| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
11. கலஹவிவாத³ஸுத்தனித்³தே³ஸவண்ணனா
11. Kalahavivādasuttaniddesavaṇṇanā
97. ஏகாத³ஸமே கலஹவிவாத³ஸுத்தனித்³தே³ஸே குதோபஹூதா கலஹா விவாதா³தி கலஹோ ச தஸ்ஸ புப்³ப³பா⁴கோ³ விவாதோ³ சாதி இமே குதோ ஜாதா. பரிதே³வஸோகா ஸஹமச்ச²ரா சாதி பரிதே³வஸோகா ச ஸஹமச்ச²ரா ச குதோ பஹூதா. மானாதிமானா ஸஹபேஸுணா சாதி மானா ச அதிமானா ச பேஸுணா ச குதோ பஹூதா. தேதி தே ஸப்³பே³பி அட்ட² கிலேஸத⁴ம்மா. ததி³ங்க⁴ ப்³யூஹீதி தங் மயா புச்சி²தமத்த²ங் ப்³ரூஹி, யாசாமி தங் அஹந்தி. யாசனத்தோ² ஹி இங்கா⁴தி நிபாதோ.
97. Ekādasame kalahavivādasuttaniddese kutopahūtā kalahā vivādāti kalaho ca tassa pubbabhāgo vivādo cāti ime kuto jātā. Paridevasokā sahamaccharā cāti paridevasokā ca sahamaccharā ca kuto pahūtā. Mānātimānā sahapesuṇā cāti mānā ca atimānā ca pesuṇā ca kuto pahūtā. Teti te sabbepi aṭṭha kilesadhammā. Tadiṅgha byūhīti taṃ mayā pucchitamatthaṃ brūhi, yācāmi taṃ ahanti. Yācanattho hi iṅghāti nipāto.
ஏகேன ஆகாரேனாதி ஏகேன காரணேன. அபரேன ஆகாரேனாதி அபரேன காரணேன. ஆகா³ரிகா த³ண்ட³பஸுதாதி க³ஹபதினோ விஹேஸமானா. பப்³ப³ஜிதா ஆபத்திங் ஆபஜ்ஜந்தாதி அனகா³ரிகா ஸத்தஸு ஆபத்திக்க²ந்தே⁴ஸு அஞ்ஞதரங் ஆபஜ்ஜமானா.
Ekena ākārenāti ekena kāraṇena. Aparena ākārenāti aparena kāraṇena. Āgārikā daṇḍapasutāti gahapatino vihesamānā. Pabbajitā āpattiṃ āpajjantāti anagārikā sattasu āpattikkhandhesu aññataraṃ āpajjamānā.
குதோபஹூதாதி குதோபூ⁴தா. குதோஜாதாதி குதோ படிலத்³த⁴பா⁴வா. குதோஸஞ்ஜாதாதி உபஸக்³கே³ன பத³ங் வட்³டி⁴தங். குதோனிப்³ப³த்தாதி குதோ நிப்³ப³த்தலக்க²ணங் பத்தா. உபஸக்³கே³ன பத³ங் வட்³டெ⁴த்வா ‘‘குதோஅபி⁴னிப்³ப³த்தா’’தி வுத்தங். குதோபாதுபூ⁴தாதி குதோபாகடீபூ⁴தா. கிங் நிதா³னாதிஆதீ³ஸு அத்தனோ ப²லங் நிதே³தீதி நிதா³னங். ஏதஸ்மா ப²லங் ஸமுதே³தீதி ஸமுத³யோ. ஏதஸ்மா ப²லங் ஜாயதீதி ஜாதி. ஏதஸ்மா ப²லங் பப⁴வதீதி பப⁴வோ. மூலங் புச்ச²தீதி கலஹஸ்ஸ காரணங் புச்ச²தி. காரணஞ்ஹி பதிட்ட²ட்டே²ன மூலங். அத்தனோ ப²லனிப்பா²த³னத்த²ங் ஹினோதி பவத்ததீதி ஹேது. ‘‘ஹந்த³ நங் க³ண்ஹதா²’’தி த³ஸ்ஸெந்தங் விய அத்தனோ ப²லங் நிதே³தீதி நிதா³னங். ஏதஸ்மா ப²லங் ஸம்ப⁴வதீதி ஸம்ப⁴வோ. பப⁴வதி ப²லங் ஏதஸ்மாதி பப⁴வோ. ஸமுட்டா²தி எத்த² ப²லங், ஏதேன வா ஸமுட்டா²தீதி ஸமுட்டா²னங். அத்தனோ ப²லங் ஆஹரதீதி ஆஹாரோ. அபடிக்கி²பிதப்³ப³ட்டே²ன அத்தனோ ப²லங் ஆரமேதீதி ஆரம்மணங். ஏதங் படிச்ச அபடிக்கி²பித்வா ப²லங் ஏதி பவத்ததீதி பச்சயோ. ஏதஸ்மா ப²லங் ஸமுதே³தீதி ஸமுத³யோதி ஏவமேதேஸங் பதா³னங் வசனத்தோ² வேதி³தப்³போ³. தங் ஸந்தா⁴ய ‘‘கலஹஸ்ஸ ச விவாத³ஸ்ஸ ச மூலங் புச்ச²தீ’’திஆதி³னா நயேன தே³ஸனா வுத்தா.
Kutopahūtāti kutobhūtā. Kutojātāti kuto paṭiladdhabhāvā. Kutosañjātāti upasaggena padaṃ vaḍḍhitaṃ. Kutonibbattāti kuto nibbattalakkhaṇaṃ pattā. Upasaggena padaṃ vaḍḍhetvā ‘‘kutoabhinibbattā’’ti vuttaṃ. Kutopātubhūtāti kutopākaṭībhūtā. Kiṃ nidānātiādīsu attano phalaṃ nidetīti nidānaṃ. Etasmā phalaṃ samudetīti samudayo. Etasmā phalaṃ jāyatīti jāti. Etasmā phalaṃ pabhavatīti pabhavo. Mūlaṃ pucchatīti kalahassa kāraṇaṃ pucchati. Kāraṇañhi patiṭṭhaṭṭhena mūlaṃ. Attano phalanipphādanatthaṃ hinoti pavattatīti hetu. ‘‘Handa naṃ gaṇhathā’’ti dassentaṃ viya attano phalaṃ nidetīti nidānaṃ. Etasmā phalaṃ sambhavatīti sambhavo. Pabhavati phalaṃ etasmāti pabhavo. Samuṭṭhāti ettha phalaṃ, etena vā samuṭṭhātīti samuṭṭhānaṃ. Attano phalaṃ āharatīti āhāro. Apaṭikkhipitabbaṭṭhena attano phalaṃ ārametīti ārammaṇaṃ. Etaṃ paṭicca apaṭikkhipitvā phalaṃ eti pavattatīti paccayo. Etasmā phalaṃ samudetīti samudayoti evametesaṃ padānaṃ vacanattho veditabbo. Taṃ sandhāya ‘‘kalahassa ca vivādassa ca mūlaṃ pucchatī’’tiādinā nayena desanā vuttā.
