| Library / Tipiṭaka / තිපිටක • Tipiṭaka / සුත්‌තනිපාත-අට්‌ඨකථා • Suttanipāta-aṭṭhakathā |
11. කලහවිවාදසුත්‌තවණ්‌ණනා
11. Kalahavivādasuttavaṇṇanā
869. කුතො පහූතා කලහා විවාදාති කලහවිවාදසුත්‌තං. කා උප්‌පත්‌ති? ඉදම්‌පි තස්‌මිංයෙව මහාසමයෙ ‘‘කුතො නු, ඛො, කලහාදයො අට්‌ඨ ධම්‌මා පවත්‌තන්‌තී’’ති උප්‌පන්‌නචිත්‌තානං එකච්‌චානං දෙවතානං තෙ ධම්‌මෙ ආවිකාතුං පුරිමනයෙනෙව නිම්‌මිතබුද්‌ධෙන අත්‌තානං පුච්‌ඡාපෙත්‌වා වුත්‌තං තත්‌ථ පුච්‌ඡාවිස්‌සජ්‌ජනක්‌කමෙන ඨිතත්‌තා සබ්‌බගාථා පාකටසම්‌බන්‌ධායෙව.
869.Kutopahūtā kalahā vivādāti kalahavivādasuttaṃ. Kā uppatti? Idampi tasmiṃyeva mahāsamaye ‘‘kuto nu, kho, kalahādayo aṭṭha dhammā pavattantī’’ti uppannacittānaṃ ekaccānaṃ devatānaṃ te dhamme āvikātuṃ purimanayeneva nimmitabuddhena attānaṃ pucchāpetvā vuttaṃ tattha pucchāvissajjanakkamena ṭhitattā sabbagāthā pākaṭasambandhāyeva.
අනුත්‌තානපදවණ්‌ණනා පනෙතාසං එවං වෙදිතබ්‌බා – කුතොපහූතා කලහා විවාදාති කලහො ච තස්‌ස පුබ්‌බභාගො විවාදො චාති ඉමෙ කුතො ජාතා. පරිදෙවසොකා සහමච්‌ඡරා චාති පරිදෙවසොකා ච මච්‌ඡරා ච කුතොපහූතා. මානාතිමානා සහපෙසුණා චාති මානා ච අතිමානා ච පෙසුණා ච කුතොපහූතා. තෙති තෙ සබ්‌බෙපි අට්‌ඨ කිලෙසධම්‌මා. තදිඞ්‌ඝ බ්‍රූහීති තං මයා පුච්‌ඡිතමත්‌ථං බ්‍රූහි යාචාමි තං අහන්‌ති. යාචනත්‌ථො හි ඉඞ්‌ඝාති නිපාතො.
Anuttānapadavaṇṇanā panetāsaṃ evaṃ veditabbā – kutopahūtā kalahā vivādāti kalaho ca tassa pubbabhāgo vivādo cāti ime kuto jātā. Paridevasokā sahamaccharā cāti paridevasokā ca maccharā ca kutopahūtā. Mānātimānā sahapesuṇā cāti mānā ca atimānā ca pesuṇā ca kutopahūtā. Teti te sabbepi aṭṭha kilesadhammā. Tadiṅgha brūhīti taṃ mayā pucchitamatthaṃ brūhi yācāmi taṃ ahanti. Yācanattho hi iṅghāti nipāto.
870. පියප්‌පහූතාති පියවත්‌ථුතො ජාතා. යුත්‌ති පනෙත්‌ථ නිද්‌දෙසෙ (මහානි. 98) වුත්‌තා එව. මච්‌ඡෙරයුත්‌තා කලහා විවාදාති ඉමිනා කලහවිවාදාදීනං න කෙවලං පියවත්‌ථුමෙව, මච්‌ඡරියම්‌පි පච්‌චයං දස්‌සෙති. කලහවිවාදසීසෙන චෙත්‌ථ සබ්‌බෙපි තෙ ධම්‌මා වුත්‌තාති වෙදිතබ්‌බා. යථා ච එතෙසං මච්‌ඡරියං, තථා පෙසුණානඤ්‌ච විවාදං. තෙනාහ – ‘‘විවාදජාතෙසු ච පෙසුණානී’’ති.
