| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. ကလန္ဒကင္ဂပဉ္ဟော
3. Kalandakaṅgapañho
၃. ‘‘ဘန္တေ နာဂသေန, ‘ကလန္ဒကသ္သ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ကလန္ဒကော ပဋိသတ္တုမ္ဟိ ဩပတန္တေ နင္ဂုဋ္ဌံ ပပ္ဖောဋေတ္ဝာ မဟန္တံ ကတ္ဝာ တေနေဝ နင္ဂုဋ္ဌလဂုဠေန ပဋိသတ္တုံ ပဋိဗာဟတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ကိလေသသတ္တုမ္ဟိ ဩပတန္တေ သတိပဋ္ဌာနလဂုဠံ ပပ္ဖောဋေတ္ဝာ မဟန္တံ ကတ္ဝာ တေနေဝ သတိပဋ္ဌာနလဂုဠေန သဗ္ဗကိလေသာ ပဋိဗာဟိတဗ္ဗာ။ ဣဒံ, မဟာရာဇ, ကလန္ဒကသ္သ ဧကံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန စူဠပန္ထကေန –
3. ‘‘Bhante nāgasena, ‘kalandakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kalandako paṭisattumhi opatante naṅguṭṭhaṃ papphoṭetvā mahantaṃ katvā teneva naṅguṭṭhalaguḷena paṭisattuṃ paṭibāhati, evameva kho, mahārāja, yoginā yogāvacarena kilesasattumhi opatante satipaṭṭhānalaguḷaṃ papphoṭetvā mahantaṃ katvā teneva satipaṭṭhānalaguḷena sabbakilesā paṭibāhitabbā. Idaṃ, mahārāja, kalandakassa ekaṃ aṅgaṃ gahetabbaṃ. Bhāsitampetaṃ, mahārāja, therena cūḷapanthakena –
‘ယဒာ ကိလေသာ ဩပတန္တိ၊ သာမညဂုဏဓံသနာ။
‘Yadā kilesā opatanti, sāmaññaguṇadhaṃsanā;
သတိပဋ္ဌာနလဂုဠေန၊ ဟန္တဗ္ဗာ တေ ပုနပ္ပုန’’’န္တိ။
Satipaṭṭhānalaguḷena, hantabbā te punappuna’’’nti.
ကလန္ဒကင္ဂပဉ္ဟော တတိယော။
Kalandakaṅgapañho tatiyo.