98. பியப்பஹூதாதி பியவத்து²தோ ஜாதா. மச்சே²ரயுத்தா கலஹா விவாதா³தி இமினா கலஹவிவாதா³தீ³னங் ந கேவலங் பியவத்து²மேவ, மச்ச²ரியம்பி பச்சயங் த³ஸ்ஸேதி. கலஹவிவாத³ஸீஸேன செத்த² ஸப்³பே³பி தே த⁴ம்மா வுத்தாதி வேதி³தப்³பா³. யதா² ச ஏதேஸங் மச்ச²ரியங், ததா² பேஸுணானஞ்ச விவாத³ங். தேனாஹ ‘‘விவாத³ஜாதேஸு ச பேஸுணானீ’’தி. இமிஸ்ஸா கா³தா²ய நித்³தே³ஸோ உத்தானத்தோ²யேவ.
98.Piyappahūtāti piyavatthuto jātā. Maccherayuttā kalahā vivādāti iminā kalahavivādādīnaṃ na kevalaṃ piyavatthumeva, macchariyampi paccayaṃ dasseti. Kalahavivādasīsena cettha sabbepi te dhammā vuttāti veditabbā. Yathā ca etesaṃ macchariyaṃ, tathā pesuṇānañca vivādaṃ. Tenāha ‘‘vivādajātesu ca pesuṇānī’’ti. Imissā gāthāya niddeso uttānatthoyeva.
99. பியா ஸு லோகஸ்மிங் குதோனிதா³னா, யே சாபி லோபா⁴ விசரந்தி லோகேதி ‘‘பியப்பஹூதா கலஹா’’தி யே எத்த² வுத்தா, தே பியா லோகஸ்மிங் குதோனிதா³னா, ந கேவலஞ்ச பியா, யே சாபி க²த்தியாத³யோ லோகே விசரந்தி லோப⁴ஹேது லோபே⁴னாபி⁴பூ⁴தா விசரந்தி, தேஸங் ஸோ லோபோ⁴ ச குதோனிதா³னோதி த்³வே அத்தே² ஏகாய புச்சா²ய புச்ச²தி. குதோனிதா³னாதி செத்த² கிங்னிதா³னா கிங்ஹேதுகாதி பச்சத்தவசனஸ்ஸ தோஆதே³ஸோ வேதி³தப்³போ³, ஸமாஸே சஸ்ஸ லோபாபா⁴வோ. அத² வா நிதா³னாதி ஜாதா, உப்பன்னாதி அத்தோ². தஸ்மா குதோ ஜாதா குதோ உப்பன்னாதி வுத்தங் ஹோதி. ஆஸா ச நிட்டா² சாதி ஆஸா ச தஸ்ஸா ஆஸாய ஸமித்³தி⁴ ச. யே ஸம்பராயாய நரஸ்ஸ ஹொந்தீதி யே நரஸ்ஸ ஸம்பராயாய ஹொந்தி, பராயனா ஹொந்தீதி வுத்தங் ஹோதி. ஏகா ஏவாயம்பி புச்சா².
99.Piyā su lokasmiṃ kutonidānā, ye cāpi lobhā vicaranti loketi ‘‘piyappahūtā kalahā’’ti ye ettha vuttā, te piyā lokasmiṃ kutonidānā, na kevalañca piyā, ye cāpi khattiyādayo loke vicaranti lobhahetu lobhenābhibhūtā vicaranti, tesaṃ so lobho ca kutonidānoti dve atthe ekāya pucchāya pucchati. Kutonidānāti cettha kiṃnidānā kiṃhetukāti paccattavacanassa toādeso veditabbo, samāse cassa lopābhāvo. Atha vā nidānāti jātā, uppannāti attho. Tasmā kuto jātā kuto uppannāti vuttaṃ hoti. Āsā ca niṭṭhā cāti āsā ca tassā āsāya samiddhi ca. Ye samparāyāya narassa hontīti ye narassa samparāyāya honti, parāyanā hontīti vuttaṃ hoti. Ekā evāyampi pucchā.
தீ³பா ஹொந்தீதி பதிட்டா² ப⁴வந்தி. ஸரணா ஹொந்தீதி து³க்க²னாஸனா ஹொந்தி. நிட்டா²பராயனா ஹொந்தீதி ஸமித்³தி⁴பராயனா ஹொந்தி.
Dīpā hontīti patiṭṭhā bhavanti. Saraṇā hontīti dukkhanāsanā honti. Niṭṭhāparāyanā hontīti samiddhiparāyanā honti.
100. ச²ந்தா³னிதா³னானீதி காமச்ச²ந்தா³தி³ச²ந்த³னிதா³னானி. யே சாபி லோபா⁴ விசரந்தீதி யே சாபி க²த்தியாத³யோ லோபா⁴ விசரந்தி, தேஸங் லோபோ⁴பி ச²ந்த³னிதா³னோதி த்³வேபி அத்தே² ஏகதோ விஸ்ஸஜ்ஜேதி. இதோனிதா³னாதி ச²ந்த³னிதா³னா ஏவாதி வுத்தங் ஹோதி. ‘‘இதோனிதா³னா’’தி ஹி ச²ந்த³ங் ஸந்தா⁴யாஹ. ச²ந்த³னிதா³னா ஹி லோபா⁴த³யோ. ‘‘இதோனிதா³னா’’தி ஸத்³த³ஸித்³தி⁴ செத்த² ‘‘குதோனிதா³னா’’தி எத்த² வுத்தனயேன வேதி³தப்³பா³. ஆஸாய ஸமித்³தி⁴ வுச்சதி நிட்டா²தி அஜ்ஜா²ஸயனிப்³ப³த்திபடிலாபோ⁴ கதீ²யதி.
100.Chandānidānānīti kāmacchandādichandanidānāni. Ye cāpi lobhā vicarantīti ye cāpi khattiyādayo lobhā vicaranti, tesaṃ lobhopi chandanidānoti dvepi atthe ekato vissajjeti. Itonidānāti chandanidānā evāti vuttaṃ hoti. ‘‘Itonidānā’’ti hi chandaṃ sandhāyāha. Chandanidānā hi lobhādayo. ‘‘Itonidānā’’ti saddasiddhi cettha ‘‘kutonidānā’’ti ettha vuttanayena veditabbā. Āsāya samiddhi vuccati niṭṭhāti ajjhāsayanibbattipaṭilābho kathīyati.
101. வினிச்ச²யாதி தண்ஹாதி³ட்டி²வினிச்ச²யா. யே சாபி த⁴ம்மா ஸமணேன வுத்தாதி யே ச அஞ்ஞேபி கோதா⁴தீ³ஹி ஸம்பயுத்தா, ததா²ரூபா வா அகுஸலா த⁴ம்மா பு³த்³த⁴ஸமணேன வுத்தா, தே குதோபஹூதாதி.
101.Vinicchayāti taṇhādiṭṭhivinicchayā. Ye cāpi dhammā samaṇena vuttāti ye ca aññepi kodhādīhi sampayuttā, tathārūpā vā akusalā dhammā buddhasamaṇena vuttā, te kutopahūtāti.
அஞ்ஞஜாதிகாதி அஞ்ஞஸபா⁴வா. அஞ்ஞவிஹிதகாதி அஞ்ஞேனாகாரேன டி²தா. ஸமிதபாபேனாதி நிப்³பா³பிதபாபேன. பா³ஹிதபாபத⁴ம்மேனாதி பஹீனலாமகத⁴ம்மேன. பி⁴ன்னகிலேஸமூலேனாதி கிலேஸமூலானி பி⁴ந்தி³த்வா டி²தேன. ஸப்³பா³குஸலமூலப³ந்த⁴னா பமுத்தேனாதி த்³வாத³ஸஅகுஸலப³ந்த⁴னங் மோசெத்வா டி²தேன. வுத்தாதி கதி²தா. பவுத்தாதி பகாரேன கதி²தா.