870.Piyappahūtāti piyavatthuto jātā. Yutti panettha niddese (mahāni. 98) vuttā eva. Maccherayuttā kalahā vivādāti iminā kalahavivādādīnaṃ na kevalaṃ piyavatthumeva, macchariyampi paccayaṃ dasseti. Kalahavivādasīsena cettha sabbepi te dhammā vuttāti veditabbā. Yathā ca etesaṃ macchariyaṃ, tathā pesuṇānañca vivādaṃ. Tenāha – ‘‘vivādajātesu ca pesuṇānī’’ti.
871. පියාසු ලොකස්‌මිං කුතොනිදානා යෙ චාපි ලොභා විචරන්‌ති ලොකෙති ‘‘පියා පහූතා කලහා’’ති යෙ එත්‌ථ වුත්‌තා. තෙ පියා ලොකස්‌මිං කුතොනිදානා, න කෙවලඤ්‌ච පියා, යෙ චාපි ඛත්‌තියාදයො ලොභා විචරන්‌ති ලොභහෙතුකා ලොභෙනාභිභූතා විචරන්‌ති, තෙසං සො ලොභො ච කුතොනිදානොති ද්‌වෙ අත්‌ථෙ එකාය පුච්‌ඡාය පුච්‌ඡති. ආසා ච නිට්‌ඨා චාති ආසා ච තස්‌සා ආසාය සමිද්‌ධි ච. යෙ සම්‌පරායාය නරස්‌ස හොන්‌තීති යෙ නරස්‌ස සම්‌පරායාය හොන්‌ති, පරායනා හොන්‌තීති වුත්‌තං හොති. එකා එවායම්‌පි පුච්‌ඡා.
871.Piyāsu lokasmiṃ kutonidānā ye cāpi lobhā vicaranti loketi ‘‘piyā pahūtā kalahā’’ti ye ettha vuttā. Te piyā lokasmiṃ kutonidānā, na kevalañca piyā, ye cāpi khattiyādayo lobhā vicaranti lobhahetukā lobhenābhibhūtā vicaranti, tesaṃ so lobho ca kutonidānoti dve atthe ekāya pucchāya pucchati. Āsā ca niṭṭhā cāti āsā ca tassā āsāya samiddhi ca. Ye samparāyāya narassa hontīti ye narassa samparāyāya honti, parāyanā hontīti vuttaṃ hoti. Ekā evāyampi pucchā.
872. ඡන්‌දානිදානානීති කාමච්‌ඡන්‌දාදිඡන්‌දනිදානානි. යෙ චාපි ලොභා විචරන්‌තීති යෙ චාපි ඛත්‌තියාදයො ලොභා විචරන්‌ති තෙසං ලොභොපි ඡන්‌දනිදානොති ද්‌වෙපි අත්‌ථෙ එකතො විස්‌සජ්‌ජෙති. ඉතොනිදානාති ඡන්‌දනිදානා එවාති වුත්‌තං හොති. ‘‘කුතොනිදානා කුතොනිදානා’’ති (සු. නි. 273) එතෙසු ච සද්‌දසිද්‌ධි සූචිලොමසුත්‌තෙ වුත්‌තනයෙනෙව වෙදිතබ්‌බා.
872.Chandānidānānīti kāmacchandādichandanidānāni. Ye cāpi lobhā vicarantīti ye cāpi khattiyādayo lobhā vicaranti tesaṃ lobhopi chandanidānoti dvepi atthe ekato vissajjeti. Itonidānāti chandanidānā evāti vuttaṃ hoti. ‘‘Kutonidānā kutonidānā’’ti (su. ni. 273) etesu ca saddasiddhi sūcilomasutte vuttanayeneva veditabbā.
873. විනිච්‌ඡයාති තණ්‌හාදිට්‌ඨිවිනිච්‌ඡයා. යෙ වාපි ධම්‌මා සමණෙන වුත්‌තාති යෙ ච අඤ්‌ඤෙපි කොධාදීහි සම්‌පයුත්‌තා, තථාරූපා වා අකුසලා ධම්‌මා බුද්‌ධසමණෙන වුත්‌තා, තෙ කුතොපහූතාති.
873.Vinicchayāti taṇhādiṭṭhivinicchayā. Ye vāpi dhammā samaṇena vuttāti ye ca aññepi kodhādīhi sampayuttā, tathārūpā vā akusalā dhammā buddhasamaṇena vuttā, te kutopahūtāti.
874. තමූපනිස්‌සාය පහොති ඡන්‌දොති තං සුඛදුක්‌ඛවෙදනං. තදුභයවත්‌ථුසඞ්‌ඛාතං සාතාසාතං උපනිස්‌සාය සංයොගවියොගපත්‌ථනාවසෙන ඡන්‌දො පහොති. එත්‌තාවතා ‘‘ඡන්‌දො නු ලොකස්‌මිං කුතොනිදානො’’ති අයං පඤ්‌හො විස්‌සජ්‌ජිතො හොති. රූපෙසු දිස්‌වා විභවං භවඤ්‌චාති රූපෙසු වයඤ්‌ච උප්‌පාදඤ්‌ච දිස්‌වා. විනිච්‌ඡයං කුබ්‌බති ජන්‌තු ලොකෙති අපායාදිකෙ ලොකෙ අයං ජන්‌තු භොගාධිගමනත්‌ථං තණ්‌හාවිනිච්‌ඡයං ‘‘අත්‌තා මෙ උප්‌පන්‌නො’’තිආදිනා නයෙන දිට්‌ඨිවිනිච්‌ඡයඤ්‌ච කුරුතෙ. යුත්‌ති පනෙත්‌ථ නිද්‌දෙසෙ (මහානි. 102) වුත්‌තා එව. එත්‌තාවතා ‘‘විනිච්‌ඡයා චාපි කුතොපහූතා’’ති අයං පඤ්‌හො විස්‌සජ්‌ජිතො හොති.
874.Tamūpanissāya pahoti chandoti taṃ sukhadukkhavedanaṃ. Tadubhayavatthusaṅkhātaṃ sātāsātaṃ upanissāya saṃyogaviyogapatthanāvasena chando pahoti. Ettāvatā ‘‘chando nu lokasmiṃ kutonidāno’’ti ayaṃ pañho vissajjito hoti. Rūpesu disvā vibhavaṃ bhavañcāti rūpesu vayañca uppādañca disvā. Vinicchayaṃ kubbati jantu loketi apāyādike loke ayaṃ jantu bhogādhigamanatthaṃ taṇhāvinicchayaṃ ‘‘attā me uppanno’’tiādinā nayena diṭṭhivinicchayañca kurute. Yutti panettha niddese (mahāni. 102) vuttā eva. Ettāvatā ‘‘vinicchayā cāpi kutopahūtā’’ti ayaṃ pañho vissajjito hoti.
875. එතෙපි ධම්‌මා ද්‌වයමෙව සන්‌තෙති එතෙපි කොධාදයො ධම්‌මා සාතාසාතද්‌වයෙ සන්‌තෙ එව පහොන්‌ති උප්‌පජ්‌ජන්‌ති. උප්‌පත්‌ති ච නෙසං නිද්‌දෙසෙ (මහානි. 103) වුත්‌තායෙව. එත්‌තාවතා තතියපඤ්‌හොපි විස්‌සජ්‌ජිතො හොති. ඉදානි යො එවං විස්‌සජ්‌ජිතෙසු එතෙසු පඤ්‌හෙසු කථංකථී භවෙය්‍ය, තස්‌ස කථංකථාපහානූපායං දස්‌සෙන්‌තො ආහ – ‘‘කථංකථී ඤාණපථාය සික්‌ඛෙ’’ති, ඤාණදස්‌සනඤාණාධිගමනත්‌ථං තිස්‌සො සික්‌ඛා සික්‌ඛෙය්‍යාති වුත්‌තං හොති. කිං කාරණං? ඤත්‌වා පවුත්‌තා සමණෙන ධම්‌මා. බුද්‌ධසමණෙන හි ඤත්‌වාව ධම්‌මා වුත්‌තා, නත්‌ථි තස්‌ස ධම්‌මෙසු අඤ්‌ඤාණං. අත්‌තනො පන ඤාණාභාවෙන තෙ අජානන්‌තො න ජානෙය්‍ය, න දෙසනා දොසෙන, තස්‌මා කථංකථී ඤාණපථාය සික්‌ඛෙ, ඤත්‌වා පවුත්‌තා සමණෙන ධම්‌මාති.
875.Etepi dhammā dvayameva santeti etepi kodhādayo dhammā sātāsātadvaye sante eva pahonti uppajjanti. Uppatti ca nesaṃ niddese (mahāni. 103) vuttāyeva. Ettāvatā tatiyapañhopi vissajjito hoti. Idāni yo evaṃ vissajjitesu etesu pañhesu kathaṃkathī bhaveyya, tassa kathaṃkathāpahānūpāyaṃ dassento āha – ‘‘kathaṃkathī ñāṇapathāya sikkhe’’ti, ñāṇadassanañāṇādhigamanatthaṃ tisso sikkhā sikkheyyāti vuttaṃ hoti. Kiṃ kāraṇaṃ? Ñatvā pavuttā samaṇena dhammā. Buddhasamaṇena hi ñatvāva dhammā vuttā, natthi tassa dhammesu aññāṇaṃ. Attano pana ñāṇābhāvena te ajānanto na jāneyya, na desanā dosena, tasmā kathaṃkathī ñāṇapathāya sikkhe, ñatvā pavuttā samaṇena dhammāti.
876-7. සාතං අසාතඤ්‌ච කුතොනිදානාති එත්‌ථ සාතං අසාතන්‌ති සුඛදුක්‌ඛවෙදනා එව අධිප්‌පෙතා. න භවන්‌ති හෙතෙති න භවන්‌ති එතෙ. විභවං භවඤ්‌චාපි යමෙතමත්‌ථං එතං මෙ පබ්‍රූහි යතොනිදානන්‌ති සාතාසාතානං විභවං භවඤ්‌ච එතම්‌පි යං අත්‌ථං. ලිඞ්‌ගබ්‍යත්‌තයො එත්‌ථ කතො. ඉදං පන වුත්‌තං හොති – සාතාසාතානං විභවො භවො චාති යො එස අත්‌ථො, එවං මෙ පබ්‍රූහි යතොනිදානන්‌ති. එත්‌ථ ච සාතාසාතානං විභවභවවත්‌ථුකා විභවභවදිට්‌ඨියො එව විභවභවාති අත්‌ථතො වෙදිතබ්‌බා. තථා හි ඉමස්‌ස පඤ්‌හස්‌ස විස්‌සජ්‌ජනපක්‌ඛෙ ‘‘භවදිට්‌ඨිපි ඵස්‌සනිදානා, විභවදිට්‌ඨිපි ඵස්‌සනිදානා’’ති නිද්‌දෙසෙ (මහානි. 105) වුත්‌තං. ඉතොනිදානන්‌ති ඵස්‌සනිදානං.
876-7.Sātaṃasātañca kutonidānāti ettha sātaṃ asātanti sukhadukkhavedanā eva adhippetā. Na bhavanti heteti na bhavanti ete. Vibhavaṃ bhavañcāpi yametamatthaṃ etaṃ me pabrūhi yatonidānanti sātāsātānaṃ vibhavaṃ bhavañca etampi yaṃ atthaṃ. Liṅgabyattayo ettha kato. Idaṃ pana vuttaṃ hoti – sātāsātānaṃ vibhavo bhavo cāti yo esa attho, evaṃ me pabrūhi yatonidānanti. Ettha ca sātāsātānaṃ vibhavabhavavatthukā vibhavabhavadiṭṭhiyo eva vibhavabhavāti atthato veditabbā. Tathā hi imassa pañhassa vissajjanapakkhe ‘‘bhavadiṭṭhipi phassanidānā, vibhavadiṭṭhipi phassanidānā’’ti niddese (mahāni. 105) vuttaṃ. Itonidānanti phassanidānaṃ.
878. කිස්‌මිං විභූතෙ න ඵුසන්‌ති ඵස්‌සාති කිස්‌මිං වීතිවත්‌තෙ චක්‌ඛුසම්‌ඵස්‌සාදයො පඤ්‌ච ඵස්‌සා න ඵුසන්‌ති.
878.Kismiṃ vibhūte na phusanti phassāti kismiṃ vītivatte cakkhusamphassādayo pañca phassā na phusanti.
