ, รูเป วิภูเต น ผุสนฺติ ผสฺสา’’ฯ
Icchāyasantyā na mamattamatthi, rūpe vibhūte na phusanti phassā’’.
๘๗๙.
879.
‘‘กถํสเมตสฺส วิโภติ รูปํ, สุขํ ทุขญฺจาปิ 9 กถํ วิโภติ;
‘‘Kathaṃsametassa vibhoti rūpaṃ, sukhaṃ dukhañcāpi 10 kathaṃ vibhoti;
เอตํ เม ปพฺรูหิ ยถา วิโภติ, ตํ ชานิยามาติ 11 เม มโน อหุ’’ฯ
Etaṃ me pabrūhi yathā vibhoti, taṃ jāniyāmāti 12 me mano ahu’’.
๘๘๐.
880.
‘‘น สญฺญสญฺญี น วิสญฺญสญฺญี, โนปิ อสญฺญี น วิภูตสญฺญี;
‘‘Na saññasaññī na visaññasaññī, nopi asaññī na vibhūtasaññī;
เอวํสเมตสฺส วิโภติ รูปํ, สญฺญานิทานา หิ ปปญฺจสงฺขา’’ฯ
Evaṃsametassa vibhoti rūpaṃ, saññānidānā hi papañcasaṅkhā’’.
๘๘๑.
881.
‘‘ยํ ตํ อปุจฺฉิมฺห อกิตฺตยี โน,
‘‘Yaṃ taṃ apucchimha akittayī no,
อญฺญํ ตํ ปุจฺฉาม ตทิงฺฆ พฺรูหิ;
Aññaṃ taṃ pucchāma tadiṅgha brūhi;
ยกฺขสฺส สุทฺธิํ อิธ ปณฺฑิตาเส;
Yakkhassa suddhiṃ idha paṇḍitāse;
อุทาหุ อญฺญมฺปิ วทนฺติ เอโตฺตฯ
Udāhu aññampi vadanti etto.
๘๘๒.
882.
‘‘เอตฺตาวตคฺคมฺปิ วทนฺติ เหเก, ยกฺขสฺส สุทฺธิํ อิธ ปณฺฑิตาเส;
‘‘Ettāvataggampi vadanti heke, yakkhassa suddhiṃ idha paṇḍitāse;
เตสํ ปเนเก สมยํ วทนฺติ, อนุปาทิเสเส กุสลา วทานาฯ
Tesaṃ paneke samayaṃ vadanti, anupādisese kusalā vadānā.
๘๘๓.
883.
‘‘เอเต จ ญตฺวา อุปนิสฺสิตาติ, ญตฺวา มุนี นิสฺสเย โส วิมํสี;
‘‘Ete ca ñatvā upanissitāti, ñatvā munī nissaye so vimaṃsī;
ญตฺวา วิมุโตฺต น วิวาทเมติ, ภวาภวาย น สเมติ ธีโร’’ติฯ
Ñatvā vimutto na vivādameti, bhavābhavāya na sameti dhīro’’ti.
กลหวิวาทสุตฺตํ เอกาทสมํ นิฎฺฐิตํฯ
Kalahavivādasuttaṃ ekādasamaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๑๑. กลหวิวาทสุตฺตวณฺณนา • 11. Kalahavivādasuttavaṇṇanā