Aññajātikāti aññasabhāvā. Aññavihitakāti aññenākārena ṭhitā. Samitapāpenāti nibbāpitapāpena. Bāhitapāpadhammenāti pahīnalāmakadhammena. Bhinnakilesamūlenāti kilesamūlāni bhinditvā ṭhitena. Sabbākusalamūlabandhanā pamuttenāti dvādasaakusalabandhanaṃ mocetvā ṭhitena. Vuttāti kathitā. Pavuttāti pakārena kathitā.
102. தமூபனிஸ்ஸாய பஹோதி ச²ந்தோ³தி தங் ஸுக²து³க்க²வேத³னங் தது³ப⁴யவத்து²ஸங்கா²தங் ஸாதாஸாதங் உபனிஸ்ஸாய ஸங்யோக³வியோக³பத்த²னாவஸேன ச²ந்தோ³ பஹோதி. எத்தாவதா ‘‘ச²ந்தோ³ நு லோகஸ்மிங் குதோனிதா³னோ’’தி அயங் பஞ்ஹோ விஸ்ஸஜ்ஜிதோ ஹோதி. ரூபேஸு தி³ஸ்வா விப⁴வங் ப⁴வஞ்சாதி ரூபேஸு வயஞ்ச உப்பாத³ஞ்ச தி³ஸ்வா. வினிச்ச²யங் குப்³ப³தி ஜந்து லோகேதி அபாயாதி³கே லோகே அயங் ஜந்து போ⁴கா³தி⁴க³மத்த²ங் தண்ஹாவினிச்ச²யங் ‘‘அத்தா மே உப்பன்னோ’’திஆதி³னா நயேன தி³ட்டி²வினிச்ச²யஞ்ச குருதே. எத்தாவதா ‘‘வினிச்ச²யா சாபி குதோபபூ⁴தா’’தி அயங் பஞ்ஹோ விஸ்ஸஜ்ஜிதோ ஹோதி.
102.Tamūpanissāya pahoti chandoti taṃ sukhadukkhavedanaṃ tadubhayavatthusaṅkhātaṃ sātāsātaṃ upanissāya saṃyogaviyogapatthanāvasena chando pahoti. Ettāvatā ‘‘chando nu lokasmiṃ kutonidāno’’ti ayaṃ pañho vissajjito hoti. Rūpesu disvā vibhavaṃ bhavañcāti rūpesu vayañca uppādañca disvā. Vinicchayaṃ kubbati jantu loketi apāyādike loke ayaṃ jantu bhogādhigamatthaṃ taṇhāvinicchayaṃ ‘‘attā me uppanno’’tiādinā nayena diṭṭhivinicchayañca kurute. Ettāvatā ‘‘vinicchayā cāpi kutopabhūtā’’ti ayaṃ pañho vissajjito hoti.
ஸாதாஸாதங் நிஸ்ஸாயாதி மது⁴ரஞ்ச அமது⁴ரஞ்ச உபனிஸ்ஸயங் கத்வா. இட்டா²னிட்ட²ந்தி இட்டா²ரம்மணஞ்ச அனிட்டா²ரம்மணஞ்ச.
Sātāsātaṃ nissāyāti madhurañca amadhurañca upanissayaṃ katvā. Iṭṭhāniṭṭhanti iṭṭhārammaṇañca aniṭṭhārammaṇañca.
ஸுராமேரயமஜ்ஜப்பமாத³ட்டா²னானுயோக³ந்தி எத்த² ஸுராதி பிட்ட²ஸுரா பூவஸுரா ஓத³னஸுரா கிண்ணபக்கி²த்தா ஸம்பா⁴ரஸங்யுத்தாதி பஞ்ச ஸுரா. மேரயந்தி புப்பா²ஸவோ ப²லாஸவோ மத்⁴வாஸவோ கு³ளாஸவோ ஸம்பா⁴ரஸங்யுத்தோதி பஞ்ச ஆஸவா. தங் ஸப்³ப³ம்பி மத³கரணவஸேன மஜ்ஜங். பமாத³ட்டா²னந்தி பமாத³காரணங், யாய சேதனாய தங் மஜ்ஜங் பிவதி, தஸ்ஸேதங் அதி⁴வசனங். அனுயோக³ந்தி தங் ஸுராமேரயமஜ்ஜப்பமாத³ட்டா²னானுயோக³ங் அனுஆயோக³ங் புனப்புனங் கரணங். யஸ்மா ச பன தங் அனுயுத்தஸ்ஸ மே உப்பன்னா சேவ போ⁴கா³ பரிஹாயந்தி, அனுப்பன்னா ச நுப்பஜ்ஜந்தி, தஸ்மா ‘‘மே போ⁴கா³ பரிக்க²யங் கீ²ணபா⁴வங் க³ச்ச²ந்தீ’’தி ஜானாதி. ஏவங் ஸப்³ப³த்த². விகாலவிஸிகா²சரியானுயோக³ந்தி அவேலாய விஸிகா²ஸு சரியானுயுத்தங். ஸமஜ்ஜாபி⁴சரணந்தி நச்சாதி³த³ஸ்ஸனவஸேன ஸமஜ்ஜாபி⁴க³மனங். ஆலஸ்யானுயோக³ந்தி காயாலஸியதாய யுத்தப்பயுத்ததங். அபாயமுகா²னி ந ஸேவதீதி போ⁴கா³னங் வினாஸத்³வாரானி ந ஸேவதி.
Surāmerayamajjappamādaṭṭhānānuyoganti ettha surāti piṭṭhasurā pūvasurā odanasurā kiṇṇapakkhittā sambhārasaṃyuttāti pañca surā. Merayanti pupphāsavo phalāsavo madhvāsavo guḷāsavo sambhārasaṃyuttoti pañca āsavā. Taṃ sabbampi madakaraṇavasena majjaṃ. Pamādaṭṭhānanti pamādakāraṇaṃ, yāya cetanāya taṃ majjaṃ pivati, tassetaṃ adhivacanaṃ. Anuyoganti taṃ surāmerayamajjappamādaṭṭhānānuyogaṃ anuāyogaṃ punappunaṃ karaṇaṃ. Yasmā ca pana taṃ anuyuttassa me uppannā ceva bhogā parihāyanti, anuppannā ca nuppajjanti, tasmā ‘‘me bhogā parikkhayaṃ khīṇabhāvaṃ gacchantī’’ti jānāti. Evaṃ sabbattha. Vikālavisikhācariyānuyoganti avelāya visikhāsu cariyānuyuttaṃ. Samajjābhicaraṇanti naccādidassanavasena samajjābhigamanaṃ. Ālasyānuyoganti kāyālasiyatāya yuttappayuttataṃ. Apāyamukhāni na sevatīti bhogānaṃ vināsadvārāni na sevati.
