| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. காலத்தயஅனிச்சஸுத்தங்
9. Kālattayaaniccasuttaṃ
9. ஸாவத்தி²னிதா³னங். ‘‘ரூபங், பி⁴க்க²வே, அனிச்சங் அதீதானாக³தங்; கோ பன வாதோ³ பச்சுப்பன்னஸ்ஸ! ஏவங் பஸ்ஸங், பி⁴க்க²வே, ஸுதவா அரியஸாவகோ அதீதஸ்மிங் ரூபஸ்மிங் அனபெக்கோ² ஹோதி; அனாக³தங் ரூபங் நாபி⁴னந்த³தி; பச்சுப்பன்னஸ்ஸ ரூபஸ்ஸ நிப்³பி³தா³ய விராகா³ய நிரோதா⁴ய படிபன்னோ ஹோதி. வேத³னா அனிச்சா…பே॰… ஸஞ்ஞா அனிச்சா… ஸங்கா²ரா அனிச்சா அதீதானாக³தா; கோ பன வாதோ³ பச்சுப்பன்னானங்! ஏவங் பஸ்ஸங், பி⁴க்க²வே, ஸுதவா அரியஸாவகோ அதீதேஸு ஸங்கா²ரேஸு அனபெக்கோ² ஹோதி; அனாக³தே ஸங்கா²ரே நாபி⁴னந்த³தி; பச்சுப்பன்னானங் ஸங்கா²ரானங் நிப்³பி³தா³ய விராகா³ய நிரோதா⁴ய படிபன்னோ ஹோதி. விஞ்ஞாணங் அனிச்சங் அதீதானாக³தங்; கோ பன வாதோ³ பச்சுப்பன்னஸ்ஸ! ஏவங் பஸ்ஸங், பி⁴க்க²வே, ஸுதவா அரியஸாவகோ அதீதஸ்மிங் விஞ்ஞாணஸ்மிங் அனபெக்கோ² ஹோதி; அனாக³தங் விஞ்ஞாணங் நாபி⁴னந்த³தி; பச்சுப்பன்னஸ்ஸ விஞ்ஞாணஸ்ஸ நிப்³பி³தா³ய விராகா³ய நிரோதா⁴ய படிபன்னோ ஹோதீ’’தி. நவமங்.
9. Sāvatthinidānaṃ. ‘‘Rūpaṃ, bhikkhave, aniccaṃ atītānāgataṃ; ko pana vādo paccuppannassa! Evaṃ passaṃ, bhikkhave, sutavā ariyasāvako atītasmiṃ rūpasmiṃ anapekkho hoti; anāgataṃ rūpaṃ nābhinandati; paccuppannassa rūpassa nibbidāya virāgāya nirodhāya paṭipanno hoti. Vedanā aniccā…pe… saññā aniccā… saṅkhārā aniccā atītānāgatā; ko pana vādo paccuppannānaṃ! Evaṃ passaṃ, bhikkhave, sutavā ariyasāvako atītesu saṅkhāresu anapekkho hoti; anāgate saṅkhāre nābhinandati; paccuppannānaṃ saṅkhārānaṃ nibbidāya virāgāya nirodhāya paṭipanno hoti. Viññāṇaṃ aniccaṃ atītānāgataṃ; ko pana vādo paccuppannassa! Evaṃ passaṃ, bhikkhave, sutavā ariyasāvako atītasmiṃ viññāṇasmiṃ anapekkho hoti; anāgataṃ viññāṇaṃ nābhinandati; paccuppannassa viññāṇassa nibbidāya virāgāya nirodhāya paṭipanno hotī’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. காலத்தயஅனிச்சஸுத்தவண்ணனா • 9. Kālattayaaniccasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. காலத்தயஅனிச்சஸுத்தவண்ணனா • 9. Kālattayaaniccasuttavaṇṇanā