879. නාමඤ්‌ච රූපඤ්‌ච පටිච්‌චාති සම්‌පයුත්‌තකනාමං වත්‌ථාරම්‌මණරූපඤ්‌ච පටිච්‌ච. රූපෙ විභූතෙ න ඵුසන්‌ති ඵස්‌සාති රූපෙ වීතිවත්‌තෙ පඤ්‌ච ඵස්‌සා න ඵුසන්‌ති.
879.Nāmañca rūpañca paṭiccāti sampayuttakanāmaṃ vatthārammaṇarūpañca paṭicca. Rūpe vibhūte na phusanti phassāti rūpe vītivatte pañca phassā na phusanti.
880. කථං සමෙතස්‌සාති කථං පටිපන්‌නස්‌ස. විභොති රූපන්‌ති රූප විභවති, න භවෙය්‍ය වා. සුඛං දුඛඤ්‌චාති ඉට්‌ඨානිට්‌ඨං රූපමෙව පුච්‌ඡති.
880.Kathaṃ sametassāti kathaṃ paṭipannassa. Vibhoti rūpanti rūpa vibhavati, na bhaveyya vā. Sukhaṃ dukhañcāti iṭṭhāniṭṭhaṃ rūpameva pucchati.
881. න සඤ්‌ඤසඤ්‌ඤීති යථා සමෙතස්‌ස විභොති රූපං, සො පකතිසඤ්‌ඤාය සඤ්‌ඤීපි න හොති. න විසඤ්‌ඤසඤ්‌ඤීති විසඤ්‌ඤායපි විරූපාය සඤ්‌ඤාය සඤ්‌ඤී න හොති උම්‌මත්‌තකො වා ඛිත්‌තචිත්‌තො වා. නොපි අසඤ්‌ඤීති සඤ්‌ඤාවිරහිතොපි න හොති නිරොධසමාපන්‌නො වා අසඤ්‌ඤසත්‌තො වා. න විභූතසඤ්‌ඤීති ‘‘සබ්‌බසො රූපසඤ්‌ඤාන’’න්‌තිආදිනා (ධ ස. 265; විභ. 602) නයෙන සමතික්‌කන්‌තසඤ්‌ඤීපි න හොති අරූපජ්‌ඣානලාභී. එවං සමෙතස්‌ස විභොති රූපන්‌ති එතස්‌මිං සඤ්‌ඤසඤ්‌ඤිතාදිභාවෙ අට්‌ඨත්‌වා යදෙතං වුත්‌තං ‘‘සො එවං සමාහිතෙ චිත්‌තෙ…පෙ.… ආකාසානඤ්‌චායතනසමාපත්‌තිපටිලාභත්‌ථාය චිත්‌තං අභිනීහරතී’’ති. එවං සමෙතස්‌ස අරූපමග්‌ගසමඞ්‌ගිනො විභොති රූපං. සඤ්‌ඤානිදානා හි පපඤ්‌චසඞ්‌ඛාති එවං පටිපන්‌නස්‌සාපි යා සඤ්‌ඤා, තන්‌නිදානා තණ්‌හාදිට්‌ඨිපපඤ්‌චා අප්‌පහීනා එව හොන්‌තීති දස්‌සෙති.
881.Na saññasaññīti yathā sametassa vibhoti rūpaṃ, so pakatisaññāya saññīpi na hoti. Na visaññasaññīti visaññāyapi virūpāya saññāya saññī na hoti ummattako vā khittacitto vā. Nopi asaññīti saññāvirahitopi na hoti nirodhasamāpanno vā asaññasatto vā. Na vibhūtasaññīti ‘‘sabbaso rūpasaññāna’’ntiādinā (dha sa. 265; vibha. 602) nayena samatikkantasaññīpi na hoti arūpajjhānalābhī. Evaṃ sametassa vibhoti rūpanti etasmiṃ saññasaññitādibhāve aṭṭhatvā yadetaṃ vuttaṃ ‘‘so evaṃ samāhite citte…pe… ākāsānañcāyatanasamāpattipaṭilābhatthāya cittaṃ abhinīharatī’’ti. Evaṃ sametassa arūpamaggasamaṅgino vibhoti rūpaṃ. Saññānidānā hi papañcasaṅkhāti evaṃ paṭipannassāpi yā saññā, tannidānā taṇhādiṭṭhipapañcā appahīnā eva hontīti dasseti.
882-3. එත්‌තාවතග්‌ගං නු වදන්‌ති, හෙකෙ යක්‌ඛස්‌ස සුද්‌ධිං ඉධ පණ්‌ඩිතාසෙ. උදාහු අඤ්‌ඤම්‌පි වදන්‌ති එත්‌තොති එත්‌තාවතා නු ඉධ පණ්‌ඩිතා සමණබ්‍රාහ්‌මණා අග්‌ගං සුද්‌ධිං සත්‌තස්‌ස වදන්‌ති, උදාහු අඤ්‌ඤම්‌පි එත්‌තො අරූපසමාපත්‌තිතො අධිකං වදන්‌තීති පුච්‌ඡති. එත්‌තාවතග්‌ගම්‌පි වදන්‌ති හෙකෙති එකෙ සස්‌සතවාදා සමණබ්‍රාහ්‌මණා පණ්‌ඩිතමානිනො එත්‌තාවතාපි අග්‌ගං සුද්‌ධිං වදන්‌ති. තෙසං පනෙකෙ සමයං වදන්‌තීති තෙසංයෙව එකෙ උච්‌ඡෙදවාදා සමයං උච්‌ඡෙදං වදන්‌ති. අනුපාදිසෙසෙ කුසලා වදානාති අනුපාදිසෙසෙ කුසලවාදා සමානා.
882-3.Ettāvataggaṃnu vadanti, heke yakkhassa suddhiṃ idha paṇḍitāse. Udāhu aññampi vadantiettoti ettāvatā nu idha paṇḍitā samaṇabrāhmaṇā aggaṃ suddhiṃ sattassa vadanti, udāhu aññampi etto arūpasamāpattito adhikaṃ vadantīti pucchati. Ettāvataggampi vadanti heketi eke sassatavādā samaṇabrāhmaṇā paṇḍitamānino ettāvatāpi aggaṃ suddhiṃ vadanti. Tesaṃ paneke samayaṃ vadantīti tesaṃyeva eke ucchedavādā samayaṃ ucchedaṃ vadanti. Anupādisese kusalā vadānāti anupādisese kusalavādā samānā.
884. එතෙ ච ඤත්‌වා උපනිස්‌සිතාති එතෙ ච දිට්‌ඨිගතිකෙ සස්‌සතුච්‌ඡෙදදිට්‌ඨියො නිස්‌සිතාති ඤත්‌වා. ඤත්‌වා මුනී නිස්‌සයෙ සො විමංසීති නිස්‌සයෙ ච ඤත්‌වා සො වීමංසී පණ්‌ඩිතො බුද්‌ධමුනි. ඤත්‌වා විමුත්‌තොති දුක්‌ඛානිච්‌චාදිතො ධම්‌මෙ ඤත්‌වා විමුත්‌තො. භවාභවාය න සමෙතීති පුනප්‌පුනං උපපත්‌තියා න සමාගච්‌ඡතීති අරහත්‌තනිකූටෙන දෙසනං නිට්‌ඨාපෙසි. දෙසනාපරියොසානෙ පුරාභෙදසුත්‌තෙ වුත්‌තසදිසොයෙවාභිසමයො අහොසීති.
884.Eteca ñatvā upanissitāti ete ca diṭṭhigatike sassatucchedadiṭṭhiyo nissitāti ñatvā. Ñatvā munī nissaye so vimaṃsīti nissaye ca ñatvā so vīmaṃsī paṇḍito buddhamuni. Ñatvā vimuttoti dukkhāniccādito dhamme ñatvā vimutto. Bhavābhavāya na sametīti punappunaṃ upapattiyā na samāgacchatīti arahattanikūṭena desanaṃ niṭṭhāpesi. Desanāpariyosāne purābhedasutte vuttasadisoyevābhisamayo ahosīti.
පරමත්‌ථජොතිකාය ඛුද්‌දක-අට්‌ඨකථාය
Paramatthajotikāya khuddaka-aṭṭhakathāya
සුත්‌තනිපාත-අට්‌ඨකථාය කලහවිවාදසුත්‌තවණ්‌ණනා නිට්‌ඨිතා.
Suttanipāta-aṭṭhakathāya kalahavivādasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / සුත්‌තනිපාතපාළි • Suttanipātapāḷi / 11. කලහවිවාදසුත්‌තං • 11. Kalahavivādasuttaṃ