கஸியா வாதி கஸிகம்மேன வா. வணிஜ்ஜாய வாதி த⁴ம்மிகவணிஜ்ஜகம்மேன வா. கோ³ரக்கே²ன வாதி கோ³பாலகம்மேன வா. இஸ்ஸத்தே²ன வாதி த⁴னுஸிப்பேன வா. ராஜபோரிஸேன வாதி ராஜஸேவககம்மேன வா. ஸிப்பஞ்ஞதரேன வாதி கும்ப⁴காராதி³ஸிப்பானங் அஞ்ஞதரேன வா. படிபஜ்ஜதீதி பயோக³ங் கரோதி. சக்கு²ஸ்மிங் உப்பன்னே ஜானாதீதி ஸஸம்பா⁴ரசக்கு²ஸ்மிங் உப்பன்னே ஜானாதி. ‘‘அத்தா மே உப்பன்னோ’’தி தி³ட்டி²ங் க³ண்ஹாதி. சக்கு²ஸ்மிங் அந்தரஹிதேதி தஸ்மிங் வினட்டே². அத்தா மே அந்தரஹிதோதி ‘‘மம அத்தா வினட்டோ²’’தி தி³ட்டி²ங் க³ண்ஹாதி. விக³தோ மே அத்தாதி வீதிக்கந்தோ மம அத்தா. ஸோதஸ்மிந்திஆதீ³ஸுபி ஏஸேவ நயோ.
Kasiyā vāti kasikammena vā. Vaṇijjāya vāti dhammikavaṇijjakammena vā. Gorakkhena vāti gopālakammena vā. Issatthena vāti dhanusippena vā. Rājaporisena vāti rājasevakakammena vā. Sippaññatarena vāti kumbhakārādisippānaṃ aññatarena vā. Paṭipajjatīti payogaṃ karoti. Cakkhusmiṃ uppanne jānātīti sasambhāracakkhusmiṃ uppanne jānāti. ‘‘Attā me uppanno’’ti diṭṭhiṃ gaṇhāti. Cakkhusmiṃ antarahiteti tasmiṃ vinaṭṭhe. Attāme antarahitoti ‘‘mama attā vinaṭṭho’’ti diṭṭhiṃ gaṇhāti. Vigato me attāti vītikkanto mama attā. Sotasmintiādīsupi eseva nayo.
103. ஏதேபி த⁴ம்மா த்³வயமேவ ஸந்தேதி ஏதே கோதா⁴த³யோ த⁴ம்மா ஸாதாஸாதத்³வயே ஸந்தே ஏவ ஹொந்தி உப்பஜ்ஜந்தி. எத்தாவதா ததியபஞ்ஹோபி விஸ்ஸஜ்ஜிதோ ஹோதி. இதா³னி யோ ஏவங் விஸ்ஸஜ்ஜிதேஸு ஏதேஸு பஞ்ஹேஸு கத²ங்கதீ² ப⁴வெய்ய, தஸ்ஸ கத²ங்கதா²பஹானூபாயங் த³ஸ்ஸெந்தோ ஆஹ ‘‘கத²ங்கதீ² ஞாணபதா²ய ஸிக்கே²’’தி, ஞாணத³ஸ்ஸனஞாணாதி⁴க³மனத்த²ங் திஸ்ஸோ ஸிக்கா² ஸிக்கெ²ய்யாதி வுத்தங் ஹோதி. கிங்காரணா? ஞத்வா பவுத்தா ஸமணேன த⁴ம்மா. பு³த்³த⁴ஸமணேன ஹி ஞத்வா த⁴ம்மா வுத்தா, நத்தி² தஸ்ஸ த⁴ம்மேஸு அஞ்ஞாணங், அத்தனோ பன ஞாணானுபா⁴வேன தே அஜானந்தோ ந ஜானெய்ய, ந தே³ஸனாதோ³ஸேன. தஸ்மா கத²ங்கதீ² ஞாணபதா²ய ஸிக்கே², ஞத்வா பவுத்தா ஸமணேன த⁴ம்மாதி.
103.Etepi dhammā dvayameva santeti ete kodhādayo dhammā sātāsātadvaye sante eva honti uppajjanti. Ettāvatā tatiyapañhopi vissajjito hoti. Idāni yo evaṃ vissajjitesu etesu pañhesu kathaṃkathī bhaveyya, tassa kathaṃkathāpahānūpāyaṃ dassento āha ‘‘kathaṃkathī ñāṇapathāya sikkhe’’ti, ñāṇadassanañāṇādhigamanatthaṃ tisso sikkhā sikkheyyāti vuttaṃ hoti. Kiṃkāraṇā? Ñatvā pavuttā samaṇena dhammā. Buddhasamaṇena hi ñatvā dhammā vuttā, natthi tassa dhammesu aññāṇaṃ, attano pana ñāṇānubhāvena te ajānanto na jāneyya, na desanādosena. Tasmā kathaṃkathī ñāṇapathāya sikkhe, ñatvā pavuttā samaṇena dhammāti.
பக்கே²பப³ந்த⁴னேன வா ப³த்³தோ⁴தி நாக³ரிகப³ந்தே⁴ன ப³த்³தோ⁴. பரிக்கே²பப³ந்த⁴னேன வாதி வதிபரிக்கே²பப³ந்த⁴னேன வா. கா³மப³ந்த⁴னேனாதிஆதீ³ஸு தஸ்மா தஸ்மா டா²னதோ நிக்க²மிதுங் அலப⁴ந்தோ கா³மப³ந்த⁴னாதீ³ஹி ப³த்³தோ⁴ நாம ஹோதி. தஸ்ஸ ப³ந்த⁴னஸ்ஸ மொக்க²த்தா²யாதி ஏதஸ்ஸ வுத்தப்பகாரஸ்ஸ ப³ந்த⁴னஸ்ஸ மோசனத்த²ங்.
Pakkhepabandhanena vā baddhoti nāgarikabandhena baddho. Parikkhepabandhanena vāti vatiparikkhepabandhanena vā. Gāmabandhanenātiādīsu tasmā tasmā ṭhānato nikkhamituṃ alabhanto gāmabandhanādīhi baddho nāma hoti. Tassa bandhanassa mokkhatthāyāti etassa vuttappakārassa bandhanassa mocanatthaṃ.
ஞாணம்பி ஞாணபதோ²தி புரே உப்பன்னங் ஞாணங் அபராபருப்பன்னஸ்ஸ ஞாணம்பி ஞாணஸ்ஸ ஸஞ்சரணமக்³கோ³தி ஞாணம்பி ஞாணபதோ². ஞாணஸ்ஸ ஆரம்மணம்பி ஞாணபதோ²தி ஞாணஸ்ஸ பச்சயோபி தங் ஆலம்பி³த்வா உப்பஜ்ஜனதோ ஞாணபதோ². ஞாணஸஹபு⁴னோபி த⁴ம்மா ஞாணபதோ²தி ஞாணேன ஸஹுப்பன்னா அவஸேஸா சித்தசேதஸிகா த⁴ம்மாபி ஞாணபதோ². இதா³னி உபமாய ஸாதெ⁴ந்தோ ‘‘யதா² அரியமக்³கோ³ அரியபதோ²’’திஆதி³மாஹ.
Ñāṇampi ñāṇapathoti pure uppannaṃ ñāṇaṃ aparāparuppannassa ñāṇampi ñāṇassa sañcaraṇamaggoti ñāṇampi ñāṇapatho. Ñāṇassa ārammaṇampi ñāṇapathoti ñāṇassa paccayopi taṃ ālambitvā uppajjanato ñāṇapatho. Ñāṇasahabhunopi dhammā ñāṇapathoti ñāṇena sahuppannā avasesā cittacetasikā dhammāpi ñāṇapatho. Idāni upamāya sādhento ‘‘yathā ariyamaggo ariyapatho’’tiādimāha.
