| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๒. กาฬายสงฺคปโญฺห
2. Kāḷāyasaṅgapañho
๒. ‘‘ภเนฺต นาคเสน, ‘กาฬายสสฺส 1 เทฺว องฺคานิ คเหตพฺพานี’ติ ยํ วเทสิ, กตมานิ ตานิ เทฺว องฺคานิ คเหตพฺพานี’’ติ ? ‘‘ยถา, มหาราช, กาฬายโส สุปีโต 2 วมติ 3, เอวเมว โข, มหาราช, โยคิโน โยคาวจรสฺส มานสํ โยนิโส มนสิกาเรน 4 อปีตํ วมติฯ อิทํ, มหาราช, กาฬายสสฺส ปฐมํ องฺคํ คเหตพฺพํฯ
2. ‘‘Bhante nāgasena, ‘kāḷāyasassa 5 dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti ? ‘‘Yathā, mahārāja, kāḷāyaso supīto 6 vamati 7, evameva kho, mahārāja, yogino yogāvacarassa mānasaṃ yoniso manasikārena 8 apītaṃ vamati. Idaṃ, mahārāja, kāḷāyasassa paṭhamaṃ aṅgaṃ gahetabbaṃ.
‘‘ปุน จปรํ, มหาราช, กาฬายโส สกิํ ปีตํ อุทกํ น วมติ, เอวเมว โข, มหาราช , โยคินา โยคาวจเรน โย สกิํ อุปฺปโนฺน ปสาโท, น ปุน โส วมิตโพฺพ ‘อุฬาโร โส ภควา สมฺมาสมฺพุโทฺธ, สฺวากฺขาโต ธโมฺม, สุปฺปฎิปโนฺน สโงฺฆ’ติฯ ‘รูปํ อนิจฺจํ, เวทนา อนิจฺจา, สญฺญา อนิจฺจา, สงฺขารา อนิจฺจา, วิญฺญาณํ อนิจฺจนฺติ ยํ สกิํ อุปฺปนฺนํ ญาณํ, น ปุน ตํ วมิตพฺพํฯ อิทํ , มหาราช, กาฬายสสฺส ทุติยํ องฺคํ คเหตพฺพํฯ ภาสิตเมฺปตํ, มหาราช, ภควตา เทวาติเทเวน –
‘‘Puna caparaṃ, mahārāja, kāḷāyaso sakiṃ pītaṃ udakaṃ na vamati, evameva kho, mahārāja , yoginā yogāvacarena yo sakiṃ uppanno pasādo, na puna so vamitabbo ‘uḷāro so bhagavā sammāsambuddho, svākkhāto dhammo, suppaṭipanno saṅgho’ti. ‘Rūpaṃ aniccaṃ, vedanā aniccā, saññā aniccā, saṅkhārā aniccā, viññāṇaṃ aniccanti yaṃ sakiṃ uppannaṃ ñāṇaṃ, na puna taṃ vamitabbaṃ. Idaṃ , mahārāja, kāḷāyasassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘ทสฺสนมฺหิ ปริโสธิโต 9 นโร, อริยธเมฺม นิยโต วิเสสคู;
‘‘‘Dassanamhi parisodhito 10 naro, ariyadhamme niyato visesagū;
นปฺปเวธติ อเนกภาคโส, สพฺพโส จ มุขภาวเมว โส’’’ติฯ
Nappavedhati anekabhāgaso, sabbaso ca mukhabhāvameva so’’’ti.
กาฬายสงฺคปโญฺห ทุติโยฯ
Kāḷāyasaṅgapañho dutiyo.
Footnotes:
