| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๓. กลนฺทกงฺคปโญฺห
3. Kalandakaṅgapañho
๓. ‘‘ภเนฺต นาคเสน, ‘กลนฺทกสฺส เอกํ องฺคํ คเหตพฺพ’นฺติ ยํ วเทสิ, กตมํ ตํ เอกํ องฺคํ คเหตพฺพ’’นฺติ? ‘‘ยถา, มหาราช, กลนฺทโก ปฎิสตฺตุมฺหิ โอปตเนฺต นงฺคุฎฺฐํ ปโปฺผเฎตฺวา มหนฺตํ กตฺวา เตเนว นงฺคุฎฺฐลคุเฬน ปฎิสตฺตุํ ปฎิพาหติ, เอวเมว โข, มหาราช, โยคินา โยคาวจเรน กิเลสสตฺตุมฺหิ โอปตเนฺต สติปฎฺฐานลคุฬํ ปโปฺผเฎตฺวา มหนฺตํ กตฺวา เตเนว สติปฎฺฐานลคุเฬน สพฺพกิเลสา ปฎิพาหิตพฺพาฯ อิทํ, มหาราช, กลนฺทกสฺส เอกํ องฺคํ คเหตพฺพํฯ ภาสิตเมฺปตํ, มหาราช, เถเรน จูฬปนฺถเกน –
3. ‘‘Bhante nāgasena, ‘kalandakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kalandako paṭisattumhi opatante naṅguṭṭhaṃ papphoṭetvā mahantaṃ katvā teneva naṅguṭṭhalaguḷena paṭisattuṃ paṭibāhati, evameva kho, mahārāja, yoginā yogāvacarena kilesasattumhi opatante satipaṭṭhānalaguḷaṃ papphoṭetvā mahantaṃ katvā teneva satipaṭṭhānalaguḷena sabbakilesā paṭibāhitabbā. Idaṃ, mahārāja, kalandakassa ekaṃ aṅgaṃ gahetabbaṃ. Bhāsitampetaṃ, mahārāja, therena cūḷapanthakena –
‘ยทา กิเลสา โอปตนฺติ, สามญฺญคุณธํสนา;
‘Yadā kilesā opatanti, sāmaññaguṇadhaṃsanā;
สติปฎฺฐานลคุเฬน, หนฺตพฺพา เต ปุนปฺปุน’’’นฺติฯ
Satipaṭṭhānalaguḷena, hantabbā te punappuna’’’nti.
กลนฺทกงฺคปโญฺห ตติโยฯ
Kalandakaṅgapañho tatiyo.