கத²ங்கதீ² புக்³க³லோதி விசிகிச்சா²வந்தோ புக்³க³லோ. ஸகங்கோ²தி ஸத்³வெள்ஹகோ. ஸவிலேகோ²தி சித்தராஜிவந்தோ. ஸத்³வெள்ஹகோதி கங்கா²வந்தோ. ஸவிசிகிச்சோ²தி ஸந்தே³ஹவந்தோ. ஞாணாதி⁴க³மாயாதி ஞாணபடிலாப⁴த்தா²ய. ஞாணபு²ஸனாயாதி ஞாணபடிவிஜ்ஜ²னத்தா²ய. அத² வா ஞாணவிந்த³னத்தா²ய. ஞாணஸச்சி²கிரியாயாதி ஞாணஸ்ஸ பச்சக்க²கரணத்தா²ய. ஸனிதா³னாஹந்தி அஹங் ஸனிதா³னங் ஸபச்சயங் கத்வா த⁴ம்மதே³ஸனங் கரோமி. ஸப்பாடிஹாரியந்தி நிய்யானிகங் கத்வா. நோ அப்பாடிஹாரியந்தி அனிய்யானிகங் அகத்வா த⁴ம்மதே³ஸனங் கரோமி.
Kathaṃkathīpuggaloti vicikicchāvanto puggalo. Sakaṅkhoti sadveḷhako. Savilekhoti cittarājivanto. Sadveḷhakoti kaṅkhāvanto. Savicikicchoti sandehavanto. Ñāṇādhigamāyāti ñāṇapaṭilābhatthāya. Ñāṇaphusanāyāti ñāṇapaṭivijjhanatthāya. Atha vā ñāṇavindanatthāya. Ñāṇasacchikiriyāyāti ñāṇassa paccakkhakaraṇatthāya. Sanidānāhanti ahaṃ sanidānaṃ sapaccayaṃ katvā dhammadesanaṃ karomi. Sappāṭihāriyanti niyyānikaṃ katvā. No appāṭihāriyanti aniyyānikaṃ akatvā dhammadesanaṃ karomi.
104. ஸாதங் அஸாதஞ்ச குதோனிதா³னாதி எத்த² ஸாதாஸாதந்தி ஸுக²து³க்க²வேத³னா ஏவ அதி⁴ப்பேதா . ந ப⁴வந்தி ஹேதேதி ந ப⁴வந்தி ஏதே. விப⁴வங் ப⁴வஞ்சாபி யமேதமத்த²ங், ஏதங் மே பப்³ரூஹி யதோனிதா³னந்தி ஸாதாஸாதானங் விப⁴வங் ப⁴வஞ்ச ஏதம்பி யங் அத்த²ங். லிங்க³ப்³யத்தயோ எத்த² கதோ. இத³ங் பன வுத்தங் ஹோதி – ஸாதாஸாதானங் விப⁴வோ ப⁴வோ சாதி யோ ஏஸ அத்தோ², ஏதங் மே பப்³ரூஹி யதோனிதா³னந்தி. எத்த² ச ஸாதாஸாதானங் விப⁴வப⁴வவத்து²கா விப⁴வப⁴வதி³ட்டி²யோ ஏவ விப⁴வப⁴வாதி அத்த²தோ வேதி³தப்³பா³. ததா² ஹி இமஸ்ஸ பஞ்ஹஸ்ஸ விஸ்ஸஜ்ஜனபக்கே² ‘‘ப⁴வதி³ட்டி²பி ப²ஸ்ஸனிதா³னா, விப⁴வதி³ட்டி²பி ப²ஸ்ஸனிதா³னா’’தி உபரி நித்³தே³ஸே (மஹானி॰ 105) வக்க²தி. இமாய கா³தா²ய நித்³தே³ஸே வத்தப்³ப³ங் நத்தி².
104.Sātaṃ asātañca kutonidānāti ettha sātāsātanti sukhadukkhavedanā eva adhippetā . Na bhavanti heteti na bhavanti ete. Vibhavaṃ bhavañcāpi yametamatthaṃ, etaṃ me pabrūhi yatonidānanti sātāsātānaṃ vibhavaṃ bhavañca etampi yaṃ atthaṃ. Liṅgabyattayo ettha kato. Idaṃ pana vuttaṃ hoti – sātāsātānaṃ vibhavo bhavo cāti yo esa attho, etaṃ me pabrūhi yatonidānanti. Ettha ca sātāsātānaṃ vibhavabhavavatthukā vibhavabhavadiṭṭhiyo eva vibhavabhavāti atthato veditabbā. Tathā hi imassa pañhassa vissajjanapakkhe ‘‘bhavadiṭṭhipi phassanidānā, vibhavadiṭṭhipi phassanidānā’’ti upari niddese (mahāni. 105) vakkhati. Imāya gāthāya niddese vattabbaṃ natthi.
105. இதோனிதா³னந்தி ப²ஸ்ஸனிதா³னங். இமாயபி வத்தப்³ப³ங் நத்தி².
105.Itonidānanti phassanidānaṃ. Imāyapi vattabbaṃ natthi.
106. கிஸ்மிங் விபூ⁴தே ந பு²ஸந்தி ப²ஸ்ஸாதி கிஸ்மிங் வீதிவத்தே சக்கு²ஸம்ப²ஸ்ஸாத³யோ பஞ்ச ப²ஸ்ஸா ந பு²ஸந்தி. இமாயபி வத்தப்³ப³ங் நத்தி².
106.Kismiṃvibhūte na phusanti phassāti kismiṃ vītivatte cakkhusamphassādayo pañca phassā na phusanti. Imāyapi vattabbaṃ natthi.
107. நாமஞ்ச ரூபஞ்ச படிச்சாதி ஸம்பயுத்தகனாமஞ்ச வத்தா²ரம்மணரூபஞ்ச படிச்ச. ரூபே விபூ⁴தே ந பு²ஸந்தி ப²ஸ்ஸாதி ரூபே வீதிவத்தே பஞ்ச ப²ஸ்ஸா ந பு²ஸந்தி.
107.Nāmañca rūpañca paṭiccāti sampayuttakanāmañca vatthārammaṇarūpañca paṭicca. Rūpe vibhūte na phusanti phassāti rūpe vītivatte pañca phassā na phusanti.
திண்ணங் ஸங்க³தி ப²ஸ்ஸோதி சக்கு²ரூபவிஞ்ஞாணானங் திண்ணன்னங் ஸங்க³தியா ப²ஸ்ஸோ ஜாயதி. சக்கு² ச ரூபா ச ரூபஸ்மிந்தி பஸாத³சக்கு²ஞ்ச ரூபாரம்மணானி ச ரூபபா⁴கே³ ரூபகொட்டா²ஸே கத்வா. சக்கு²ஸம்ப²ஸ்ஸங் ட²பெத்வாதி திண்ணங் ஸங்க³தியா உப்பன்னப²ஸ்ஸங் முஞ்சித்வா. ஸம்பயுத்தகா த⁴ம்மா நாமஸ்மிந்தி அவஸேஸா வேத³னாத³யோ ப²ஸ்ஸேன ஸஹஜாதா த⁴ம்மா நாமபா⁴கே³. ஸோதஞ்ச படிச்சாதிஆதீ³ஸுபி ஏஸேவ நயோ.
Tiṇṇaṃ saṅgati phassoti cakkhurūpaviññāṇānaṃ tiṇṇannaṃ saṅgatiyā phasso jāyati. Cakkhu ca rūpā ca rūpasminti pasādacakkhuñca rūpārammaṇāni ca rūpabhāge rūpakoṭṭhāse katvā. Cakkhusamphassaṃ ṭhapetvāti tiṇṇaṃ saṅgatiyā uppannaphassaṃ muñcitvā. Sampayuttakā dhammā nāmasminti avasesā vedanādayo phassena sahajātā dhammā nāmabhāge. Sotañca paṭiccātiādīsupi eseva nayo.
சதூஹாகாரேஹி ரூபங் விபூ⁴தங் ஹோதீதி சதூஹி காரணேஹி ரூபங் வீதிவத்தங் ஹோதி. ஞாதவிபூ⁴தேனாதி பாகடங் கத்வா வீதிவத்தேன. தீரணவிபூ⁴தேனாதி அனிச்சாதி³தோ தீரயித்வா வீதிவத்தேன. பஹானவிபூ⁴தேனாதி ச²ந்த³ராக³பஹானதோ வீதிவத்தேன. ஸமதிக்கமவிபூ⁴தேனாதி சதுன்னங் அரூபஸமாபத்தீனங் படிலாப⁴வஸேன வீதிவத்தேன.
Catūhākārehi rūpaṃ vibhūtaṃ hotīti catūhi kāraṇehi rūpaṃ vītivattaṃ hoti. Ñātavibhūtenāti pākaṭaṃ katvā vītivattena. Tīraṇavibhūtenāti aniccādito tīrayitvā vītivattena. Pahānavibhūtenāti chandarāgapahānato vītivattena. Samatikkamavibhūtenāti catunnaṃ arūpasamāpattīnaṃ paṭilābhavasena vītivattena.
108. கத²ங் ஸமேதஸ்ஸாதி கத²ங் படிபன்னஸ்ஸ. விபோ⁴தி ரூபந்தி ரூபங் விப⁴வதி, ந ப⁴வெய்ய வா. ஸுக²ங் து³க²ஞ்சாதி இட்டா²னிட்ட²ரூபமேவ புச்ச²தி.
108.Kathaṃ sametassāti kathaṃ paṭipannassa. Vibhoti rūpanti rūpaṃ vibhavati, na bhaveyya vā. Sukhaṃ dukhañcāti iṭṭhāniṭṭharūpameva pucchati.
ஜானெய்யாமாதி ஜானிஸ்ஸாம. ஆஜானெய்யாமாதி விஸேஸேன ஜானிஸ்ஸாம. விஜானெய்யாமாதி அனேகவிதே⁴ன ஜானிஸ்ஸாம. படிவிஜானெய்யாமாதி ஸம்மா ஜானிஸ்ஸாம. படிவிஜ்ஜெ²ய்யாமாதி சித்தேன பு³ஜ்ஜி²ஸ்ஸாம.
Jāneyyāmāti jānissāma. Ājāneyyāmāti visesena jānissāma. Vijāneyyāmāti anekavidhena jānissāma. Paṭivijāneyyāmāti sammā jānissāma. Paṭivijjheyyāmāti cittena bujjhissāma.
109. ந ஸஞ்ஞஸஞ்ஞீதி யதா² ஸமேதஸ்ஸ விபோ⁴தி ரூபங், ஸோ பகதிஸஞ்ஞாய ஸஞ்ஞீபி ந ஹோதி. ந விஸஞ்ஞஸஞ்ஞீதி விஸஞ்ஞாயபி விரூபாய ஸஞ்ஞாய விஸஞ்ஞீ ந ஹோதி உம்மத்தகோ வா கி²த்தசித்தோ வா. நோபி அஸஞ்ஞீதி ஸஞ்ஞாவிரஹிதோபி ந ஹோதி நிரோத⁴ஸமாபன்னோ வா அஸஞ்ஞஸத்தோ வா. ந விபூ⁴தஸஞ்ஞீதி ‘‘ஸப்³ப³ஸோ ரூபஸஞ்ஞான’’ந்திஆதி³னா (விப⁴॰ 508) நயேன ஸமதிக்கந்தஸஞ்ஞீபி ந ஹோதி அரூபஜ்ஜா²னலாபீ⁴. ஏவங் ஸமேதஸ்ஸ விபோ⁴தி ரூபந்தி ஏதஸ்மிங் ஸஞ்ஞஸஞ்ஞிதாதி³பா⁴வே அட்ட²த்வா யதே³தங் வுத்தங் ‘‘ஸோ ஏவங் ஸமாஹிதே சித்தே…பே॰… ஆகாஸானஞ்சாயதனஸமாபத்திபடிலாப⁴த்தா²ய சித்தங் அபி⁴னீஹரதீ’’தி, ஏவங் ஸமேதஸ்ஸ அரூபமக்³க³ஸமங்கி³னோ விபோ⁴தி ரூபங். ஸஞ்ஞானிதா³னா ஹி பபஞ்சஸங்கா²தி ஏவங் படிபன்னஸ்ஸாபி ச யா ஸஞ்ஞா, தங்னிதா³னா தண்ஹாதி³ட்டி²பபஞ்சாஸ்ஸ அப்பஹீனாவ ஹொந்தீதி த³ஸ்ஸேதி.
109.Na saññasaññīti yathā sametassa vibhoti rūpaṃ, so pakatisaññāya saññīpi na hoti. Na visaññasaññīti visaññāyapi virūpāya saññāya visaññī na hoti ummattako vā khittacitto vā. Nopi asaññīti saññāvirahitopi na hoti nirodhasamāpanno vā asaññasatto vā. Na vibhūtasaññīti ‘‘sabbaso rūpasaññāna’’ntiādinā (vibha. 508) nayena samatikkantasaññīpi na hoti arūpajjhānalābhī. Evaṃ sametassa vibhoti rūpanti etasmiṃ saññasaññitādibhāve aṭṭhatvā yadetaṃ vuttaṃ ‘‘so evaṃ samāhite citte…pe… ākāsānañcāyatanasamāpattipaṭilābhatthāya cittaṃ abhinīharatī’’ti, evaṃ sametassa arūpamaggasamaṅgino vibhoti rūpaṃ. Saññānidānā hi papañcasaṅkhāti evaṃ paṭipannassāpi ca yā saññā, taṃnidānā taṇhādiṭṭhipapañcāssa appahīnāva hontīti dasseti.
அஸஞ்ஞினோ வுச்சந்தி நிரோத⁴ஸமாபன்னாதி ஸஞ்ஞாவேத³னா நிரோதெ⁴த்வா நிரோத⁴ஸமாபன்னா ஸஞ்ஞாபா⁴வேன அஸஞ்ஞினோதி கதீ²யந்தி. அஸஞ்ஞஸத்தாதி ஸப்³பே³ன ஸப்³ப³ங் ஸஞ்ஞாபா⁴வேன அஸஞ்ஞப⁴வே நிப்³ப³த்தா.
Asaññino vuccanti nirodhasamāpannāti saññāvedanā nirodhetvā nirodhasamāpannā saññābhāvena asaññinoti kathīyanti. Asaññasattāti sabbena sabbaṃ saññābhāvena asaññabhave nibbattā.
ஸோ ஏவங் ஸமாஹிதே சித்தேதி தத்த² ஸோதி ஸோ பி⁴க்கு². ஏவந்தி சதுத்த²ஜ்ஜா²னக்கமனித³ஸ்ஸனமேதங், இமினா கமேன சதுத்த²ஜ்ஜா²னங் படிலபி⁴த்வாதி வுத்தங் ஹோதி. ஸமாஹிதேதி இமினா சதுத்த²ஜ்ஜா²னஸமாதி⁴னா ஸமாஹிதே. பரிஸுத்³தே⁴திஆதீ³ஸு பன உபெக்கா²ஸதிபாரிஸுத்³தி⁴பா⁴வேன பரிஸுத்³தே⁴. பரிஸுத்³த⁴த்தாயேவ பரியோதா³தே, பப⁴ஸ்ஸரேதி வுத்தங் ஹோதி. ஸுகா²தீ³னங் பச்சயானங் கா⁴தேன விஹதராகா³தி³அங்க³ணத்தா அனங்க³ணே. அனங்க³ணத்தா ஏவ ச விக³தூபக்கிலேஸே. அங்க³ணேன ஹி சித்தங் உபக்கிலிஸ்ஸதி. ஸுபா⁴விதத்தா முது³பூ⁴தே, வஸீபா⁴வப்பத்தேதி வுத்தங் ஹோதி. வஸே வத்தமானஞ்ஹி சித்தங் முதூ³தி வுச்சதி. முது³த்தாயேவ ச கம்மனியே, கம்மக்க²மே கம்மயொக்³கே³தி வுத்தங் ஹோதி. முது³ ஹி சித்தங் கம்மனியங் ஹோதி ஸுத்³த⁴ந்தமிவ ஸுவண்ணங். தது³ப⁴யம்பி ச ஸுபா⁴விதத்தாயேவ. யதா²ஹ ‘‘நாஹங், பி⁴க்க²வே, அஞ்ஞங் ஏகத⁴ம்மம்பி ஸமனுபஸ்ஸாமி, யங் ஏவங் பா⁴விதங் கம்மனியங் ஹோதி யத²யித³ங், பி⁴க்க²வே, சித்த’’ந்தி (அ॰ நி॰ 1.22).
So evaṃ samāhite citteti tattha soti so bhikkhu. Evanti catutthajjhānakkamanidassanametaṃ, iminā kamena catutthajjhānaṃ paṭilabhitvāti vuttaṃ hoti. Samāhiteti iminā catutthajjhānasamādhinā samāhite. Parisuddhetiādīsu pana upekkhāsatipārisuddhibhāvena parisuddhe. Parisuddhattāyeva pariyodāte, pabhassareti vuttaṃ hoti. Sukhādīnaṃ paccayānaṃ ghātena vihatarāgādiaṅgaṇattā anaṅgaṇe. Anaṅgaṇattā eva ca vigatūpakkilese. Aṅgaṇena hi cittaṃ upakkilissati. Subhāvitattā mudubhūte, vasībhāvappatteti vuttaṃ hoti. Vase vattamānañhi cittaṃ mudūti vuccati. Muduttāyeva ca kammaniye, kammakkhame kammayoggeti vuttaṃ hoti. Mudu hi cittaṃ kammaniyaṃ hoti suddhantamiva suvaṇṇaṃ. Tadubhayampi ca subhāvitattāyeva. Yathāha ‘‘nāhaṃ, bhikkhave, aññaṃ ekadhammampi samanupassāmi, yaṃ evaṃ bhāvitaṃ kammaniyaṃ hoti yathayidaṃ, bhikkhave, citta’’nti (a. ni. 1.22).
ஏதேஸு ஹி பரிஸுத்³த⁴பா⁴வாதீ³ஸு டி²தத்தா டி²தே. டி²தத்தாயேவ ஆனேஞ்ஜப்பத்தே அசலே நிரிஞ்ஜனேதி வுத்தங் ஹோதி. முது³கம்மஞ்ஞபா⁴வேன வா அத்தனோ வஸே டி²தத்தா டி²தே. ஸத்³தா⁴தீ³ஹி பரிக்³க³ஹிதத்தா ஆனேஞ்ஜப்பத்தே. ஸத்³தா⁴பரிக்³க³ஹிதஞ்ஹி சித்தங் அஸ்ஸத்³தி⁴யேன ந இஞ்ஜதி, வீரியபரிக்³க³ஹிதங் கோஸஜ்ஜேன ந இஞ்ஜதி, ஸதிபரிக்³க³ஹிதங் பமாதே³ன ந இஞ்ஜதி, ஸமாதி⁴பரிக்³க³ஹிதங் உத்³த⁴ச்சேன ந இஞ்ஜதி, பஞ்ஞாபரிக்³க³ஹிதங் அவிஜ்ஜாய ந இஞ்ஜதி, ஓபா⁴ஸக³தங் கிலேஸந்த⁴காரேன ந இஞ்ஜதி. இமேஹி ச²ஹி த⁴ம்மேஹி பரிக்³க³ஹிதுங் ஆனேஞ்ஜப்பத்தங் ஹோதி. ஏவங் அட்ட²ங்க³ஸமன்னாக³தங் சித்தங் அபி⁴னீஹாரக்க²மங் ஹோதி ஆகாஸானஞ்சாயதனஸமாபத்திபடிலாப⁴த்தா²ய.
Etesu hi parisuddhabhāvādīsu ṭhitattā ṭhite. Ṭhitattāyeva āneñjappatte acale niriñjaneti vuttaṃ hoti. Mudukammaññabhāvena vā attano vase ṭhitattā ṭhite. Saddhādīhi pariggahitattā āneñjappatte. Saddhāpariggahitañhi cittaṃ assaddhiyena na iñjati, vīriyapariggahitaṃ kosajjena na iñjati, satipariggahitaṃ pamādena na iñjati, samādhipariggahitaṃ uddhaccena na iñjati, paññāpariggahitaṃ avijjāya na iñjati, obhāsagataṃ kilesandhakārena na iñjati. Imehi chahi dhammehi pariggahituṃ āneñjappattaṃ hoti. Evaṃ aṭṭhaṅgasamannāgataṃ cittaṃ abhinīhārakkhamaṃ hoti ākāsānañcāyatanasamāpattipaṭilābhatthāya.
அபரோ நயோ – சதுத்த²ஜ்ஜா²னஸமாதி⁴னா ஸமாஹிதே. நீவரணதூ³ரீபா⁴வேன பரிஸுத்³தே⁴. விதக்காதி³ஸமதிக்கமேன பரியோதா³தே. ஜா²னபடிலாப⁴பச்சனிகானங் பாபகானங் இச்சா²வசரானஞ்ச அபா⁴வேன அனங்க³ணே. இச்சா²வசரானந்தி இச்சா²ய அவசரானங், இச்சா²வஸேன ஓதிண்ணானங் பவத்தானங் நானப்பகாரானங் கோபஅப்பச்சயானந்தி அத்தோ². அபி⁴ஜ்ஜா²தீ³னங் சித்தூபக்கிலேஸானங் விக³மேன விக³தூபக்கிலேஸே. உப⁴யம்பி சேதங் அங்க³ணஸுத்தவத்த²ஸுத்தானுஸாரேனேவ (ம॰ நி॰ 1.57 ஆத³யோ, 70 ஆத³யோ) வேதி³தப்³ப³ங். வஸிப்பத்தியா முது³பூ⁴தே. இத்³தி⁴பாத³பா⁴வூபக³மனேன கம்மனியே. பா⁴வனாபாரிபூரியா பணீதபா⁴வூபக³மேன டி²தே ஆனேஞ்ஜப்பத்தே, யதா² ஆனேஞ்ஜபா⁴வங் ஆனேஞ்ஜப்பத்தங் ஹோதி, ஏவங் டி²தேதி அத்தோ². ஏவம்பி அட்ட²ங்க³ஸமன்னாக³மேன சித்தங் அபி⁴னீஹாரக்க²மங் ஹோதி ஆகாஸானஞ்சாயதனஸமாபத்திபடிலாப⁴த்தா²ய பாத³கங் பத³ட்டா²னபூ⁴தங்.
Aparo nayo – catutthajjhānasamādhinā samāhite. Nīvaraṇadūrībhāvena parisuddhe. Vitakkādisamatikkamena pariyodāte. Jhānapaṭilābhapaccanikānaṃ pāpakānaṃ icchāvacarānañca abhāvena anaṅgaṇe. Icchāvacarānanti icchāya avacarānaṃ, icchāvasena otiṇṇānaṃ pavattānaṃ nānappakārānaṃ kopaappaccayānanti attho. Abhijjhādīnaṃ cittūpakkilesānaṃ vigamena vigatūpakkilese. Ubhayampi cetaṃ aṅgaṇasuttavatthasuttānusāreneva (ma. ni. 1.57 ādayo, 70 ādayo) veditabbaṃ. Vasippattiyā mudubhūte. Iddhipādabhāvūpagamanena kammaniye. Bhāvanāpāripūriyā paṇītabhāvūpagamena ṭhite āneñjappatte, yathā āneñjabhāvaṃ āneñjappattaṃ hoti, evaṃ ṭhiteti attho. Evampi aṭṭhaṅgasamannāgamena cittaṃ abhinīhārakkhamaṃ hoti ākāsānañcāyatanasamāpattipaṭilābhatthāya pādakaṃ padaṭṭhānabhūtaṃ.
ஆருப்பமக்³க³ஸமங்கீ³தி அரூபஸமாபத்தியா க³மனமக்³கே³ன அபரிஹீனோ. பபஞ்சாயேவ பபஞ்சஸங்கா²தி தண்ஹாதி³பபஞ்சாயேவ பபஞ்சஸங்கா².
Āruppamaggasamaṅgīti arūpasamāpattiyā gamanamaggena aparihīno. Papañcāyeva papañcasaṅkhāti taṇhādipapañcāyeva papañcasaṅkhā.
110. எத்தாவதக்³க³ங் நு வத³ந்தி ஹேகே, யக்க²ஸ்ஸ ஸுத்³தி⁴ங் இத⁴ பண்டி³தாஸே. உதா³ஹு அஞ்ஞம்பி வத³ந்தி எத்தோதி எத்தாவதா நு இத⁴ பண்டி³தா ஸமணப்³ராஹ்மணா அக்³க³ங் ஸுத்³தி⁴ங் ஸத்தஸ்ஸ வத³ந்தி, உதா³ஹு அஞ்ஞம்பி எத்தோ அரூபஸமாபத்திதோ அதி⁴கஞ்ச வத³ந்தீதி புச்ச²தி.
110.Ettāvataggaṃ nu vadanti heke, yakkhassa suddhiṃ idha paṇḍitāse. Udāhu aññampi vadanti ettoti ettāvatā nu idha paṇḍitā samaṇabrāhmaṇā aggaṃ suddhiṃ sattassa vadanti, udāhu aññampi etto arūpasamāpattito adhikañca vadantīti pucchati.
எத்தோ அரூபஸமாபத்திதோதி ஏதஸ்மா அரூபஸமாபத்திதோ.
Etto arūpasamāpattitoti etasmā arūpasamāpattito.
111. எத்தாவதக்³க³ம்பி வத³ந்தி ஹேகேதி ஏகே ஸஸ்ஸதவாதா³ ஸமணப்³ராஹ்மணா பண்டி³தமானினோ எத்தாவதாபி அக்³க³ங் ஸுத்³தி⁴ங் வத³ந்தி. தேஸங் பனேகே ஸமயங் வத³ந்தீதி தேஸஞ்ஞேவ ஏகே உச்சே²த³வாதா³ ஸமயங் உச்சே²த³ங் வத³ந்தி. அனுபாதி³ஸேஸே குஸலாவதா³னாதி அனுபாதி³ஸேஸே குஸலவாதா³ ஸமானா.
111.Ettāvataggampi vadanti heketi eke sassatavādā samaṇabrāhmaṇā paṇḍitamānino ettāvatāpi aggaṃ suddhiṃ vadanti. Tesaṃ paneke samayaṃ vadantīti tesaññeva eke ucchedavādā samayaṃ ucchedaṃ vadanti. Anupādisese kusalāvadānāti anupādisese kusalavādā samānā.
ப⁴வதஜ்ஜிதாதி ப⁴வதோ பீ⁴தா. விப⁴வங் அபி⁴னந்த³ந்தீதி உச்சே²த³ங் படிச்ச துஸ்ஸந்தி. தே ஸத்தஸ்ஸ ஸமந்தி தே உச்சே²த³வாதி³னோ புக்³க³லஸ்ஸ ஸமங் அனுப்பத்திங் வத³ந்தி. உபஸமந்தி அதீவ ஸமங். வூபஸமந்தி ஸந்தங். நிரோத⁴ந்தி அனுப்பாத³ங். படிபஸ்ஸத்³தி⁴ந்தி அபுனுப்பத்திங்.
Bhavatajjitāti bhavato bhītā. Vibhavaṃ abhinandantīti ucchedaṃ paṭicca tussanti. Te sattassa samanti te ucchedavādino puggalassa samaṃ anuppattiṃ vadanti. Upasamanti atīva samaṃ. Vūpasamanti santaṃ. Nirodhanti anuppādaṃ. Paṭipassaddhinti apunuppattiṃ.
112. ஏதே ச ஞத்வா உபனிஸ்ஸிதாதி ஏதே ச தி³ட்டி²க³திகே ஸஸ்ஸதுச்சே²த³தி³ட்டி²யோ நிஸ்ஸிதாதி ஞத்வா. ஞத்வா முனீ நிஸ்ஸயே ஸோ வீமங்ஸீதி நிஸ்ஸயே ச ஞத்வா ஸோ வீமங்ஸீ பண்டி³தோ பு³த்³த⁴முனி. ஞத்வா விமுத்தோதி து³க்கா²னிச்சாதி³தோ த⁴ம்மே ஞத்வா விமுத்தோ. ப⁴வாப⁴வாய ந ஸமேதீதி புனப்புனங் உபபத்தியா ந ஸமாக³ச்ச²தி. அபராமஸந்தி அபராமஸந்தோ. பராமாஸங் நாபஜ்ஜந்தோதி அத்தோ².
112.Ete ca ñatvā upanissitāti ete ca diṭṭhigatike sassatucchedadiṭṭhiyo nissitāti ñatvā. Ñatvā munī nissaye so vīmaṃsīti nissaye ca ñatvā so vīmaṃsī paṇḍito buddhamuni. Ñatvā vimuttoti dukkhāniccādito dhamme ñatvā vimutto. Bhavābhavāya na sametīti punappunaṃ upapattiyā na samāgacchati. Aparāmasanti aparāmasanto. Parāmāsaṃ nāpajjantoti attho.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
கலஹவிவாத³ஸுத்தனித்³தே³ஸவண்ணனா நிட்டி²தா.
Kalahavivādasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 11. கலஹவிவாத³ஸுத்தனித்³தே³ஸோ • 11. Kalahavivādasuttaniddeso
